കോട്ടയത്തു നിന്നുള്ള ഡോ. ആലീസ് മാത്യു, ഡിസംബര്‍ 21, 2025 ന് ജയ്പൂരില്‍, 'മിസിസ് ഇന്ത്യ.നെറ്റ്' നടത്തിയ പാജന്റില്‍,'മിസിസ് ഇന്ത്യ 2025 (സൂപ്പര്‍ ക്ലാസിക്)' കിരീടം നേടി.

മിസിസ് ഇന്ത്യ.നെറ്റ്'എന്ന പ്ലാറ്റ്‌ഫോം, വിവാഹിതരായ സ്ത്രീകള്‍ക്ക് അവരുടെ സൗന്ദര്യം, കഴിവ്, അഭിനിവേശം എന്നിവ പ്രദര്‍ശിപ്പിക്കുന്നതിനുള്ള ഒരു വേദിയാണ്. മിസ്സിസ് ദീപാലി ഫഡ്നിസ്, 'മിസ്സിസ് ഇന്‍ഡ്യാ.നെറ്റിന്റെ സ്ഥാപകയും ഡയറക്ടറുമാണ്. അവര്‍ വിശ്വസിക്കുന്നത്, എല്ലാ സ്ത്രീകളും സുന്ദരികളാണെന്നാണ്. അവര്‍ പറയുന്നു, പ്രായമോ, വലുപ്പമോ, ആകൃതിയോ, ഉയരമോ, അല്ലെങ്കില്‍ തൂക്കമോ കണക്കിലെടുക്കാതെ ഏല്ലാ സ്ത്രീകളും സുന്ദരിമാരാണ്.

ഡിസംബര്‍ 18 മുതല്‍ 21 വരെ നാല് ദിവസത്തേക്ക് മിസിസ് ഇന്ത്യ 2025 മത്സരങ്ങള്‍ നടത്തി. വിജയിയെ തിരഞ്ഞെടുക്കാന്‍ നിരവധി റൗണ്ടുകള്‍ ഉണ്ടായിരുന്നു. മിസിസ് ഇന്ത്യ 2025 ഗ്രാന്‍ഡ് ഫിനാലെ ഡിസംബര്‍ 21 ന് ജയ്പൂരിലെ ജയ്ബാഗ് പാലസില്‍ അരങ്ങേറി.

ഡോ. ആലീസ് മാത്യു, അമേരിക്കയിലെ യൂണിവേഴ്‌സിറ്റി ഓഫ് നെവാഡാ, ലാസ് വെഗാസില്‍ നിന്നും വിരമിച്ച പ്രൊഫസറാണ്, ഇപ്പോള്‍ ഭര്‍ത്താവ് ഡോ. മാത്യു ജോയിസ് (മാടപ്പാട്ട്)നോടൊപ്പം കോട്ടയം കല്ലറയിലെ സെന്റ് മാത്യൂസ് ഹോമില്‍ താമസിക്കുന്നു. ഡോ. ആലീസ് മാത്യു ഒരു മോട്ടിവേഷണല്‍ സ്പീക്കറും പ്രത്യേകിച്ച് പ്രായമായ സ്ത്രീകളെ അവരുടെ ജീവിതകാലം മുഴുവന്‍ സന്തോഷത്തോടെ ജീവിക്കാന്‍ പ്രേരിപ്പിക്കുന്ന ഒരു യൂ ട്യൂബ് ബ്ലോഗര്‍ കൂടിയാണ്.

ഡോ. ആലീസ് മാത്യു തന്റെ 71 മത്തെ വയസ്സിലാണ് ഈ അതിശയിപ്പിക്കുന്ന നേട്ടം കൈവരിച്ചതെന്നതാണ് ഇവിടെ ഏറ്റവും ശ്രധേയമായത്. ഡോ. ആലീസ് മാത്യു വളരെ സ്ട്രോങും ധീരയും, ആത്മവിശ്വാസവും, ഉത്സാഹഭരിതയുമായ സ്ത്രീയാണ്. അവരുടെ ധൈര്യവും ആത്മവിശ്വാസവും കാരണം, മിസിസ് ഇന്ത്യ മത്സരത്തിനായി 40 മത്സരാര്‍ത്ഥികളുമായി അവര്‍ മത്സരിക്കുകയും 'മിസിസ് ഇന്ത്യ 2025 (സൂപ്പര്‍ ക്ലാസിക്)' എന്ന കിരീടം നേടുകയും ചെയ്തു. ഇത് ഒരു അത്ഭുതകരമായ വിജയമാണ്, ഈ വിജയം എല്ലാ പ്രായത്തിലുമുള്ള സ്ത്രീകള്‍ക്ക് പ്രചോദനമാകും. പ്രായം ഒരു സംഖ്യ മാത്രമാണെന്ന് അവര്‍ തെളിയിച്ചു.

സ്വന്തം ലേഖകൻ