ഭീമ കൊറേഗാവ് സംഭവത്തിൽ ആക്ടിവിസ്റ്റകൾക്കെതിരായ കേസുകൾ പിൻവലിക്കണം; നിലപാട് വ്യക്തമാക്കി സിപിഐയും സിപിഎമ്മും
ന്യൂഡൽഹി: ഭീമ കൊറേഗാവ് സംഭവത്തിൽ ആക്ടിവിസ്റ്റകൾക്കെതിരായ കേസുകൾ പിൻവലിക്കണമെന്ന ആവശ്യവുമായി കമ്മ്യൂണിസ്റ്റ് പാർട്ടികൾ. ഇത് സംബന്ധിച്ച് സിപിഎമ്മും സിപിഐയും പ്രസ്താവന പുറപ്പെടുവിച്ചു. സർക്കാർ നയങ്ങളോടുള്ള എതിർപ്പുകളും വിയോജിപ്പുകളും അടിച്ചമർത്താൻ എൻ.ഐ.എയും മറ്റ് ഏജൻസികളും പ്രവർത്തിക്കുന്ന ഈ രീതി ഉടൻ അവസാനിപ്പിക്കണമെന്ന് സിപിഐ ദേശീയ സെക്രട്ടേറിയറ്റ് ആവശ്യപ്പെട്ടു. ആക്ടിവിസ്റ്റ് റോണ വിൽസന്റെ കമ്പ്യൂട്ടറിൽ തെളിവുകൾ കൃത്രിമമായി കെട്ടിച്ചമച്ചുവെന്ന് രാജ്യാന്തര വിദഗ്ദ്ധർ വ്യക്തമാക്കിയ സാഹചര്യത്തിൽ ഇതേക്കുറിച്ച് അന്വേഷിക്കാൻ മഹാരാഷ്ട്ര സർക്കാരിന്റെ പ്രത്യേക സംഘത്തെ നിയോഗിക്കണമെന്ന് സിപിഎം പൊളിറ്റ് ബ്യൂറോ ആവശ്യപ്പെട്ടു.
ഭീമ കൊറേഗാവ് കേസിൽ കമ്പ്യൂട്ടർ ഹാക്കിങ് വഴി മാരകമായ സാങ്കേതിക ആയുധമാണ് മോദി സർക്കാർ ഉപയോഗിച്ചത്. ഭാവിയിൽ രാഷ്ട്രീയ എതിരാളികൾക്കുനേരെയും ഇതു പ്രയോഗിച്ചേക്കാം. പ്രാഥമിക അന്വേഷണത്തിൽ നടന്നതുപോലെ ഇക്കാര്യം മൂടിവെക്കാൻ അനുവദിക്കരുതെന്നും വസ്തുത പുറത്തുവരണമെന്നും പോളിറ്റ് ബ്യൂറോ വ്യക്തമാക്കി.
