സാമുദായിക സൗഹാര്‍ദ്ദത്തിന് ആഹ്വാനം ചെയ്തത് കൊണ്ട് സാഹോദര്യ കേരള പദയാത്രയുടെ തലസ്ഥാന ജില്ലയിലെ പര്യടനം പൂര്‍ത്തിയായി
തിരുവനന്തപുരം: ഇന്ത്യയിലെ ബഹുസ്വരതയും സാംസ്‌കാരിക വൈവിധ്യവും ന്യൂനപക്ഷാവകാശങ്ങളും രാജ്യത്ത് ഭരണഘടന ഉറപ്പുനല്‍കുന്നതാണ്. അവയെ അട്ടിമറിക്കാനാണ് പാര്‍ലമെന്ററി ഭൂരിപക്ഷത്തിലൂടെ പുതിയ നിയമങ്ങള്‍ കേന്ദ്രസര്‍ക്കാര്‍ ചുട്ടെടുക്കുന്നത്. വഖ്ഫ് ഭേദഗതിയടക്കമുള്ള ഇത്തരം നിയനിര്‍മാണത്തിലെ ഭരണഘടന ലംഘനങ്ങളാണ് സുപ്രിംകോടതി കണ്ടെത്തിയിരിക്കുന്നത്. തങ്ങളുടെ അജണ്ടകള്‍ക്ക് സുപ്രിം കോടതിയാണ് തടസമെങ്കില്‍ രാജ്യത്തെ ജുഡീഷ്വറി സംവിധാനത്തെ അംഗീകരിക്കാന്‍ തയ്യാറല്ലായെന്ന സംഘപരിവാറിന്റെ ധിക്കാരവും ധാര്‍ഷ്ട്യവുമാണിപ്പോഴവര്‍ പരസ്യമായി പ്രകടപ്പിക്കുന്നത്. ഉപരാഷ്ട്രപതിക്ക് പിറകെ ബി.ജെ.പി നേതാക്കള്‍ സുപ്രിം കോടതിക്കെതിരെ നടത്തുന്ന കടന്നാക്രമണത്തിനെതിരെ കോടതിയലക്ഷ്യ നടപടി സ്വീകരിക്കണമെന്നും വെല്‍ഫെയര്‍ പാര്‍ട്ടി സംസ്ഥാന പ്രസിഡന്റ് റസാഖ് പാലേരി ആവശ്യപ്പെട്ടു. പദയാത്രയോടനുബന്ധിച്ച് വാമനപുരം മണ്ഡലത്തിലെ പാങ്ങോട് പഞ്ചായത്തില്‍ നല്‍കിയ സ്വീകരണ പൊതുസമ്മേളനത്തില്‍ സംസാരിക്കുകയായിരുന്നു അദ്ദേഹം.
മുതലപ്പൊഴി ഹാര്‍ബര്‍ സ്തംഭിപ്പിച്ച് അവിടത്തെ പതിനായിരക്കണക്കിന് മത്സബന്ധന കുടുംബങ്ങളെ പട്ടിണിയിലാക്കുന്ന സംസ്ഥാന സര്‍ക്കാര്‍ നയത്തെയും അദ്ദേഹം വിമര്‍ശിച്ചു. മുതലപ്പൊഴി ഹാര്‍ബറിന്റെ സുഗമമായ പ്രവര്‍ത്തനത്തിനുള്ള തടസ്സങ്ങള്‍ അടിയന്തരമായി പരിഹരിക്കുന്നതിന് പകരം മറ്റൊരു ഹാര്‍ബറിലേക്ക് മത്സ്യബന്ധനമടക്കമുള്ളവ മാറ്റുന്നത് പ്രദേശത്തെ ദുരിതം വര്‍ധിപ്പിക്കുകയേ ഉള്ളൂ. പ്രശ്‌നങ്ങള്‍ രൂക്ഷമാവുമ്പോള്‍ സര്‍ക്കാര്‍ നടത്തുന്ന താല്‍ക്കാലിക പരിഹാര ശ്രമങ്ങള്‍ മാത്രമാണ് എന്നും മുതലപ്പൊഴിയില്‍ നടക്കാറുള്ളത്. ഇതിന് പകരം മത്സ്യത്തൊഴിലാളികള്‍ ആവശ്യപ്പെടുംപ്രകാരം ആഴത്തില്‍ പൂഴി നീക്കി വലിയ ബോട്ടുകള്‍ക്കടക്കം മത്സ്യബന്ധനം നടത്താനുള്ള സ്ഥിരം സംവിധാനമവിടെ ഉണ്ടാക്കണമെന്നും വെല്‍ഫെയര്‍ പാര്‍ട്ടി സംസ്ഥാന പ്രസിഡന്റ് റസാഖ് പാലേരി ആവശ്യപ്പെട്ടു.
ഏപ്രില്‍ 19 ശനിയാഴ്ച തലസ്ഥാന നഗരിയില്‍ നിന്നും ആരംഭിച്ചു പദയാത്ര ചിറയിന്‍കീഴ് മണ്ഡലത്തിലെ പെരുമാതുറയില്‍ പദയാത്ര പര്യടനം നടത്തിയാണ് പാങ്ങോട് പഞ്ചായത്തില്‍ എത്തിചേര്‍ന്നത്. ഭരതന്നൂരില്‍ നിന്നും പാങ്ങോട് ജംഗ്ഷനിലേക്ക് നടന്ന പദയാത്രയില്‍ വാമനപുരം മണ്ഡലത്തിലെ ആയിരത്തോളം പ്രവര്‍ത്തകര്‍ പങ്കെടുത്തു. പാങ്ങോട് ജംഗ്ഷനില്‍ നടന്ന പൊതുസമ്മേളനത്തില്‍ സംസ്ഥാന സെക്രട്ടറി പ്രേമ ജി പിഷാരടി, സംസ്ഥാന കമ്മിറ്റി അംഗം കെ.എസ് നിസാര്‍ തുടങ്ങിയവര്‍ സംസാരിച്ചു. വിവിധ ബഹുജന സംഘടന പ്രതിനിധകള്‍, വെല്‍ഫെയര്‍ പാര്‍ട്ടി മണ്ഡലം - പഞ്ചായത്ത് - യൂണിറ്റ് ഭാരവാഹികള്‍ തുടങ്ങിയവര്‍ റസാഖ് പാലേരിക്ക് ഹാരാര്‍പ്പണം നടത്തി. മണ്ഡലം സെക്രട്ടറി ഷാനവാസ് സ്വാഗതവും പഞ്ചായത്ത് വൈസ് പ്രസിഡന്റ് റജീന നന്ദിയും പറഞ്ഞു.
