തലയടിച്ച് പൊട്ടിക്കും, അവന് കൊല്ലംകാരെ അറിയില്ല; 'ബ്രോമാന്‍സ്' ഒ.ടി.ടിയിലേക്ക്

കൊച്ചി: അര്‍ജുന്‍ അശോകന്‍, മാത്യു തോമസ്, മഹിമ നമ്പ്യാര്‍ എന്നിവരെ പ്രധാന കഥാപാത്രങ്ങളാക്കി അരുണ്‍ ഡി. ജോസ് സംവിധാനം ചെയ്ത് ഫെബ്രുവരി 14 ന് തിയറ്ററുകളില്‍ എത്തിയ ചിത്രം ബ്രോമാന്‍സ് ഒ.ടി.ടിയിലേക്ക്. എട്ട് കോടി ബജറ്റില്‍ എത്തിയ ചിത്രം 14 ദിവസം കൊണ്ട് ആഗോള ബോക്‌സ് ഓഫീസില്‍ 14.75 കോടി നേടി. സോണി ലിവിലൂടെ മെയ് ഒന്നിന് സ്ട്രീമിങ് ആരംഭിക്കും. മലയാളത്തിന് പുറമെ തമിഴ്, തെലുങ്ക്, ഹിന്ദി ഭാഷകളിലും ചിത്രം കാണാനാവും.

ജോ ആന്‍ഡ് ജോ, 18+ എന്നീ ഹിറ്റ് ചിത്രങ്ങള്‍ക്ക് ശേഷം അരുണ്‍ ഡി. ജോസ് സംവിധാനം ചെയ്ത ചിത്രമാണ് 'ബ്രോമാന്‍സ്'. തോമസ്.പി.സെബാസ്റ്റ്യനും രവീഷ് നാഥും ചേര്‍ന്നാണ് തിരക്കഥ ഒരുക്കിയിരിക്കുന്നത്. ഗോവിന്ദ് വസന്തയുടേതാണ് സംഗീതം. കലാഭവന്‍ ഷാജോണ്‍, ശ്യാം മോഹന്‍ തുടങ്ങിയവും ചിത്രത്തിലെ പ്രധാന കഥാപാത്രങ്ങളായെത്തുന്നുണ്ട്. ആഷിക് ഉസ്മാന്‍ പ്രൊഡക്ഷന്‍സിന്റെ ബാനറില്‍ ആഷിക് ഉസ്മാന്‍ ആണ് ചിത്രം നിര്‍മിച്ചിരിക്കുന്നത്.

സഹോദരങ്ങളായ ഷിന്റോയുടെയും ബിന്റോയുടെയും അവരുടെ ഒരുപറ്റം കൂട്ടുകാരുടെയും കഥയാണ് ബ്രൊമാന്‍സ്. ത്രില്ലര്‍ ചിത്രങ്ങള്‍ക്കും ക്രൈം ത്രില്ലര്‍-റിവഞ്ച് ഡ്രാമകള്‍ക്കുമൊക്കെ ഇടയില്‍ കുറച്ചുകാലമായി മലയാള സിനിമ മിസ്സ് ചെയ്യുന്ന ഒന്നാണ് ചിരിയും കളിയും തമാശയുമൊക്കെയായി പ്രേക്ഷകരെ ഹാപ്പിയാക്കുന്ന കംപ്ലീറ്റ് എന്റര്‍ടെയിനര്‍ ഴോണര്‍ ചിത്രങ്ങള്‍. ആ ഒരു മിസ്സിങ് ആണ് ബ്രോമാന്‍സ് നികത്തുന്നത്.