തദ്ദേശ തെരഞ്ഞെടുപ്പ്: വെല്‍ഫെയര്‍ പാര്‍ട്ടി പ്രചാരണ ക്യാമ്പയിന്‍ ടാഗ് ലൈന്‍ 'വേണം വെല്‍ഫെയര്‍' പ്രകാശനം ചെയ്തു
തിരുവനന്തപുരം: തദ്ദേശ തെരഞ്ഞെടുപ്പിലെ വെല്‍ഫെയര്‍ പാര്‍ട്ടിയുടെ പ്രചരണ ക്യാമ്പയിന്റെ പ്രധാന ടാഗ് ലൈനായ 'വേണം വെല്‍ഫെയര്‍' ഔദ്യോഗികമായി റിലീസ് ചെയ്തു. കോഴിക്കോട് കൊടിയത്തൂരില്‍ ജനസഭ എന്ന തലക്കെട്ടില്‍ നടന്ന തദ്ദേശ സ്ഥാപനങ്ങളിലെ ജനപ്രതിനിധികളുടെ സംഗമത്തില്‍ വെച്ച് സംസ്ഥാന പ്രസിഡന്റ് റസാഖ് പാലേരിയാണ് ടാഗ് ലൈന്‍ പ്രകാശനം നിര്‍വഹിച്ചത്. പ്രകാശന ചടങ്ങില്‍ സംസ്ഥാന ജനറല്‍ സെക്രട്ടറി സുരേന്ദ്രന്‍ കരിപ്പുഴ, സംസ്ഥാന വൈസ് പ്രസിഡണ്ട് കെ. എ ഷഫീഖ് എന്നിവര്‍ പങ്കെടുത്തു.
തദ്ദേശ അധികാര കേന്ദ്രങ്ങളില്‍ സാമൂഹ്യനീതിയും സാഹോദര്യവും മുന്‍നിര്‍ത്തിയുള്ള വാര്‍ഡിന്റെ വികസന കാഴ്ചപ്പാടുകളും പദ്ധതികളും ഊന്നിപ്പറയുകയാണ് 'വേണം വെല്‍ഫെയര്‍' ക്യാമ്പയിന്റെ ലക്ഷ്യം. വെല്‍ഫെയര്‍ പാര്‍ട്ടിയുടെ സ്ഥാനാര്‍ത്ഥികളായി തദ്ദേശ സ്ഥാപനങ്ങളിലേക്ക് മത്സരിക്കുന്ന സംസ്ഥാനത്തെ മുഴുവന്‍ സ്ഥാനാര്‍ത്ഥികളുടെയും ക്യാമ്പയിന്‍ മുഖവാചകം ഇതായിരിക്കുമെന്ന് പാര്‍ട്ടി സംസ്ഥാന ഇലക്ഷന്‍ കമ്മിറ്റി ജനറല്‍ കണ്‍വീനര്‍ കെ. എ ഷഫീഖ് പറഞ്ഞു. ജനങ്ങളുടെ സാമൂഹ്യ ജീവിതത്തിന്റെ അടിസ്ഥാന ഘടകങ്ങളായ തുല്യത, നീതിപൂര്‍മായ വിഭവ വിതരണം, അധികാര പങ്കാളിത്തം, യുവജന - വിദ്യാര്‍ത്ഥി സൗഹൃദ വാര്‍ഡ് തുടങ്ങിയ വിഷയങ്ങള്‍ മുന്‍നിര്‍ത്തിയുള്ള ക്യാമ്പയിന്‍ പ്രവര്‍ത്തനങ്ങള്‍ക്കാണ് പാര്‍ട്ടി നേതൃത്വം നല്‍കുകയെന്ന് അദ്ദേഹം പറഞ്ഞു.
