ഐ ടി രംഗത്ത് നിന്ന് ഒരാള്‍ കൂടി വെള്ളിത്തിരയിലേക്ക്; സൂരജ് സുകുമാര്‍ സിനിമയില്‍ സജീവമാകുന്നു
സൂരജ് സുകുമാര്‍ സിനിമയില്‍ സജീവമാകുന്നു
കൊച്ചി: സിനിമയില്‍ ഐ ടി രംഗത്തെ ശ്രദ്ധേയരായ ഒട്ടേറെ പേര്‍ മലയാള സിനിമയുടെ വിവിധ രംഗങ്ങളില്‍ പ്രവര്‍ത്തിച്ചുവരുന്നുണ്ട്. സംവിധായകരും നടന്മാരുമൊക്കെയായിട്ടുള്ള പല പ്രമുഖരും ഐ ടി രംഗത്ത് നിന്ന് കടന്നു വന്നവരാണ്. ഇപ്പോഴിതാ പുതുമുഖ നടനായ സൂരജ് സുകുമാര്‍ മലയാള സിനിമയില്‍ സജീവമാകുന്നു.
പതിനാല് വര്‍ഷത്തിലേറെയായി ടെക്‌നോ പാര്‍ക്കിലെ സ്വകാര്യ കമ്പനിയില്‍ എഞ്ചിനീയറാണ് സൂരജ് സുകുമാര്‍. ജോലിത്തിരക്കിനിടയിലും സിനിമ ഒരു പാഷനായി കൊണ്ടുനടക്കുന്ന സൂരജ് മലയാളത്തില്‍ ചെറുതും വലുതുമായ ഒട്ടേറെ സിനിമകളില്‍ അഭിനയിച്ചു കഴിഞ്ഞു. നല്ല കഥാപാത്രങ്ങള്‍ പ്രതീക്ഷിക്കുന്ന സൂരജ് തന്റെ സിനിമ വിശേഷങ്ങള്‍ പറയുന്നു.
'ആദ്യമായി ഞാന്‍ അഭിനയിച്ച സിനിമയില്‍ നല്ല വേഷമായിരുന്നു. പക്ഷേ അത് റിലീസായി എല്ലാവരും ഒന്ന് അറിഞ്ഞു വരുന്ന സമയത്ത് എനിക്ക് ഒന്ന് രണ്ട് നല്ല സിനിമകളും ലഭിച്ചിരുന്നു പക്ഷേ, ആ സമയത്ത് കോവിഡ് കാരണം സിനിമകള്‍ ഒന്നും നടന്നില്ല. നിലവില്‍ വീണ്ടും സിനിമകളിലൊക്കെ ചെറുതായിട്ട് മുഖം കാണിച്ചു തുടങ്ങി. ചലച്ചിത്ര അക്കാദമി നിര്‍മ്മിച്ച 'ഡിവോഴ്‌സ് 'എന്ന ചിത്രത്തിലും ചെറിയ വേഷം ചെയ്തു. അങ്കം അട്ടഹാസത്തില്‍ 'വെട്ടുളി 'എന്ന് പറയുന്ന ഒരു ക്യാരക്ടറാണ് ചെയ്യുന്നത്. ഷൈന്‍ ടോം ചാക്കോ യുടെ കൂടെയും മാധവ് സുരേഷിനെതിരെയും നില്‍ക്കുന്ന ഒരു കാരക്റ്ററാണ്. സിനിമയിലേക്ക് കാസ്റ്റ് ചെയ്തത് സംവിധായകന്‍ സുജിത്തേട്ടന്‍ ( സുജിത്ത് എസ് നായരും ) നിര്‍മാതാവ് അനില്‍കുമാറേട്ടനും ചേര്‍ന്നാണ്. നിര്‍മ്മാതാവായ അനിലേട്ടനും കൂടെ ചേര്‍ന്നാണ് സുജിത്തേട്ടനൊപ്പം ഇതിന്റെ തിരക്കഥ ഒരുക്കിയിരിക്കുന്നത്. ഇതിനിടെ, മലയാളത്തില്‍ നിന്ന് അവസരങ്ങള്‍ വരുന്നുണ്ട്. നല്ല ചിത്രങ്ങളുടെ ഭാഗമാവുക, നല്ല കഥാപാത്രങ്ങള്‍ ചെയ്യുക. അതാണ് സൂരജിന് അഗ്രഹം. ഇതിനിടയില്‍ സ്വന്തമായി ഒരുസിനിമ സംവിധാനം ചെയ്യുന്നതിന്റെ ജോലികളും പുരോഗമിക്കുന്നുണ്ട്.
