കോവിഡ് മൂലം രാജ്യത്ത് അനാഥരായത് 3,627 കുട്ടികൾ; 65 പേർ കേരളത്തിൽ; 274 കുട്ടികൾ ഉപേക്ഷിക്കപ്പെട്ടു. 26,176 കുട്ടികൾക്ക് രക്ഷിതാക്കളിൽ ഒരാളെ നഷ്ടമായെന്നും ബാലാവകാശ കമ്മീഷൻ സുപ്രീംകോടതിയിൽ

ന്യൂഡൽഹി: കോവിഡ് കാരണം കഴിഞ്ഞ ഒരു വർഷത്തിനിടെ 3,627 കുട്ടികൾ അനാഥരായെന്ന് ബാലാവകാശ കമ്മീഷൻ സുപ്രീംകോടതിയെ അറിയിച്ചു. 274 കുട്ടികൾ ഉപേക്ഷിക്കപ്പെട്ടു. 26,176 കുട്ടികൾക്ക് രക്ഷിതാക്കളിൽ ഒരാളെ നഷ്ടമായെന്നും ബാലവകാശ കമ്മീഷൻ പറഞ്ഞു.

കേരളത്തിൽ 65 കുട്ടികൾ അനാഥരായെന്നാണ് കണക്ക്. 1,931 കുട്ടികൾക്ക് അച്ഛനമ്മമാരിൽ ഒരാളെ നഷ്ടമായി. 2020 ഏപ്രിൽ 1 മുതൽ 2021 ജൂൺ 5 വരെയുള്ള കണക്കാണ് സുപ്രീം കോടതിയിൽ സമർപ്പിച്ചത്. ഏറ്റവും കൂടുതൽ പേർ അനാഥരായത് മധ്യപ്രദേശിലാണ്, 706. ബിഹാറിൽ 308 കുട്ടികളും ഒഡിഷയിൽ 241 കുട്ടികളും മഹാരാഷ്ട്രയിൽ 217 കുട്ടികളും ആന്ധ്രപ്രദേശിൽ 166 കുട്ടികളും ഛത്തീസ്‌ഗഡിൽ 120 കുട്ടികളും അനാഥരായി.

രക്ഷിതാക്കളിൽ ഒരാളെ നഷ്ടപ്പെട്ട സംസ്ഥാനങ്ങളിൽ മുന്നിൽ മഹാരാഷ്ട്രയാണ്, 6,865. ഹരിയാനയിൽ 2,353 കുട്ടികൾക്കും ആന്ധ്രയിൽ 1,923 കുട്ടികൾക്കും ബിഹാറിൽ 1,326 കുട്ടികൾക്കും മധ്യപ്രദേശിൽ 1,311 കുട്ടികൾക്കും രക്ഷിതാക്കളിൽ ഒരാളെ നഷ്ടമായി. ഈ പട്ടികയിൽ മൂന്നാം സ്ഥാനത്താണ് കേരളം.

ഉപേക്ഷിക്കപ്പെട്ട കുട്ടികളിൽ 226 പേരും മധ്യപ്രദേശിലാണ്. 11 പേർ ഛത്തീസ്‌ഗഡിലും കേരളത്തിലും കർണാടകത്തിലും ആറ് പേർ വീതവും മണിപ്പൂരിൽ മൂന്ന് കുട്ടികളെയും മഹാരാഷ്ട്രയിൽ രണ്ട് കുട്ടികളെയും ഗുജറാത്ത്, ഹരിയാന എന്നിവിടങ്ങളിൽ ഓരോ കുട്ടികളും ഉപേക്ഷിക്കപ്പെട്ടെന്നും കണക്ക് പറയുന്നു.

കോവിഡ് മൂലം അനാഥരായ കുട്ടികളെ കണ്ടെത്തി സംരക്ഷിക്കാൻ സർക്കാരുകൾ നടപടി എടുക്കണമെന്ന് സുപ്രീംകോടതി നിർദ്ദേശിച്ചിട്ടുണ്ട്.

കോവിഡ് മൂലം അനാഥരായ കുട്ടികൾക്ക് കേന്ദ്ര സർക്കാരും കേരളമടക്കമുള്ള സംസ്ഥാന സർക്കാരുകളും നേരത്തെ സഹായങ്ങൾ പ്രഖ്യാപിച്ചിരുന്നു. കോവിഡ് 19 മൂലം അച്ഛനെയും അമ്മയെയും നഷ്ടപ്പെട്ട കുട്ടികൾക്ക് പി. എം കെയർ ഫോർ ചിൽഡ്രൻ പദ്ധതി പ്രകാരം പ്രായപൂർത്തി ആകുമ്പോൾ പ്രതിമാസ സ്‌റ്റൈപൻഡ് നൽകും.അഞ്ചു വർഷത്തേക്കാണ് പ്രതിമാസ സ്‌റ്റൈപൻഡ്. ഇവർക്ക് 23 വയസാകുമ്പോൾ 10 ലക്ഷം രൂപയും നൽകും. പി.എം കെയർ ഫണ്ടിൽ നിന്നാണ് ഈ തുക നൽകുക.

കൂടാതെ കേന്ദ്ര സർക്കാരിന്റെ ഇൻഷുറൻസ് പദ്ധതിയിൽ ഉൾപ്പെടുത്തി അഞ്ചു ലക്ഷത്തിന്റെ ഇൻഷുറൻസ് പരിരക്ഷയും നൽകും. പത്ത് വയസിന് താഴെയുള്ള കുട്ടികൾക്ക് അടുത്തുള്ള കേന്ദ്രീയ വിദ്യാലയത്തിൽ പ്രവേശനം നൽകും. സ്വകാര്യ സ്‌കൂളിൽ ആണ് പഠനം എങ്കിൽ ചെലവ് സർക്കാർ വഹിക്കും. 11നും 18നും ഇടയിലുള്ള കുട്ടികൾക്ക് കേന്ദ്ര സർക്കാർ സ്‌കൂളുകളിൽ പ്രവേശനം നൽകും. ഉന്നത വിദ്യാഭ്യാസത്തിന് ശ്രമിക്കുന്നവർക്ക് വിദ്യാഭ്യാസ ലോൺ നേടാൻ സഹായിക്കും. സ്‌കോളർഷിപ്പ് അനുവദിക്കുമെന്നും പ്രധാനമന്ത്രിയുടെ ഓഫീസ് അറിയിച്ചു.

കോവിഡ് -19 മൂലം മാതാപിതാക്കളെ നഷ്ടപ്പെട്ട കുട്ടികളെ സഹായിക്കാൻ സ്വീകരിക്കാവുന്ന നടപടികളെക്കുറിച്ച് ചർച്ച ചെയ്യുന്നതിനു ചേർന്ന യോഗത്തിൽ പ്രധാനമന്ത്രി നരേന്ദ്ര മോദി അധ്യക്ഷത വഹിച്ചു. മഹാമാരി മൂലം അനാഥരായ കുട്ടികൾക്ക് പ്രധാനമന്ത്രി നിരവധി ആനുകൂല്യങ്ങൾ പ്രഖ്യാപിച്ചു. ഈ നടപടികൾ പ്രഖ്യാപിക്കുമ്പോൾ കുട്ടികൾ രാജ്യത്തിന്റെ ഭാവിയെ പ്രതിനിധീകരിക്കുന്നുവെന്നും കുട്ടികളെ പിന്തുണയ്ക്കാനും സംരക്ഷിക്കാനും രാജ്യം സാധ്യമായതെല്ലാം ചെയ്യുമെന്നും അതിനാൽ അവർ ശക്തമായ പൗരന്മാരായി വളരുകയും ശോഭനമായ ഭാവിയുണ്ടാകുകയും ചെയ്യുമെന്നും പ്രധാനമന്ത്രി പറഞ്ഞു. ഇത്തരം പ്രയാസകരമായ സമയങ്ങളിൽ നമ്മുടെ കുട്ടികളെ പരിപാലിക്കുന്നതും ശോഭനമായ ഭാവിക്കായി പ്രത്യാശ പകരുന്നതും ഒരു സമൂഹമെന്ന നിലയിൽ നമ്മുടെ കടമയാണെന്ന് പ്രധാനമന്ത്രി പറഞ്ഞു.

ഓരോ കുട്ടിക്കും 18 വയസ്സ് തികയുമ്പോൾ 10 ലക്ഷം രൂപയുടെ ഒരു സഹായം സൃഷ്ടിക്കുന്നതിന് പ്രത്യേകമായി രൂപകൽപ്പന ചെയ്ത പദ്ധതിയിലൂടെ പി എം കെയേഴ്‌സിൽ ഫോർ ചിൽഡ്രനിൽനിന്ന് നൽകും.

18 വയസ് മുതൽ പ്രതിമാസ സാമ്പത്തിക സഹായം / സ്‌റ്റൈപ്പന്റ് നൽകും. അടുത്ത അഞ്ച് വർഷത്തേക്ക് ഉന്നതവിദ്യാഭ്യാസ കാലയളവിൽ അവരുടെ വ്യക്തിഗത ആവശ്യങ്ങൾ പരിപാലിക്കുന്നതിനും 23 വയസ്സ് തികയുമ്പോൾ, വ്യക്തിപരവും തൊഴിൽപരവുമായ ഉപയോഗത്തിനായി ഒരു വലിയ തുകയായി അവർക്ക് ആ തുക ലഭിക്കും.

10 വയസ്സിന് താഴെയുള്ള കുട്ടികൾക്ക് അടുത്തുള്ള കേന്ദ്ര വിദ്യാലയത്തിലോ ഒരു സ്വകാര്യ സ്‌കൂളിലോ പ്രവേശനം നൽകും. കുട്ടിയെ ഒരു സ്വകാര്യ സ്‌കൂളിൽ പ്രവേശിപ്പിച്ചാൽ, ആർടിഇ മാനദണ്ഡമനുസരിച്ച് ഫീസ് പിഎം കെയേഴ്‌സിൽ നിന്ന് നൽകും. യൂണിഫോം, പാഠപുസ്തകങ്ങൾ, നോട്ട്ബുക്കുകൾ എന്നിവയ്ക്കുള്ള ചെലവുകൾക്കും പണം നൽകും.

11-18 വയസ്സിനിടയിലുള്ള കുട്ടികൾക്ക് സൈനിക് സ്‌കൂൾ, നവോദയ വിദ്യാലയം തുടങ്ങിയ ഏതെങ്കിലും കേന്ദ്ര സർക്കാർ റെസിഡൻഷ്യൽ സ്‌കൂളിൽ പ്രവേശനം നൽകും.

കുട്ടികൾക്ക് കുടുംബാംഗങ്ങളുടെ സംരക്ഷണയിൽ തുടരണമെങ്കിൽ, അടുത്തുള്ള കേന്ദ്ര വിദ്യാലയത്തിലോ ഒരു സ്വകാര്യ സ്‌കൂളിലോ പ്രവേശനം നൽകും. കുട്ടിയെ ഒരു സ്വകാര്യ സ്‌കൂളിൽ പ്രവേശിപ്പിച്ചാൽ, ആർടിഇ മാനദണ്ഡമനുസരിച്ച് ഫീസ് പിഎം കെയേഴ്‌സിൽ നിന്ന് നൽകും. യൂണിഫോം, പാഠപുസ്തകങ്ങൾ, നോട്ട്ബുക്കുകൾ എന്നിവയ്ക്കുള്ള ചെലവുകൾക്കും പണം നൽകും.

നിലവിലുള്ള വിദ്യാഭ്യാസ വായ്പ മാനദണ്ഡങ്ങൾക്കനുസൃതമായി ഇന്ത്യയിലെ പ്രൊഫഷണൽ കോഴ്‌സുകൾ / ഉന്നത വിദ്യാഭ്യാസം എന്നിവയ്ക്കായി വിദ്യാഭ്യാസ വായ്പ ലഭിക്കുന്നതിന് കുട്ടിയെ സഹായിക്കും. ഈ വായ്പയുടെ പലിശ പിഎം കെയേഴ്‌സ് നൽകും.
പകരമായി, സർക്കാർ മാനദണ്ഡങ്ങൾക്കനുസരിച്ച് ബിരുദ / വൊക്കേഷണൽ കോഴ്‌സുകളുടെ ട്യൂഷൻ ഫീസ് / കോഴ്സ് ഫീസുകൾക്ക് തുല്യമായ സ്‌കോളർഷിപ്പ് അത്തരം കുട്ടികൾക്ക് കേന്ദ്ര അല്ലെങ്കിൽ സംസ്ഥാന സർക്കാർ പദ്ധതികൾ പ്രകാരം നൽകും. നിലവിലുള്ള സ്‌കോളർഷിപ്പ് സ്‌കീമുകൾക്ക് കീഴിൽ യോഗ്യതയില്ലാത്ത കുട്ടികൾക്കായി, പിഎം കെയർ തുല്യമായ സ്‌കോളർഷിപ്പ് നൽകും.

എല്ലാ കുട്ടികളെയും ആയുഷ്മാൻ ഭാരത് സ്‌കീം (പിഎം-ജയ്) പ്രകാരം ഒരു ഗുണഭോക്താവായി എന്റോൾ ചെയ്യും. 18 വയസ്സ് വരെ ഈ കുട്ടികൾക്കുള്ള പ്രീമിയം തുക പിഎം കെയറിൽ നിന്നും നൽകും.