കൈക്കൂലി വാങ്ങുന്നതിനിടെ റവന്യൂ ഇൻസ്‌പെക്ടറെ പിടികൂടി; കണ്ണൂർ കോർപ്പറേഷൻ റവന്യു ഇൻസ്പെക്ടർ എം സതീഷ് പിടിയിലായത് എടക്കാട് സ്വദേശിയിൽ നിന്നും ആയിരം രൂപ കൈക്കൂലി വാങ്ങവേ

കണ്ണൂർ: കൈക്കൂലി വാങ്ങുന്നതിനിടെ റവന്യൂ ഇൻസ്പെക്ടറെ വിജിലെൻസ് അറസ്റ്റ് ചെയ്തു. കണ്ണൂർ കോർപ്പറേഷൻ റവന്യു ഇൻസ്പെക്ടർ എം സതീഷിനെയാണ് വിജിലൻസ് ഡിവൈ എസ് പി ബാബു പെരിങ്ങോത്ത് അറസ്റ്റ് ചെയ്തത്. പുഴാതി സോണൽ ഓഫിസിൽ വെച്ച് എടക്കാട് സ്വദേശിയായ രവിയിൽ നിന്ന് ആയിരം രൂപ വാങ്ങുന്നതിനിടെയാണ് ഇന്നലെ ഉച്ചയോടെ ഇയാൾ അറസ്റ്റിലായത്.

രവിയുടെ മകൾ കക്കാട് വാങ്ങിയ വീടിന് ഉടമസ്ഥാവകാശ സർട്ടിഫിക്കറ്റിന് കോർപ്പറേഷനെ സമീപിച്ചിരുന്നു. ഇതിനാണ് കൈക്കൂലി വാങ്ങിയത്.നേരത്തെ നിരവധി തവണ ഉടമസ്ഥാവകാശ സർട്ടിഫിക്കറ്റിനായി കോർപ്പറേഷൻ ഓഫിസിൽ കയറിയിറങ്ങിയിട്ടും ലഭിച്ചിരുന്നില്ല. ഇതെ തുടർന്നാണ് വിജിലൻസിന് പരാതി നൽകിയത്.അറസ്റ്റിലായ റവന്യു ഇൻസ്പെക്ടറെ തലശേരി വിജിലൻസ് കോടതിയിൽ ഹാജരാക്കി.