സുരഭി ലക്ഷ്മി പ്രധാന വേഷത്തിലെത്തുന്ന 'അവൾ'; ജയരാജ് ഒരുക്കുന്ന ചിത്രത്തിന്റെ ഗാനം പുറത്ത്

കൊച്ചി: ജയരാജ് സംവിധാനം ചെയ്ത് സുരഭി ലക്ഷ്മി പ്രധാന വേഷത്തിലെത്തുന്ന 'അവൾ' എന്ന സിനിമയുടെ രണ്ടാമത്തെ ഗാനം പുറത്തിറങ്ങി. 'നീയറിഞ്ഞോ രാക്കിളി' എന്ന് തുടങ്ങുന്ന ഈ ഗാനം ആലപിച്ചിരിക്കുന്നത് നിഫ ജഹാനും ജോബി തോമസുമാണ്. മുഹാദ് വെമ്പായത്തിന്റെ വരികൾക്ക് കണ്ണൻ സി.ജെ. ആണ് സംഗീതം നൽകിയിരിക്കുന്നത്.

ഗോൾഡൻ വിങ്സ് മീഡിയ പ്രൊഡക്ഷൻസിന്റെ ബാനറിൽ ഡോ. മനോജ് ഗോവിന്ദൻ, ഷിബു നായർ, ജയരാജ് എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. ഒക്ടോബർ 10ന് 'അവൾ' പ്രദർശനത്തിനെത്തുമെന്ന് നിർമ്മാതാക്കൾ അറിയിച്ചു.

നിരഞ്ജന അനൂപ്, കെ.പി.എ.സി. ലളിത, സബിത ജയരാജ്, നിതിൻ രണ്‍ജി പണിക്കർ, ഷൈനി സാറ, മനോജ് ഗോവിന്ദൻ, ഷിബു നായർ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. സച്ചു സജി ഛായാഗ്രഹണം നിർവഹിക്കുന്ന ചിത്രത്തിന്റെ എഡിറ്റിംഗ് ശ്രീജിത്ത് സി.ആർ., കലാസംവിധാനം ജി. ലക്ഷ്മണൻ, മേക്കപ്പ് ലിബിൻ മോഹൻ, വസ്ത്രാലങ്കാരം ഫെമിന ജബ്ബാർ, സൗണ്ട് ഡിസൈൻ വിനോദ് പി. ശിവറാം എന്നിവരാണ് നിർവ്വഹിക്കുന്നത്. ചിത്രത്തിന്റെ പ്രൊഡക്ഷൻ കൺട്രോളർ സജി കോട്ടയം ആണ്.

സിനിമയുടെ സംഗീത സംവിധാനം കണ്ണൻ സി.ജെ.യും ഗാനരചന മുഹാദ് വെമ്പായവുമാണ് നിർവ്വഹിച്ചിരിക്കുന്നത്. പി.ആർ.ഒ.മാരായി വിവേക് വിനയരാജ്, എ.എസ്. ദിനേശ് എന്നിവരും പ്രവർത്തിക്കുന്നു.