സാഹോദര്യ കേരള പദയാത്രക്ക്ത ലസ്ഥാനനഗരിയില്‍ ആവേശോജ്ജ്വല തുടക്കം
തിരുവനന്തപുരം: വെറുപ്പും വിദ്വേഷവും പ്രചരിപ്പിച്ച് സാമൂഹിക ധ്രുവീകരണം സൃഷ്ടിച്ച് അധികാരമുറപ്പിക്കുന്ന സംഘപരിവാര്‍ വംശീയതയെ സഹോദര്യ രാഷ്ട്രീയം കൊണ്ടേ ചെറുക്കാനാവൂ എന്ന് വെല്‍ഫെയര്‍ പാര്‍ട്ടി സംസ്ഥാന പ്രസിഡന്റ് റസാഖ് പാലേരി അഭിപ്രായപ്പെട്ടു. 'നാടിന്റെ നന്മയ്ക്ക് നമ്മളൊന്നാകണം' എന്ന തലക്കെട്ടില്‍ തിരുവനന്തപുരം മുതല്‍ കാസര്‍കോട് വരെ മുഴുവന്‍ ജില്ലകളിലൂടെയും കടന്നുപോകുന്ന സാഹോദര്യ കേരള പദയാത്രക്ക് തിരുവനന്തപുരത്ത് തുടക്കം കുറിച്ചു കൊണ്ട് സംസാരിക്കുകയായിരുന്നു അദ്ദേഹം.
സംഘ്പരിവാര്‍ ഇന്ത്യന്‍ ഭരണഘടന ഉറപ്പു നല്‍കുന്ന സമത്വവും സാമൂഹ്യനീതിയും അട്ടിമറിക്കുകയാണ്. രാജ്യ ശില്പികള്‍ വിഭാവനം ചെയ്ത ബഹുസ്വരതയും സാംസ്‌കാരിക വൈവിധ്യവും നിലനില്‍ക്കുന്ന ഇന്ത്യയെ തകര്‍ക്കുകയാണ് ഹിന്ദുത്വ ഫാഷിസ്റ്റുകളുടെ ലക്ഷ്യം. സമുദായങ്ങള്‍ക്കിടയില്‍ ഭിന്നതയും അനൈക്യവും സൃഷ്ടിച്ചാണ് ഫാഷിസം ഇന്ത്യയെന്ന ആശയത്തെ അട്ടിമറിക്കുന്നത്. മതജാതിഭേദമന്വേ സാഹോദര്യമെന്ന രാഷ്ട്രീയ മുദ്രാവാക്യവും സാമൂഹ്യ നീതിയെന്ന ലക്ഷ്യവും ഇന്ത്യന്‍ ജനത ഏറ്റെടുത്താലേ ഈ ധ്രുവീകരണ രാഷ്ട്രീയത്തെ മറികടുക്കാനാവു എന്നും അദ്ദേഹം പറഞ്ഞു.
ആയിരങ്ങളുടെ സാന്നിധ്യത്തില്‍ ശനിയാഴ്ച വൈകീട്ട് നാലിന് കിഴക്കേകോട്ടയിലെ പുത്തരിക്കണ്ടം മൈതാനിയില്‍ നിന്ന് ആരംഭിച്ച സാഹോദര്യ കേരള പദയാത്രക്ക് സമൂഹത്തിന്റെ വിവിധ തുറകളിലുള്ളവര്‍ നല്‍കിയ സ്വീകരണം ആവേശോജ്ജ്വലമായിരുന്നു. തലസ്ഥാന നഗരിയിലെ വികസനത്തില്‍ കടുത്ത വിവേചനം നേരിടുന്ന കരിമഠം നിവാസികള്‍ നല്‍കിയ സ്വീകരണം ഏറെ ശ്രദ്ധേയമായിരുന്നു. നഗരത്തിലെ ഓട്ടോ തൊഴിലാളികള്‍, കുഞ്ഞുങ്ങള്‍, വ്യാപാരികള്‍ ഉള്‍പ്പെടെയള്ളവരും സ്വീകരണം നല്‍കി. വലിയ ജനക്കൂട്ടത്തിന്റെ അകമ്പടിയോടെ നടന്ന പദയാത്ര നാലു കിലോമീറ്റര്‍ പിന്നിട്ട് പരവന്‍കുന്നില്‍ സമാപിച്ചു.
പരവന്‍കുന്നില്‍ നടന്ന പൊതുസമ്മേളനം ദേശീയ വൈസ് പ്രസിഡന്റ് ഹമീദ് വാണിയമ്പലം ഉദ്ഘാടനം ചെയ്തു. സംസ്ഥാന ജനറല്‍ സെക്രട്ടറി സുരേന്ദ്രന്‍ കരിപ്പുഴ അധ്യക്ഷത വഹിച്ചു. കൂടംകുളം ആണവ വിരുദ്ധ സമര നേതാവ് എസ്.പി. ഉദയകുമാര്‍ സാഹോദര്യ കേരള പദയാത്ര പതാക കൈമാറി. സംസ്ഥാന വൈസ് പ്രസിഡന്റ് കെ.എ. ഷഫീക്ക് മുഖ്യ പ്രഭാഷണം നടത്തി. സംസ്ഥാന സെക്രട്ടറി പ്രേമ ജി. പിഷാരടി, എഫ്. ഐ. ടി. യു സംസ്ഥാന പ്രസിഡന്റ് ജ്യോതിവാസ് പറവൂര്‍, വിമന്‍ ജസ്റ്റിസ് മൂവ്‌മെന്റ് സംസ്ഥാന പ്രസിഡന്റ് ഫായിസ കരുവാരക്കുണ്ട്, ഫ്രറ്റേണിറ്റി മൂവ്‌മെന്റ് സംസ്ഥാന പ്രസിഡന്റ് നഈം ഗഫൂര്‍, പ്രവാസി വെല്‍ഫെയര്‍ ഫോറം സംസ്ഥാന പ്രസിഡന്റ് അസ്‌ലം ചെറുവാടി, അസെറ്റ് ചെയര്‍മാന്‍ എസ്. ഖമറുദ്ദീന്‍ എന്നിവര്‍ സംസാരിച്ചു.
വിവിധ ബഹുജന സംഘടന പ്രതിനിധകള്‍, വെല്‍ഫെയര്‍ പാര്‍ട്ടി ജില്ലാ - മണ്ഡലം ഭാരവാഹികള്‍ തുടങ്ങിയവര്‍ റസാഖ് പാലേരിക്ക് ഹാരാര്‍പ്പണം നടത്തി. സംസ്ഥാന ജനറല്‍ സെക്രട്ടറി എസ്. ഇര്‍ഷാദ് സ്വാഗതവും ജില്ല പ്രസിഡന്റ് നന്ദിയും പറഞ്ഞു. തിങ്കളാഴ്ച ചിറയിന്‍കീഴ്, വാമനപുരം മണ്ഡലങ്ങളില്‍ റസാഖ് പാലേരിയുടെ പദയാത്ര സംഘടിപ്പിക്കും.
