'സംയുക്ത തിരിച്ചു വരാൻ അവളെവിടെയാണ് പോയത്; അവൾ അവിടെയുണ്ട്; മകന്റെ കാര്യങ്ങൾ ആര് നോക്കും'; സംയുക്തയുടെ തിരിച്ചുവരവിനെ കുറിച്ചുള്ള ചോദ്യത്തിന് മറുപടിയുമായി ബിജു മേനോൻ; പ്രതികരിച്ച് മഞ്ജു വാര്യരും

കൊച്ചി: മലയാളത്തിലെ ഏറ്റവും പ്രിയപ്പെട്ട അഭിനേതാക്കളിൽ ഒരാളാണ് സംയുക്ത വർമ്മ. വിവാഹശേഷമാണ് സംയുക്ത സിനിമയിൽ നിന്ന് മാറിനിന്നത്. സംയുക്ത വർമ സിനിമയിലേക്ക് എന്ന് മടങ്ങിവരും എന്ന ചോദ്യം ചിലപ്പോഴൊക്കെ ആരാധകരിൽ നിന്ന് വരാറുണ്ട്. സംയുക്ത വർമ തിരിച്ചു വരുമോ എന്ന ചോദ്യത്തിന് നടൻ ബിജു മേനോൻ പറഞ്ഞ മറുപടിയാണ് ഇപ്പോൾ ചർച്ചയാകുന്നത്.

1999-ൽ പുറത്തിറങ്ങിയ 'വീണ്ടും ചില വീട്ടുകാര്യങ്ങൾ' എന്ന ചിത്രത്തിലൂടെയാണ് താരം സിനിമയിൽ അരങ്ങേറ്റം കുറിച്ചത്. 'ചന്ദ്രനുദിക്കുന്ന ദിക്കിൽ', 'തെങ്കാശിപട്ടണം', 'മഴ', 'മധുരനൊമ്പരക്കാറ്റ്', 'ലൈഫ് ഈസ് ബ്യൂട്ടിഫുൾ' തുടങ്ങി നാലുവർഷത്തെ കരിയറിൽ ഓർമിക്കപ്പെടുന്ന നിരവധി കഥാപാത്രങ്ങളാണ് സംയുക്ത ചെയ്തത്. 2002ൽ റിലീസായ തെങ്കാശിപ്പട്ടണം എന്ന സിനിമയിലാണ് സംയുക്ത അവസാനമായി അഭിനയിച്ചത്.


സിനിമ പ്രേമികളെല്ലാം താരത്തിന്റെ തിരിച്ചുവരവിനായി കാത്തിരിക്കുകയാണ്. ഇതിനെ പറ്റിയുള്ള ചോദ്യങ്ങൾ പലപ്പോഴും ബിജു മേനോനോട് പലരും ചോദിക്കാറുണ്ട്. കഴിഞ്ഞ ദിവസം തന്റെ പുതിയ ചിത്രമായ ലളിതം സുന്ദരത്തിന്റെ പ്രമോഷന്റെ ഭാഗമായി മാധ്യമങ്ങളെ കാണവേയാണ് ബിജു മേനോൻ ചോദ്യത്തിന് മറുപടി പറഞ്ഞത്.

സംയുക്ത വർമയുടെ തിരിച്ചുവരവിനെ കുറിച്ച് അടുത്ത സുഹൃത്ത് കൂടിയായ നടി മഞ്ജു വാര്യരോട് ചോദിച്ചപ്പോൾ താൻ ഈ ചോദ്യം പ്രതീക്ഷിച്ചിരുന്നുവെന്ന് ബിജു മേനോൻ ഇടയ്ക്ക് കയറി പറയുകയായിരുന്നു.

''ആ ചോദ്യം ഞാൻ പ്രതീക്ഷിച്ചിരുന്നു. സംയുക്ത വർമ തിരിച്ചു വരാൻ അവളെവിടെയാണ് പോയത്. അവൾ അവിടെയുണ്ട്. സിനിമയിലേക്കുള്ള തിരിച്ചു വരവിനെ കുറിച്ച് പറയുകയാണെങ്കിൽ നമുക്ക് ഒരുപാട് കുടുബകാര്യങ്ങളില്ലേ, ഞങ്ങളുടെ മകന്റെ കാര്യങ്ങൾ നോക്കണം. രണ്ടു പേരും കൂടെ വർക്ക് ചെയ്യ്താൽ മകന്റെ കാര്യങ്ങൾ ആര് നോക്കും. ഫാമിലിയാര് നോക്കും. ഞങ്ങൾക്ക് അങ്ങനയെ ചെയ്യാൻ പറ്റുള്ളു. അവൾക്ക് അഭിനയിക്കണമെങ്കിൽ അഭിനയിക്കാം. പക്ഷെ രണ്ടും കൂടി നോക്കണ്ടേ,' ബിജു മേനോൻ പറഞ്ഞു.

ഈ തീരുമാനങ്ങളെല്ലാം എടുത്തത് സംയുക്ത തന്നെയാണെന്നും, അത് തനിക്ക് നേരിട്ടറിയാമെന്നും മഞ്ജു വാര്യർ കൂട്ടിച്ചേർത്തു. മീര ജാസ്മിൻ, നവ്യ നായർ, ഭാവന എന്നിവരുടെ തിരിച്ചു വരവിൽ താൻ ഒരുപാട് സന്തുഷ്ടയാണെന്നും, നവ്യ നായരുടെ തിരിച്ചു വരവിൽ താൻ പ്രചോദനമായിരുന്നില്ലെന്നും മഞ്ജു വാര്യർ പറയുന്നുണ്ട്.

'മീര ജാസ്മിൻ, നവ്യ നായർ, ഭാവന ഇവരെല്ലാം എന്റെ വളരെ അടുത്ത സുഹൃത്തുക്കളാണ്. അവരൊക്ക സിനിമ ചെയ്യുന്നത് കാണുമ്പോൾ സന്തോഷമാണ്.നവ്യ എന്നോടുള്ള സ്‌നേഹം കാരണം പറയുന്നതാണ്. നവ്യ നായരുടെ തിരിച്ചു വരവിൽ ഞാൻ പ്രചോദനമായിരുന്നില്ല. നവ്യയ്ക്ക് സിനിമ ചെയ്യണമെന്ന സ്പാർക്കില്ലാതെ അത് സംഭവിക്കില്ലായിരുന്നു. അതു കൊണ്ട് അതിന്റെ ക്രെഡിറ്റുകളെല്ലാം നവ്യയ്ക്ക് തന്നെയാണ്, എനിക്കല്ല,' മഞ്ജു പറയുന്നു.

മഞ്ജു വാര്യർ, ബിജു മേനോൻ എന്നിവർ കേന്ദ്രകഥാപാത്രങ്ങളാവുന്ന ലളിതം സുന്ദരം എന്ന ചിത്രം റിലീസിനൊരുങ്ങുകയാണ്. മധു വാര്യർ ആദ്യമായി സംവിധാനം ചെയ്യുന്ന ലളിതം സുന്ദരം ഒരു കോമഡി ഡ്രാമ ചിത്രമാണ്.

മധു വാര്യരുടെ ആദ്യ സംവിധാന സംരഭമാണ് 'ലളിതം സുന്ദരം'. 'ദ ക്യാംപസ്', 'നേരറിയാൻ സിബിഐ' തുടങ്ങി ഒട്ടേറെ ചിത്രങ്ങളിൽ അഭിനയിച്ചിട്ടുണ്ട് മധു വാര്യർ. കോവിഡ് അടക്കമുള്ള പ്രതിസന്ധികൾ കാരണമായിരുന്നു 'ലളിതം സുന്ദരം' റിലീസിന് വൈകിയത്. എന്തായാലും ഡയറക്ട് ഒടിടിയായി ചിത്രം അടുത്തമാസം പ്രദർശനത്തിനെത്തുന്നതിന്റെ ആവേശത്തിലാണ് മധു വാര്യരടക്കമുള്ളവർ.

സൈജു കുറുപ്പ്, ദീപ്തി സതി, അനു മോഹൻ, ദിലീഷ് പോത്തൻ എന്നിവർ ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നു. മഞ്ജു വാര്യർ പ്രൊഡക്ഷൻസിന്റെ ബാനറിൽ കൊച്ചുമോനൊപ്പം മഞ്ജു വാര്യരും ചേർന്നാണ് ചിത്രം നിർമ്മിക്കുന്നത്. ബിജിപാൽ ആണ് ചിത്രത്തിന്റെ സംഗീത സംവിധായകൻ. ബി. കെ. ഹരിനാരായണനാണ് ഗാനരചന നിർവ്വഹിക്കുന്നത്. സിനിമ മാർച്ച് 18ന് ഡിസ്‌നി പ്ലസ് ഹോട്ട്സ്റ്റാറിലൂടെ റിലീസ് ചെയ്യും.