തിരുവനന്തപുരം: നടൻ ജയറാമിനെയും മകൻ കാളിദാസ് ജയറാമിനെയും കേന്ദ്ര കഥാപാത്രങ്ങളാക്കി ജി. പ്രജിത്ത് സംവിധാനം ചെയ്ത 'ആശകൾ ആയിരം' എന്ന ചിത്രം ജനുവരി 22ന് തിയേറ്ററുകളിൽ പ്രദർശനത്തിനെത്തും. ശ്രീഗോകുലം മൂവീസിന്റെ ബാനറിൽ ഗോകുലം ഗോപാലൻ നിർമ്മിച്ച് ജയസൂര്യ നായകനാവുന്ന 'കത്തനാർ' ഏപ്രിലിലേക്ക് റിലീസ് മാറ്റിയ സാഹചര്യത്തിലാണ്, ഇതേ നിർമ്മാണ കമ്പനിയുടെ 'ആശകൾ ആയിരം' ജനുവരിയിൽ പ്രേക്ഷകരിലേക്ക് എത്തുന്നത്. മലയാള സിനിമയിൽ ഏറെ പ്രതീക്ഷയോടെ കാത്തിരിക്കുന്ന ഈ ചിത്രം അച്ഛനും മകനും ഒരുമിച്ചെത്തുന്നതിന്റെ പ്രത്യേകതകൾ ഏറെയാണ്.

ശ്രീഗോകുലം മൂവീസ് തന്നെയാണ് 'ആശകൾ ആയിരം' എന്ന കുടുംബ ചിത്രവും നിർമ്മിച്ചിരിക്കുന്നത്. ജനപ്രിയ നടൻ കൃഷ്ണകുമാറിന്റെ മകളും സോഷ്യൽ മീഡിയ ഇൻഫ്ലുവൻസറുമായ ഇഷാനി കൃഷ്ണയാണ് ചിത്രത്തിൽ കാളിദാസ് ജയറാമിന്റെ നായികയായി വെള്ളിത്തിരയിലെത്തുന്നത്. മലയാളത്തിലെ പ്രമുഖ താരങ്ങളായ ആശ ശരത്, സായ് കുമാർ, അജു വർഗീസ്, ബൈജു സന്തോഷ്, കൃഷ്ണ ശങ്കർ, സഞ്ജു ശിവറാം, ഉണ്ണി രാജ, ശങ്കർ ഇന്ദു ചൂഢൻ, നിഹാരിക, നന്ദൻ ഉണ്ണി, ഗോപൻ അടാട്ട്, ആനന്ദ് മന്മഥൻ, ഇഷാൻ ജിംഷാദ് എന്നിവരും ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നു.

ചിത്രത്തിന്റെ കഥ, തിരക്കഥ, സംഭാഷണം എന്നിവ ഒരുക്കിയിരിക്കുന്നത് അരവിന്ദ് രാജേന്ദ്രനും പ്രശസ്ത സംവിധായകൻ ജൂഡ് ആന്തണി ജോസഫും ചേർന്നാണ്. ദൃശ്യഭംഗിക്ക് ഊന്നൽ നൽകി സ്വരൂപ് ഫിലിപ്പാണ് ഛായാഗ്രഹണം നിർവഹിച്ചിരിക്കുന്നത്. സിനിമയുടെ നിർമ്മാണ പ്രവർത്തനങ്ങളെ ഏകോപിപ്പിക്കാൻ ബാദുഷ എൻ.എം പ്രോജക്ട് ഡിസൈനറായും, ഷഫീഖ് പി.വി എഡിറ്ററായും പ്രവർത്തിച്ചു. ചിത്രത്തിന് സംഗീതം ഒരുക്കിയിരിക്കുന്നത് സനൽ ദേവാണ്. ബൈജു ഗോപാലൻ, വി.സി പ്രവീൺ എന്നിവർ കോ പ്രൊഡ്യൂസേഴ്‌സ് ആയും കൃഷ്ണമൂർത്തി എക്സിക്യൂട്ടീവ് പ്രൊഡ്യൂസറായും നിർമ്മാണത്തിൽ പങ്കുചേർന്നിരിക്കുന്നു.

ജയറാംകാളിദാസ് ജയറാംആശകൾ ആയിരം

സ്വന്തം ലേഖകൻ