റോം: ആഭ്യന്തരയുദ്ധവും ഭീകരവാദവും തകർത്ത നാടുകളിൽനിന്ന് നല്ല ജീവിതം സ്വപ്നംകണ്ട് ഉള്ളതെല്ലാം വിറ്റുപെറുക്കി ജീവൻപരെ പണയംവച്ച് യൂറോപ്പിലേക്കു കുടിയേറുകയാണ് സിറയയിലേയും മറ്റും മുസ്ലിംങ്ങൾ. ഇതിനെ സംശയത്തോടെ കാണുകയാണ് കത്തോലിക്കാ സഭയിലെ പ്രമുഖ നേതാവ് ആർച്ച് ബിഷപ് മോൺസീഞ്ഞോർ കാർലോ ലിബെറേറ്റി. യൂറോപ്പ്യൻ രാജ്യങ്ങളെ മുസ്ലിം രാഷ്ട്രമാക്കി ഇത് മാറ്റുമെന്ന ആശങ്കയാണ് പങ്കുവയ്ക്കുന്നത്.

ഏഷ്യയിൽനിന്നും ആഫ്രിക്കയിൽനിന്നും മിഡിൽഈസ്റ്റിൽനിന്നും യൂറോപ്പിലേക്ക് കുടിയേറുന്ന മുസ്ലിം അഭയാർത്ഥികളുടെ പ്രധാന രക്ഷാസങ്കേതങ്ങളിലൊന്ന് ഇറ്റലിയാണ്. കഴിഞ്ഞ രണ്ടു വർഷത്തിനിട 3,30,000 പേരാണ് ഇറ്റലിയിലെത്തിയത്. ഇറ്റാലിയൻ സർക്കാരിന്റെ കണക്കനുസരിച്ചുതന്നെ 1970 ൽ വെറും 2,000 മുസ്ലിംകളാണ് രാജ്യത്ത് ജീവിച്ചിരുന്നത്. 2015 ഓടെ ഇത് 20 ലക്ഷത്തിനു മുകളിലെത്തി. ഈ കണക്കാണ് ഉയർത്തിക്കാട്ടുന്നത്. ഇറ്റാലിയൻ സർക്കാരിന്റെ വിഡ്ഡിത്തം മൂലം വൈകാതെ രാജ്യത്തുള്ളവരെല്ലാം മുസ്ലിംകളായി മാറുമെന്ന് അദ്ദേഹം പറഞ്ഞു. യൂറോപ്പിന്റെ മതേതര നിലപാടും മുസ്ലിം അഭയാർത്ഥികളുടെ എണ്ണത്തിലുള്ള വർധവും കാരണം ഭൂഖണ്ഡത്തിലെ പ്രധാന മതമായി ഇസ്ലാം മാറുമെന്നും ഇറ്റലിയിലെ പോംപെയിലെ എമരിറ്റസ് ആർച്ച് ബിഷപ് ആയ ലിബെറേറ്റി കൂട്ടിച്ചേർത്തു.

നമ്മുടെ വിഡ്ഡിത്വം മൂലം പത്തു വർഷത്തിനകം നമ്മളെല്ലാം മുസ്ലിംകളായി മാറും. ഇറ്റിലിയും യൂറോപ്പും വിജാതീയ രീതികളിലും നിരീശ്വരവാദത്തിലും അഭിരമിക്കുകയും ദൈവത്തിനെതിരായ നിയമങ്ങളുണ്ടാക്കുകയും ചെയ്യുന്നു. ഇതെല്ലാം ഇസ്ലാമിന് അനുകൂലമായ സാഹചര്യങ്ങളാണ്. ക്രിസ്തുമതത്തിൽ വിശ്വാസം കുറഞ്ഞുവരികയാണെന്നും പള്ളികൾ കാര്യമായി പ്രവർത്തിക്കുന്നില്ലെന്നും സെമിനാരികൾ ശൂന്യമാണെന്നും ആർച്ച്ബിഷപ് പറഞ്ഞു. ഇടവകകൾ മാത്രമാണ് ഇപ്പോഴും നിലനിൽക്കുന്നത്. നമ്മൾക്ക് ശരിയായ ക്രിസ്തുമത ജീവിതം വേണം. നമ്മുടെ നാട്ടിലെ സാഹചര്യങ്ങളെല്ലാം ഇസ്ലാമിന് അനുകൂലമാണ്. എല്ലാത്തിനും പുറമേ അവർക്ക് കുട്ടികളുണ്ട്, നമുക്ക് കുട്ടികളില്ല. നമ്മൾ പൂർണ അധപ്പതനത്തിലാണ്.

അഭയം തേടിയെത്തുന്നവരെ എല്ലാം മറന്നു സഹായിക്കുമ്പോഴും ചവറുകൂനകളിൽനിന്ന് ഭക്ഷണം കഴിച്ചു ജീവിക്കുന്ന വയസന്മാരെ ഇറ്റലിക്കാർ അവഗണിക്കുകയാണെന്ന് ആർച്ച് ബിഷപ് ലിബെറാറ്റി പറഞ്ഞു. ഇറ്റലിക്കാർക്ക് മുൻഗണന നല്കുന്ന നയം സർക്കാർ രൂപീകരിക്കണം. തൊഴില്ലാത്ത ചെറുപ്പക്കാർക്കു പരിഗണന ലഭിക്കണം.

അഭയാർത്ഥികൾക്ക് കത്തോലിക്കാസഭ പണം സംഭാവന ചെയ്ത നടപടിയെയും അദ്ദേഹം വിമർശിച്ചു. അലഞ്ഞുനടക്കുന്ന അഭയാർത്ഥികൾക്ക് പണം നല്കാൻ പാടില്ല. അവരുടെ സ്വഭാവത്തെ നമ്മൾ പ്രോത്സാഹിപ്പിക്കുന്നത് ധാർമികമായ തെറ്റുകൂടിയാണെന്ന് അദ്ദേഹം കൂട്ടിച്ചേർത്തു.