സ്‌കൂള്‍ വിദ്യാര്‍ത്ഥികള്‍ക്കായി ഡാറ്റ സയന്‍സ്&എഐ, ഇലക്ട്രോണിക് സിസ്റ്റംസ് ഓണ്‍ലൈന്‍ കോഴ്സുകള്‍ ആരംഭിച്ച് ഐഐടി മദ്രാസ്
കൊച്ചി: ഐഐടി മദ്രാസില്‍ സ്‌കൂള്‍ വിദ്യാര്‍ത്ഥികള്‍ക്കായി ഡാറ്റ സയന്‍സ്&എഐ, ഇലക്ട്രോണിക് സിസ്റ്റംസ് എന്നിവയില്‍ ഓണ്‍ലൈന്‍ സര്‍ട്ടിഫിക്കറ്റ് കോഴ്സുകള്‍ ആരംഭിച്ചു. ഉന്നത വിദ്യാഭ്യാസത്തിനും തൊഴിലിനും മികച്ച തിരഞ്ഞെടുപ്പ് നടത്താന്‍ വിദ്യാര്‍ത്ഥികളെ സഹായിക്കുന്നതിന് ആരംഭിച്ച 'ഐഐടിഎം സ്‌കൂള്‍ കണക്റ്റ്' പ്രോഗ്രാമിന്റെ ഭാഗമായാണ് ഇത്. ഐഐടി മദ്രാസ് പ്രൊഫസര്‍മാരാണ് സ്‌കൂള്‍ വിദ്യാര്‍ത്ഥികള്‍ക്കായുള്ള ഈ കോഴ്സുകള്‍ പ്രത്യേകം തയ്യാറാക്കിയത്. ഓണ്‍ലൈനായി പഠിപ്പിക്കുന്ന കോഴ്സുകള്‍ XI, XII ക്ലാസുകളിലെ വിദ്യാര്‍ത്ഥികള്‍ക്ക് ഈ മേഖലയെക്കുറിച്ച് അറിവ് നല്‍കാനും, ഉന്നത വിദ്യാഭ്യാസത്തെയും കരിയര്‍ പാതകളെയും കുറിച്ച് തീരുമാനങ്ങള്‍ എടുക്കാനും സഹായിക്കും.
ഒക്ടോബര്‍ 21-ന് ആരംഭിക്കുന്ന ബാച്ചിന്റെ രജിസ്ട്രേഷന്‍ ഇതിനകം ആരംഭിച്ചു. താല്‍പ്പര്യമുള്ള സ്‌കൂളുകള്‍ക്ക് https://school-connect.study.iitm.ac.in/ ലിങ്കിലൂടെ രജിസ്റ്റര്‍ ചെയ്യാവുന്നതാണ്. എട്ട് ആഴ്ച്ച ദൈര്‍ഘ്യം വരുന്ന കോഴ്സുകള്‍ക്ക് ഇതിനകം തന്നെ ഇന്ത്യയിലെ 500ല്‍ പരം സ്‌കൂളുകള്‍ താല്‍പ്പര്യം പ്രകടമാക്കിയിട്ടുണ്ട്. ഇതുവഴി, 11000 വിദ്യാര്‍ത്ഥികള്‍ ഇതിനകം ആദ്യ ബാച്ചില്‍ ചേര്‍ന്നു. പങ്കാളികളാകുന്ന സ്‌കൂളുകളിലെ XI, XII ക്ലാസുകളിലെ എല്ലാ വിദ്യാര്‍ത്ഥികള്‍ക്കും ഈ സര്‍ട്ടിഫിക്കേഷന്‍ പ്രോഗ്രാമുകളില്‍ ചേരാവുന്നതാണ്.
