മമ്മൂട്ടിക്കും മോഹൻലാലിനൊപ്പമുള്ള ചിത്രം പങ്ക് വെച്ച് ടൊവിനോ; 'വന്‍ മരങ്ങള്‍ക്കിടയി'ലെന്ന് ചിത്രത്തിന്റെ ക്യാപ്‌ഷൻ; 'മുട്ട പഫ്‌സിലെ മുട്ട' യെന്ന് ബേസിൽ ജോസഫ്; രസകരമായ കമന്റ് ഏറ്റെടുത്ത് ആരാധകർ
കൊച്ചി: മോളിവുഡിലെ യുവ താരങ്ങളിൽ ശ്രദ്ധേയരാണ് ടൊവിനോ തോമസും ബേസില്‍ ജോസഫും. ഇരുവരും പരസ്പരം ട്രോളുന്ന വിഡിയോകൾ മുൻപും ആരാധകരിൽ വലിയ ചിരിപടർത്തിയിട്ടുണ്ട്. ടോവിനോയുടെ കരിയറിന് മികച്ചൊരു ബ്രേക്ക് നൽകിയ ചിത്രമായ മിന്നൽ മുരളി സംവിധാനം ചെയ്തതും ബേസില്‍ ജോസഫാണ്. നല്ല സുഹൃത്ത് ബന്ധം സൂക്ഷിക്കുന്ന ഇരുവരുടെയും ഒരുമിച്ചുള്ള അഭിമുഖങ്ങൾ പോലും വലിയ കൈയടിയോടെയാണ് ആരാധകർ സ്വീകരിക്കുന്നത്. ഇപ്പോഴിതാ ടൊവിനോ തന്റെ ഇൻസ്റ്റാഗ്രാമിൽ പോസ്റ്റ് ചെയ്ത ചിത്രത്തിൽ ബേസിൽ ജോസഫ് കുറിച്ച കമന്റാണ് ശ്രദ്ധനേടുന്നത്.
കഴിഞ്ഞ ദിവസമായിരുന്നു ലൂസിഫറിന്റെ രണ്ടാംഭാഗമായ എല്‍2ഇ: എമ്പുരാന്റെ രണ്ടാംഭാഗത്തിന്റെ ടീസര്‍ ലോഞ്ച് ഇവന്റ. മലയാളത്തിലെ പ്രമുഖ താരങ്ങളും സംവിധായകരും ടെക്‌നീഷ്യന്‍സും ഉള്‍പ്പെടെ പരിപാടിയില്‍ പങ്കെടുത്തു. ചിത്രത്തില്‍ പ്രധാനപ്പെട്ട ഒരു കഥാപാത്രത്തെ അവതരിപ്പിക്കുന്ന ടൊവിനോയും ബേസിലും പരിപാടിയില്‍ ശ്രദ്ധേയസാന്നിധ്യമായിരുന്നു. പരിപാടിയില്‍നിന്നുള്ള ടൊവിനോ പങ്ക് വെച്ച ഒരു ചിത്രമാണ് ഇപ്പോള്‍ സാമൂഹികമാധ്യമങ്ങളില്‍ ചര്‍ച്ചാവിഷയം.
ചിത്രത്തിലെ നായകന്‍ മോഹന്‍ലാലിനും ടീസര്‍ ലോഞ്ച് ചെയ്ത മമ്മൂട്ടിയുടേയും പിന്നിലിരിക്കുന്ന ടൊവിനോയും ബേസിലുമായിരുന്നു ചിത്രത്തിലുണ്ടായിരുന്നത്. മമ്മൂട്ടിയുടേയും മോഹന്‍ലാലിന്റെയും ഇടയിലൂടെ പിന്നിലിരിക്കുന്ന ഇരുവരേയും ചിത്രത്തിൽ കാണാമായിരുന്നു. 'വന്‍ മരങ്ങള്‍ക്കിടയില്‍' എന്ന കുറിപ്പോടെയാണ് ടൊവിനോ ഈ ചിത്രം പങ്കുവെച്ചത്. എന്നാൽ ചിത്രത്തിന്റെ കമന്റ് ബോക്സിൽ ബേസിലിന്റെ വക രസകരമായൊരു കമന്റെത്തി. 'മുട്ട പഫ്‌സിലെ മുട്ട' എന്നായിരുന്നു ബേസിലിന്റെ കമന്റ്. സംഭവം നിമിഷനേരം കൊണ്ട് ആരാധകർ ഏറ്റെടുത്തു. കമന്റ് ബോക്‌സില്‍ രസകരമായ മറുപടികളാണ് ലഭിക്കുന്നത്.
