പൊലീസ് വേഷങ്ങളില്‍ തിളങ്ങിയ സജിപതി 'മറുവശ'ത്തിലൂടെ രാഷ്ട്രീയക്കാരനാവുന്നു; ചിത്രം മാര്‍ച്ച് ഏഴിന് റിലീസ് ചെയ്യും
സജിപതി 'മറുവശ'ത്തിലൂടെ രാഷ്ട്രീയക്കാരനാവുന്നു
കൊച്ചി: മലയാള സിനിമയില്‍ മികച്ച കഥാപാത്രങ്ങളിലൂടെ പ്രേക്ഷകരുടെ ഹൃദയം കവര്‍ന്ന നടന്‍ സജിപതി വീണ്ടും വരുന്നു. സംവിധായകന്‍ അനുറാം ഒരുക്കിയ 'മറുവശത്തില്‍' പ്രേക്ഷകശ്രദ്ധ നേടുന്ന വേഷത്തിലാണ് സജിപതി എത്തുന്നത്.
കല്ല്യാണിസം, ദം, ആഴം, കള്ളം എന്നീ ചിത്രങ്ങള്‍ക്ക് ശേഷം റാംസ് ഫിലിം ഫാക്ടറിയുടെ ബാനറില്‍ അനുറാം നിര്‍മ്മിക്കുന്ന ചിത്രം കൂടിയാണ് മറുവശം. ജയശങ്കര്‍ കാരിമുട്ടം, ഷെഹിന്‍ സിദ്ദിഖ്, പ്രശാന്ത് അലക്‌സാണ്ടര്‍, കൈലാഷ്, ശ്രീജിത്ത് രവി എന്നിവരാണ് ചിത്രത്തിലെ പ്രധാന താരങ്ങള്‍.
പോലീസ് വേഷങ്ങളിലൂടെ നമുക്ക് ശ്രദ്ധേയനാണ് സജിപതി. പ്രമുഖ സംവിധായകന്‍ കെ. മധു ഒരുക്കിയ സിബിഐ അഞ്ചാംഭാഗത്തില്‍ സജിപതി വളരെ തിളങ്ങുന്ന കഥാപാത്രമാണ് കൈകാര്യം ചെയ്തത്. എസ് എന്‍ സ്വാമി സംവിധാനം ചെയ്ത 'സീക്രട്ട് 'എന്ന ചിത്രത്തിലും മികച്ചവേഷം കാഴ്ചവച്ചിരുന്നു.
എസ് എന്‍ സ്വാമിയുടെ ആദ്യ സിനിമയില്‍ തന്നെ അഭിനയിക്കാന്‍ കഴിഞ്ഞത് തന്റെ ഭാഗ്യമായി സജിപതി കരുതുന്നു. കെ മധുവാണ് തന്നെ സിനിമയില്‍ സജീവമാക്കിയതെന്ന് ഇദ്ദേഹം പറയുന്നു. അനുറാം സംവിധാനം ചെയ്ത 'മറുവശം' എന്ന ചിത്രം മാര്‍ച്ച് ഏഴിന് റിലീസ് ചെയ്യും . ആത്മാര്‍ത്ഥ സുഹൃത്തായ അനു റാം തനിക്കു പോലീസ് വേഷമായിരുന്നു നിശ്ചയിച്ചിരുന്നത്. എന്നാല്‍ വ്യത്യസ്ത വേഷത്തിനായി താന്‍ ചോദിച്ചു വാങ്ങിയതാണ് മറുവശത്തിലെ നെഗറ്റീവ് ഷെയ്ഡുള്ള കഥാപാത്രം. സജിപതി പറയുന്നു. രാഷ്ട്രീയപ്രവര്‍ത്തകന്റെ കൂട്ടാളിയായ 'രവി' എന്ന കഥാപാത്രമായാണ് ഇദ്ദേഹം ഇതില്‍ വേഷമിടുന്നത്.
കൊട്ടാരക്കര പുത്തൂര്‍ സ്വദേശിയായ സജിപതി ഇതിനകം പതിനഞ്ചോളം മലയാളചലച്ചിത്രങ്ങളിലും, ഒട്ടേറെ ഷോര്‍ട്ട് ഫിലിമുകള്‍, ആല്‍ബങ്ങള്‍ തുടങ്ങിയവയിലും അഭിനയിച്ചിട്ടുണ്ട്. വ്യക്തിപരമായി ഏറെയിഷ്ടമുള്ള കഥാപാത്രങ്ങളായിരുന്നു ഇതുവരെ ചെയ്തതെല്ലാമെന്ന് അദ്ദേഹം പറയുന്നു. സിനിമയെ അത്രയധികം സ്‌നേഹിക്കുന്നതു കൊണ്ടാണ് ബിസിനസ് തിരക്കുകള്‍ക്കിടയിലും അഭിനയിക്കാന്‍ സമയം കണ്ടെത്തുന്നത്.
ആക്ട് ലാബിലെ പഠനവും, അവരുടെ നാടകങ്ങളിലെ പരിശീലനവും തന്റെ അഭിനയ ജീവിതത്തിന് വളരെയധികം സഹായിച്ചിട്ടുണ്ട്. അടൂര്‍ ലോ കോളേജിലെ അസിസ്റ്റന്റ് പ്രൊഫസറായ സുനിതയാണ് ഭാര്യ. മക്കള്‍ നാരായണന്‍ ശങ്കര്‍, ഗൗരി ലക്ഷ്മി. മറുവശം എന്ന സിനിമയില്‍ ഗൗരിലക്ഷ്മിയാണ് നായികയുടെ കുട്ടിക്കാലം അവതരിപ്പിച്ചിരിക്കുന്നത്. സെന്റ് ജോണ്‍സ് എച്ച്എസ്എസ് കാരുവേലില്‍ ഏഴാം ക്ലാസ് വിദ്യാര്‍ത്ഥിനിയാണ് ഗൗരി ലക്ഷ്മി.
