നാടന്‍ ആക്ഷന്‍ ത്രില്ലറുമായി ചിയാന്‍ വിക്രം: വീര ധീര സൂരന്‍ ടീസര്‍ പുറത്ത്
തെന്നിന്ത്യന്‍ സൂപ്പര്‍ താരം ചിയാന്‍ വിക്രം നായകനായി എത്തുന്ന വീര ധീര സൂരന്‍ ടീസര്‍ പുറത്ത് . പ്രഖ്യാപനം മുതല്‍ ഏറെ ചര്‍ച്ചയാകുന്ന ചിത്രംകൂടിയാണിത്. ചിത്തയ്ക്ക് ശേഷം എസ് യു അരുണ്‍കുമാര്‍ സംവിധാനം ചെയ്യുന്ന സിനിമയാണിത് . ചിത്രത്തിന്റെ തിയേറ്റര്‍ അവകാശം സംബന്ധിച്ച വിശേഷങ്ങള്‍ക്കൊപ്പമാണ് ടീസര്‍ പുറത്തുവിട്ടത്. വിക്രം അവതരിപ്പിക്കുന്ന കഥാപാത്രത്തോട് നിങ്ങള്‍ എത്ര കുറ്റം ചെയ്തു എന്ന് ചോദിക്കുന്നതും അതിന് ചിയാന്‍ വിരലുകള്‍ കൊണ്ട് എണ്ണുന്നതുമാണ് ടീസറിലുള്ളത്.
ഒരു നാടന്‍ ആക്ഷന്‍ ത്രില്ലറാകും വീര ധീര സൂരന്‍ എന്നാണ് സൂചന. ചെന്നൈയിലെ തിരുവള്ളൂര്‍ ജില്ലയിലെ തിരുട്ടണി എന്ന ചെറുപട്ടണത്തില്‍ ആണ് കഥ നടക്കുന്നത്. മധ്യവയസ്‌കനായാണ് ചിയാന്‍ ചിത്രത്തില്‍ അഭിനയിക്കുന്നത്. എസ് ജെ സൂര്യയും, സുരാജ് വെഞ്ഞാറമൂടും സിനിമയുടെ ഭാഗമാണ്. സുരാജിന്റെ ആദ്യ തമിഴ് ചിത്രം കൂടിയാണ് ഇത്.
തെന്നിന്ത്യയിലെ പ്രശസ്ത ഛായാഗ്രാഹകന്‍ തേനി ഈശ്വറായിരിക്കും സിനിമയ്ക്കായി ക്യാമറ ചലിപ്പിക്കുക. പേരന്‍പ്, കര്‍ണ്ണന്‍, മാമന്നന്‍ തുടങ്ങിയ തമിഴ് ചിത്രങ്ങളുടെയും പുഴു, നന്‍പകല്‍ നേരത്ത് മയക്കം, ഓസ്ലര്‍ തുടങ്ങിയ മലയാള സിനിമകളുടെയും ഛായാഗ്രഹണം നിര്‍വഹിച്ചത് തേനി ഈശ്വറായിരുന്നു. ദുഷാര വിജയനാണ് സിനിമയില്‍ നായികാ വേഷത്തിലെത്തുന്നത്. ജി വി പ്രകാശ് കുമാര്‍ ആണ് സിനിമയ്ക്ക് സംഗീതം ഒരുക്കുന്നത്. എച്ച് ആര്‍ പിക്‌ചേഴ്ചിന്റെ ബാനറില്‍ റിയ ഷിബു ആണ് നിര്‍മ്മാണം.
