വഖ്ഫ് ഭേദഗതി: പ്രതിഷേധത്തിന് നേരെ പോലീസ് നടത്തിയ ആക്രമണം പ്രതിഷേധാര്‍ഹം: വെല്‍ഫെയര്‍ പാര്‍ട്ടി
തിരുവനന്തപുരം: വഖഫ് ഭേദഗതി നിയമം പിന്‍വലിക്കണം എന്നാവശ്യപ്പെട്ട് മലപ്പുറത്ത് വെല്‍ഫെയര്‍ പാര്‍ട്ടിയും ഫ്രറ്റേണിറ്റിയും സംഘടിപ്പിച്ച റോഡ് ഉപരോധത്തിനു നേരെ അതിക്രമം നടത്തി ജില്ലാ പ്രസിഡന്റ് കെ. വി സഫീര്‍ഷായെയും മറ്റു നേതാക്കളെയും അറസ്റ്റ് ചെയ്ത പോലീസ് നടപടി പ്രതിഷേധാര്‍ഹമാണെന്ന് വെല്‍ഫെയര്‍ പാര്‍ട്ടി സംസ്ഥാന പ്രസിഡണ്ട് റസാഖ് പാലേരി. സംഘപരിവാറിനെതിരെ സംസ്ഥാനത്ത് നടക്കുന്ന പ്രതിഷേധങ്ങളോട് കേരള പോലീസ് സ്വീകരിക്കുന്ന സമീപനം പോലീസിലെ സംഘ്പരിവാര്‍ സ്വാധീനം വ്യക്തമാക്കുന്ന കാര്യമാണ്.
പാര്‍ലമെന്റിലും നിയമസഭയിലും വഖ്ഫ് ബില്ലിനെ ശക്തമായി പ്രതിരോധിക്കുമെന്ന് പറഞ്ഞ ഇടതുപക്ഷ സര്‍ക്കാര്‍ കേന്ദ്ര ഭരണകൂടത്തിന്റെ അന്യായ നിയമ ഭേദഗതിക്കെതിരെ ജനാധിപത്യപരമായി നടക്കുന്ന സമരങ്ങളെ തല്ലി ഒതുക്കാന്‍ ശ്രമിക്കുന്നതിന്റെ ന്യായം എന്താണെന്ന് വ്യക്തമാക്കണം.
അതേ സമയം വഖ്ഫ് ഭേദഗതി ബില്‍ മുന്‍നിര്‍ത്തി സംസ്ഥാനത്ത് സാമൂഹിക ധ്രുവീകരണവും വംശീയ കലാപവും സൃഷ്ടിക്കാനുള്ള ബിജെപിയുടെ ആസൂത്രിത ശ്രമങ്ങളെ കേരള പോലീസ് നിസ്സംഗമായി നോക്കി നില്‍ക്കുകയാണ്. ഇടതുപക്ഷ നിലപാട് ആത്മാര്‍ത്ഥമാണെങ്കില്‍ പോലീസ് സ്വീകരിക്കുന്ന ഇരട്ടത്താപ്പ് അവസാനിപ്പിക്കുകയും സമര പ്രവര്‍ത്തകരെ അന്യായമായി കയ്യേറ്റം ചെയ്ത പോലീസ് ഉദ്യോഗസ്ഥര്‍ക്കെതിരെ നടപടി സ്വീകരിക്കുകയും വേണമെന്ന് അദ്ദേഹം പറഞ്ഞു.
