പ്രതിധ്വനി ക്വിസ ഫിലിം ഫെസ്റ്റിവലിന്റെ പതിമൂന്നാമത് പതിപ്പിന്റെ ഫിലിം സ്‌ക്രീനിങ്ങും അവാര്‍ഡ്ദാന ചടങ്ങുകളും നാളെ ടെക്‌നോപാര്‍ക്കില്‍
പ്രതിധ്വനി ക്വിസ ഫിലിം ഫെസ്റ്റിവലിന്റെ പതിമൂന്നാമത് പതിപ്പിന്റെ (PQFF'24) ഫിലിം സ്‌ക്രീനിങ്ങും അവാര്‍ഡ്ദാന ചടങ്ങുകളും ജനുവരി 18ന് നടക്കും. ടെക്‌നൊപാര്‍ക്കിലെ ട്രാവന്‍കൂര്‍ ഹാളില്‍ രാവിലെ 8 മണി മുതല്‍ ആരംഭിക്കുന്ന ഫിലിം സ്‌ക്രീനിംഗ് വൈകിട്ട് 6 മണിക്ക് അവസാനിക്കും. പ്രശസ്ത ചലച്ചിത്ര എഡിറ്ററും ചലച്ചിത്ര അക്കാദമി മുന്‍ വൈസ് ചെയര്‍പേഴ്‌സനുമായിരുന്ന ബീന പോളാണ് ജൂറി ചെയര്‍പേഴ്‌സണ്‍. പ്രശസ്ത ചലച്ചിത്ര നടനും ഡബ്ബിങ് ആര്‍ട്ടിസ്റ്റുമായ പ്രൊഫ്. അലിയാര്‍, പ്രശസ്ത ചലച്ചിത്ര സംവിധായകന്‍ പ്രശാന്ത് വിജയ് തുടങ്ങിയവരാണ് മറ്റ് ജൂറി അംഗങ്ങള്‍. ഐ ടി ജീവനക്കാര്‍ സംവിധാനം ചെയ്ത 32 ഷോര്‍ട്ട് ഫിലിമുകളാണ് ഈ വര്‍ഷം ഫിലിം ഫെസ്റ്റിവലില്‍ മത്സരിക്കുന്നത്.
വൈകിട്ട് 7 മണിക്ക് നടക്കുന്ന അവാര്‍ഡ് ദാന ചടങ്ങ് പ്രശസ്ത കലാകാരന്‍ ശ്രീ സൂര്യ കൃഷ്ണമൂര്‍ത്തി ഉദ്ഘാടനം നിര്‍വഹിക്കുന്നു. സ്‌പെഷ്യല്‍ ഡോക്യൂമെന്ററി 'ഞാനും..' അന്നേ ദിവസം അവാര്‍ഡ് ദാന ചടങ്ങിന് തൊട്ടുമുന്‍പായി പ്രദര്‍ശിപ്പിക്കും.
കഴിഞ്ഞ 9 ദിവസങ്ങളിലായി വൈവിധ്യമാര്‍ന്ന ചലച്ചിത്ര സംബന്ധിയായ പരിപാടികള്‍ കൊണ്ട് സമ്പന്നമായിരുന്നു PQFF'24. ചലച്ചിത്ര അക്കാദമിയുമായി സഹകരിച്ച് 3 ചലച്ചിത്രങ്ങള്‍ (കമ്മട്ടിപാടം, നിര്‍മ്മാല്യം , The lunch box) KSFDC യുമായി സഹകരിച്ച് 2 ചലച്ചിത്രങ്ങള്‍ (ചുരുള്‍ , B32 to44) SiGNS ഫെസ്റ്റിവലില്‍ നിന്ന് അവാര്‍ഡ് നേടിയ ഹ്രസ്വ ചിത്രങ്ങള്‍ , ഡോക്യൂമെന്ററികള്‍ എന്നിവയുടെയൊക്കെ പ്രദര്‍ശനങ്ങള്‍ കൂടാതെ, ഫോട്ടോഗ്രാഫി, ആക്ടിങ്, അനിമേഷന്‍ എന്നിവയില്‍ വര്‍ക്ക്ഷോപ്പുകള്‍, ചലച്ചിത്ര ഗാനസന്ധ്യ, മിമിക്രി, സ്റ്റാന്‍ഡ് അപ്പ് കോമെഡി, ഫിലിം ക്വിസ് തുടങ്ങിയ പരിപാടികള്‍ ജനുവരി 6 മുതല്‍ ജനുവരി 16 വരെ ടെക്‌നൊപ്പാര്‍ക്കിലും ഇന്‍ഫോപ്പാര്‍ക്കിലുമായി നടന്നു.
ഏറ്റവും മികച്ച ഹ്രസ്വചിത്രത്തിന് 20,000/- രൂപയുടെ ക്യാഷ് പ്രൈസും രണ്ടാമത്തെ മികച്ച ചിത്രം, മികച്ച സംവിധായകന്‍, മികച്ച തിരക്കഥാകൃത്ത് എന്നിവയ്ക്ക് 10,000/- രൂപയുടെ ക്യാഷ് പ്രൈസും ഉണ്ടായിരിക്കുന്നതാണ്. കൂടാതെ മികച്ച നടന്‍, നടി, ഛായാഗ്രാഹകന്‍, എഡിറ്റര്‍ എന്നിവര്‍ക്കും പ്രത്യേക പുരസ്‌കാരങ്ങളുണ്ടാവും.
ഐ ടി ജീവനക്കാര്‍ സംവിധാനം ചെയ്ത 375 ല്‍ പരം ഹ്രസ്വ ചിത്രങ്ങള്‍ മുന്‍വര്‍ഷങ്ങളിലായി മാറ്റുരയ്ക്കപ്പെട്ടിട്ടുള്ള ''പ്രതിധ്വനി ക്വിസ ഫിലിം ഫെസ്റ്റിവല്‍'' ഐ ടി മേഖലയില്‍ നടക്കുന്ന ഏക ഫിലിം festivalപ്രശസ്ത ചലച്ചിത്ര പ്രതിഭകളായ ഷാജി എന്‍ കരുണ്‍, വിനീത് ശ്രീനിവാസന്‍, അടൂര്‍ ഗോപാലകൃഷ്ണന്‍, ശ്യാമപ്രസാദ് , ജയരാജ് , ദിലീഷ് പോത്തന്‍, അമല്‍ നീരദ്, ഖാലിദ് റഹ്മാന്‍,വിധു വിന്‍സെന്റ്, ജിയോ ബേബി , MF തോമസ്, TK രാജീവ് കുമാര്‍ തുടങ്ങിയവരാണ് 2012 മുതല്‍ നടന്നുവരുന്ന പ്രതിധ്വനി ക്വിസ ഫിലിം ഫെസ്റ്റിവലില്‍ മുഖ്യ അതിഥികളായി എത്തിയത്.
ഏവരെയും ടെക്‌നോപാര്‍ക്ക് ട്രാവന്‍കൂര്‍ ഹാളിലേക്ക് പ്രതിധ്വനി സ്വാഗതം ചെയ്യുന്നു. ..
