മുതുകാടും ടീമും വീണ്ടും ഒന്നിക്കുന്നു; മാന്ത്രികവിദ്യയുടെ വിസ്മയക്കാഴ്ചകളുമായി 'ഇല്യൂഷന്‍ ടു ഇന്‍സ്പിരേഷന്‍'
കോഴിക്കോട്: നാല് വര്‍ഷങ്ങള്‍ക്കുശേഷം ഗോപിനാഥ് മുതുകാടും അദ്ദേഹത്തിന്റെ പഴയ ടീമംഗങ്ങളും വീണ്ടും വേദിയിലെത്തുന്നു. ജാലവിദ്യയിലൂടെ ഒരുകാലത്ത് കേരളത്തെ അത്ഭുതപ്പെടുത്തിയ അതേ കൂട്ടുകെട്ട്, കോഴിക്കോട് പ്രൊവിഡന്‍സ് കോളേജില്‍ 'ഇല്യൂഷന്‍ ടു ഇന്‍സ്പിരേഷന്‍' എന്ന പരിപാടിയിലൂടെ ഒരിക്കല്‍ കൂടി മാത്രം പ്രേക്ഷകരിലേക്ക് എത്തുകയാണ്. തന്റെ പിതാവ് കുഞ്ഞുണ്ണിനായരോടുള്ള ആദരസൂചകമായാണ് മുതുകാട് ഈ മാന്ത്രികവിരുന്ന് ഒരുക്കുന്നതെന്ന് ഗോപിനാഥ് മുതുകാട് പത്രസമ്മേളനത്തില്‍ പറഞ്ഞു.
പ്രൊഫഷണല്‍ മാന്ത്രികവിദ്യയില്‍ നിന്ന് 2019-ല്‍ വിരമിച്ചതിന് ശേഷം മുതുകാടിന്റെ ടീമംഗങ്ങള്‍ പല വഴികളിലേക്ക് മാറിയിരുന്നു. പലരും മറ്റ് ജോലികളിലേക്കും വിദേശരാജ്യങ്ങളിലേക്കും ചേക്കേറി. എന്നാല്‍, വര്‍ഷങ്ങള്‍ക്കിപ്പുറം ഒരുമിച്ച് ഒരു വേദി പങ്കിടാന്‍ അവസരം ലഭിച്ചതിന്റെ സന്തോഷത്തിലാണ് ഈ കൂട്ടായ്മ. തിരുവനന്തപുരം മാജിക് പ്ലാനറ്റിലെ ഫന്റാസിയ വേദിയില്‍ രാപ്പകലില്ലാതെ കഠിനപരിശീലനം നടത്തിയതിന് ശേഷമാണ് അവര്‍ ഈ ഷോ അവതരിപ്പിക്കാന്‍ തയ്യാറെടുക്കുന്നത്. മുതുകാടിനൊപ്പം വീണ്ടും മാജിക് ഷോ അവതരിപ്പിക്കുന്നതിന്റെ സന്തോഷം ടീമംഗങ്ങളായ പ്രഭാകരന്‍ (മുതുകാടിന്റെ സഹോദരന്‍), തോമസ് പാലച്ചുവട്ടില്‍, ആനന്ദ് മേഴത്തൂര്‍, ദിവ്യ രജീഷ്, താര സമീര്‍, പ്രമോദ്, സമീര്‍ പുന്നപ്ര, ദീപു മോഹന്‍, ഷാരൂഖ് ലത്തീഫ്, ഗഫൂര്‍ പാപ്പാലി, ഷിജു വേണുഗോപാല്‍, വിനോദ് എം.എസ് എന്നിവര്‍ പങ്കുവെച്ചു.
1987-ല്‍ കോഴിക്കോട് വെച്ചാണ് മുതുകാട് തന്റെ ആദ്യ പ്രൊഫഷണല്‍ മാന്ത്രിക പ്രദര്‍ശനം നടത്തുന്നത്. പിന്നീട് അരനൂറ്റാണ്ടോളം നീണ്ട തന്റെ മാന്ത്രികയാത്രയില്‍, മാജിക്കിനോടുള്ള അഭിനിവേശം കാരണം നിയമപഠനം പാതിവഴിയില്‍ ഉപേക്ഷിക്കേണ്ടി വന്നിരുന്നു. ഈ നിര്‍ണായക ഘട്ടത്തില്‍ അദ്ദേഹത്തിന് പൂര്‍ണ്ണ പിന്തുണ നല്‍കിയത് പിതാവാണ്. അദ്ദേഹത്തോടുള്ള നന്ദി രേഖപ്പെടുത്താനും ഭിന്നശേഷിക്കാര്‍ക്കായുള്ള തന്റെ സന്ദേശം പങ്കുവയ്ക്കാനുമാണ് ഈ മാജിക് ഷോയിലൂടെ മുതുകാട് ലക്ഷ്യമിടുന്നത്.
'ഇല്യൂഷന്‍ ടു ഇന്‍സ്പിരേഷന്‍' എന്ന ഈ പരിപാടിക്ക് പിന്തുണ നല്‍കുന്നത് തിരുവനന്തപുരം ഡിഫറന്റ് ആര്‍ട്സ് സെന്റര്‍ (DAC), ഓയ്‌സ്‌ക ഇന്റര്‍നാഷണല്‍, മലബാര്‍ ചേംബര്‍ ഓഫ് കൊമേഴ്‌സ്, ഇന്ത്യന്‍ യൂത്ത് അസോസിയേഷന്‍ എന്നിവരാണ്. കൂടാതെ, ഭിന്നശേഷിക്കാരുടെ ഉന്നമനത്തിനായി കാസര്‍ഗോഡ് ആരംഭിക്കുന്ന ഇന്റര്‍നാഷണല്‍ ഇന്‍സ്റ്റിറ്റ്യൂട്ട് ഫോര്‍ പീപ്പിള്‍ വിത്ത് ഡിസെബിലിറ്റീസ് (IIPD) എന്ന പദ്ധതിക്ക് വേണ്ടിയുള്ള ധനസമാഹരണം കൂടിയാണ് ഈ പരിപാടി. ഇന്ത്യന്‍ മാന്ത്രിക ലോകത്തെ പ്രമുഖനായ പി.സി. സര്‍ക്കാര്‍ ജൂനിയര്‍ ആണ് പരിപാടി ഉദ്ഘാടനം ചെയ്യുന്നത്.
