അഞ്ച് വിക്കറ്റ് വീഴ്ത്തി അബ്ദുള്‍ ബാസിദ് കളിയിലെ താരമായി
വിജയത്തുടക്കത്തിന് ട്രിവാണ്‍ഡ്രം റോയല്‍സ് കടപ്പെട്ടിരിക്കുന്നത് ക്യാപ്റ്റന്‍ അബ്ദുള്‍ ബാസിദിനോടാണ്. ആദ്യ മല്‌സരത്തില്‍ തന്നെ അഞ്ച് വിക്കറ്റ് നേട്ടവും നിര്‍ണ്ണായക റണ്‍സുകളുമായാണ് അബ്ദുള്‍ ബാസിദ് ടീമിന് വിജയം ഒരുക്കിയത്. നാല് ഓവറില്‍ 12 റണ്‍സ് മാത്രം വിട്ടു കൊടുത്താണ് അബ്ദുള്‍ ബാസിദ് അഞ്ച് വിക്കറ്റ് വീഴ്ത്തിയത്. 12 പന്തില്‍ നിന്ന് ഒരു ഫോറും ഒരു സിക്‌സും അടക്കം 18 റണ്‍സും. രണ്ടും റോയല്‍സിന്റെ വിജയത്തില്‍ നിര്‍ണ്ണായകമായി. ടോസ് നേടിയ ട്രിവാണ്‍ഡ്രം റോയല്‍സിന്റെ ക്യാപ്റ്റന്‍ എതിരാളികളായ കൊച്ചിയെ ബാറ്റ് ചെയ്യാന്‍ […]
വിജയത്തുടക്കത്തിന് ട്രിവാണ്‍ഡ്രം റോയല്‍സ് കടപ്പെട്ടിരിക്കുന്നത് ക്യാപ്റ്റന്‍ അബ്ദുള്‍ ബാസിദിനോടാണ്. ആദ്യ മല്‌സരത്തില്‍ തന്നെ അഞ്ച് വിക്കറ്റ് നേട്ടവും നിര്‍ണ്ണായക റണ്‍സുകളുമായാണ് അബ്ദുള്‍ ബാസിദ് ടീമിന് വിജയം ഒരുക്കിയത്. നാല് ഓവറില്‍ 12 റണ്‍സ് മാത്രം വിട്ടു കൊടുത്താണ് അബ്ദുള്‍ ബാസിദ് അഞ്ച് വിക്കറ്റ് വീഴ്ത്തിയത്. 12 പന്തില്‍ നിന്ന് ഒരു ഫോറും ഒരു സിക്‌സും അടക്കം 18 റണ്‍സും. രണ്ടും റോയല്‍സിന്റെ വിജയത്തില്‍ നിര്‍ണ്ണായകമായി.
ടോസ് നേടിയ ട്രിവാണ്‍ഡ്രം റോയല്‍സിന്റെ ക്യാപ്റ്റന്‍ എതിരാളികളായ കൊച്ചിയെ ബാറ്റ് ചെയ്യാന്‍ അയക്കുകയായിരുന്നു. ആദ്യ വിക്കറ്റ് തുടക്കത്തില്‍ തന്നെ നഷ്ടപ്പെട്ടെങ്കിലും കൊച്ചി ഭേദപ്പെട്ടൊരു സ്‌കോറിനായി അടിത്തറ ഇടുമ്പോഴാണ് അബ്ദുള്‍ ബാസിദ് ആദ്യ പ്രഹരം ഏല്പിച്ചത്. ഷോണ്‍ റോജറെ പുറത്താക്കി ആദ്യ വിക്കറ്റ്. ടൂര്‍ണ്ണമെന്റിലെ കൌമാര വിസ്മയം ജോബിന്‍ ജോബിയായിരുന്നു ബാസിദിന്റെ അടുത്ത ഇര. 34 പന്തില്‍ 48 റണ്‍സുമായി അര്‍ദ്ധ സെഞ്ച്വറിയിലേക്ക് ബാറ്റ് വീശുകയായിരുന്ന ജോബിനെ ബാസിദ്, അഖിലിന്റെ കൈകളിലെത്തിച്ചു. രണ്ട് വിക്കറ്റിന് 74 റണ്‍സെന്ന നിലയിലായിരുന്ന കൊച്ചിയുടെ തകര്‍ച്ച തുടങ്ങിയത് ഇവിടെ നിന്നായിരുന്നു.
രഞ്ജി ട്രോഫി താരവും ഓള്‍റൌണ്ടറുമായ സിജോമോന്‍ ജോസഫ്, ഇന്ത്യന്‍ അണ്ടര്‍ 19 ടീമിലേക്ക് തെരഞ്ഞെടുക്കപ്പെട്ട മൊഹമ്മദ് എനാന്‍, ഉണ്ണികൃഷ്ണന്‍ എന്നിവരായിരുന്നു ബാസിദിന്റെ അടുത്ത ഇരകള്‍. ഇതോടെ കേരള ക്രിക്കറ്റ് ലീഗിലെ ആദ്യ അഞ്ച് വിക്കറ്റ് നേട്ടവും അബ്ദുള്‍ ബാസിദിന്റെ പേരിലായി. മല്‌സരത്തില്‍ കൊച്ചി പിടിമുറുക്കുന്നു എന്ന് തോന്നിച്ച ഘട്ടങ്ങളിലെല്ലാം ക്യാപ്റ്റനെന്ന നിലയില്‍ ബാസിദ് എടുത്ത തീരുമാനങ്ങളും ശ്രദ്ധേയമായി. ബൌളിങ്ങിലും ഫീല്‍ഡിങ്ങിലും വരുത്തിയ മാറ്റങ്ങള്‍ കൊച്ചിയുടെ ബാറ്റിങ് നിരയെ വരിഞ്ഞു കെട്ടി. മറുപടി ബാറ്റിങ്ങില്‍ മികച്ച കൂട്ടുകെട്ടുകളുണ്ടാക്കാന്‍ റോയല്‍സ് പാടുപെടുമ്പോഴായിരുന്നു ബാസിദ് ക്രീസിലെത്തിയത്. ഫോറും സിക്‌സുമായി ഗോവിന്ദ് പൈയ്‌ക്കൊപ്പം ചേര്‍ന്ന് സ്‌കോറിങ്ങിന്റെ വേഗം കൂട്ടിയ ബാസിദിന്റെ ഇന്നിങ്‌സാണ് റണ്‍റേറ്റ് മികവില്‍ ട്രിവാണ്‍ഡ്രം റോയല്‍സിന് വിജയം ഒരുക്കിയത്.കഴിഞ്ഞ മൂന്ന് സീസണുകളില്‍ സംസ്ഥാനത്തിനായി സ്ഥിരതയുള്ള പ്രകടനം കാഴ്ച വയ്ക്കുന്ന താരങ്ങളില്‍ ഒരാളാണ് ബാസിദ്. കൂറ്റനടികളിലൂടെ സ്‌കോര്‍ ഉയര്‍ത്തുന്ന ബാസിദ് ബാറ്റിങ്ങിലും ടീമിന്റെ നെടുംതൂണാണ്. 2023ലെ ഐപിഎല്‍ സീസണില്‍ അബ്ദുള്‍ ബാസിദ് രാജസ്ഥാന്‍ റോയല്‍സ് ടീമില്‍ ഇടം പിടിച്ചിരുന്നു. കേരള ക്രിക്കറ്റ് ലീഗിന്റെ ആദ്യ സീസണില്‍ ആരാധകര്‍ ഉറ്റു നോക്കുന്ന ഏതാനും താരങ്ങളില്‍ ഒരാള്‍ കൂടിയാണ് അബ്ദുള്‍ ബാസിദ്.
