കേരള സ്‌ക്രാപ്പ് മെര്‍ച്ചന്റ്‌റ്‌സ് അസോസിയേഷന്‍ നിയമസഭാ മാര്‍ച്ച് സംഘടിപ്പിച്ചു
തിരുവനന്തപുരം, ഒക്ടോബര്‍ 8 , 2025: തൊഴില്‍ സംരക്ഷണം ഉറപ്പാക്കുക, പാഴ് വസ്തുക്കളെ നികുതിയില്‍ നിന്നും പൂര്‍ണമായും ഒഴിവാക്കുക തുടങ്ങി വിവിധ ആവശ്യങ്ങള്‍ ഉന്നയിച്ച് സംസ്ഥാനത്തെ ഖര മാലിന്യ നിര്‍മ്മാര്‍ജ്ജന പ്രക്രിയയില്‍ മുഖ്യ പങ്കാളിത്തം വഹിക്കുന്നവരുടെ സംഘടനയായ കേരളാ സ്‌ക്രാപ്പ് മെര്‍ച്ചന്റ്‌സ് അസോസിയേഷന്‍ ( കെ എസ് എം എ), ഇന്ന്, ഒക്ടോബര്‍ 8ന്, നിയമസഭാ മാര്‍ച്ച് സംഘടിപ്പിച്ചു. പാഴ്വസ്തു ശേഖരണവും സംസ്‌കരണവും സാധ്യമാക്കുന്ന മേഖലയുടെ നിലനില്‍പ്പിന് ആവശ്യമായ അവകാശങ്ങള്‍ സര്‍ക്കാരിന്റെ ശ്രദ്ധയില്‍പ്പെടുത്തുന്നതിനായാണ് മാര്‍ച്ച് സംഘടിപ്പിച്ചത്.
ബുധനാഴ്ച രാവിലെ 10 മണിക്ക് തിരുവനന്തപുരം പുത്തരിക്കണ്ടം മൈതാനത്തു നിന്നും ആരംഭിച്ച തൊഴില്‍ സംരക്ഷണ റാലി സംസ്ഥാന പ്രസിഡന്റ് മുഹമ്മദ് ആസിഫ് ഉദ്ഘാടനം ചെയ്തു. അവകാശ സംരക്ഷണ പോരാട്ട പ്രഖ്യാപനം സംസ്ഥാന സെക്രട്ടറി കെ പി എ ഷെരീഫ് നിര്‍വഹിച്ചു. തിരുവനന്തപുരം ജില്ലയിലെ മുഴുവന്‍ പ്രവര്‍ത്തകരും മറ്റു 13 ജില്ലകളില്‍ നിന്നും തെരഞ്ഞെടുക്കപ്പെട്ട പ്രവര്‍ത്തകരും ഉള്‍പ്പെടെ 10000 ത്തോളം പേര്‍ പങ്കെടുത്തു.
സ്‌ക്രാപ്പ് ശേഖരിക്കുന്നവര്‍ മുതല്‍ കമ്പനികള്‍ നടത്തുന്നവര്‍ ഉള്‍പ്പടെ ഏകദേശം മൂന്നു ലക്ഷത്തോളം ഈ മേഖലയില്‍ പ്രവര്‍ത്തിക്കുന്നുണ്ട്. സംസ്ഥാന, കേന്ദ്ര സര്‍ക്കാറുകള്‍ക്ക് കോടിക്കണക്കിനു രുപ നികുതിയിനത്തില്‍ നല്‍കുന്ന ഈ മേഖലയില്‍ പ്രവര്‍ത്തിക്കുന്ന ലക്ഷക്കണക്കിന് മനുഷ്യരുടെ അവകാശങ്ങളെ അവഗണിക്കുന്ന രീതിയില്‍ ഹരിത കര്‍മ സേനയും മലിനീകരണ നിയന്ത്രണ ബോര്‍ഡും ഉള്‍പ്പെടെയുള്ള സര്‍ക്കാര്‍ സംവിധാനങ്ങള്‍ ഈ മേഖലയിലേക്കു നടത്തുന്ന കടന്നു കയറ്റം അവസാനിപ്പിക്കണമെന്നും, ഈ മേഖലയില്‍ പ്രവര്‍ത്തിക്കുന്നവരുടെ പ്രയാസങ്ങള്‍ മുഖവിലക്കെടുത്ത് നാടിന്റെ മാലിന്യ നിര്‍മ്മാര്‍ജ്ജന പ്രക്രിയ നടപ്പിലാക്കണമെന്നും കെ എസ് എം എ സംസ്ഥാന പ്രസിഡന്റ് മുഹമ്മദ് ആസിഫ്, സംസ്ഥാന സെക്രട്ടറി കെ പി എ ഷെരീഫ് എന്നിവര്‍ ആവശ്യപ്പെട്ടു.
