ഫാമിലി എന്റെർറ്റൈനറുമായി ജയം രവി; 'ബ്രദര്‍'ന്റെ ട്രെയ്‌ലർ പുറത്ത്; ചിത്രം ഒക്ടോബർ 31ന് തിയേറ്ററുകളിലെത്തും
ഒരു ഫാമിലി എന്റെർറ്റൈനറുമായി പ്രേക്ഷകരുടെ മുന്നിലേക്ക് എത്തുകയാണ് ജയൻ രവി. വലിയ തിരിച്ചു വരവാണ് 'ബ്രദര്‍' എന്ന ചിത്രത്തിലൂടെ താരം ലക്ഷ്യമിടുന്നത്. ദീപാവലി റിലീസായി എത്തുന്ന ചിത്രത്തിന്റെ ട്രെയ്‌ലർ പുറത്ത് വിട്ടിരിക്കുകയാണ് അണിയറ പ്രവർത്തകർ. കോമഡി സിനിമകളിലൂടെ മലയാളികൾക്കും സുപരിചിതനായ എം രാജേഷ് ആണ് 'ബ്രദർ'ന്റെ സംവിധാനം നിർവഹിച്ചിരിക്കുന്നത്.
കൂടെ പഠിച്ചവർ വലിയ സ്ഥാനങ്ങളിൽ എത്തിയിട്ടും നിയമ ബിരുദം പോലും പൂർത്തിയാക്കാൻ കഴിയാത്ത യുവാവിന്റെ വേഷമാണ് ചിത്രത്തിൽ ജയം രവി അവതരിപ്പിക്കുന്നത്. കുടുംബ ബന്ധങ്ങൾക്കും പ്രാധാന്യം നൽകി ഒരുക്കുന്ന ചിത്രത്തിൽ ജയം രവിയുടെ സഹോദരിയായി ഭൂമിക ചൗള മറ്റൊരു പ്രധാന വേഷത്തിലെത്തുന്നുണ്ട്. പ്രിയങ്ക മോഹനാണ് സിനിമയിലെ നായിക. ചിത്രം ഒക്ടോബർ 31ന് തീയേറ്ററുകളിൽ എത്തും.
ഹാരിസ് ജയരാജ് ആണ് ചിത്രത്തിന്റെ സംഗീത സംവിധാനം. ശരണ്യ പൊൻവണ്ണൻ, സീത, നടരാജൻ സുബ്രഹ്മണ്യം, അച്യുത് കുമാർ, റാവു രമേശ്, വിടിവി ഗണേഷ്, സതീഷ് കൃഷ്ണൻ, യോഗി ബാബു, റോബോ ശങ്കർ, വൃദ്ധി വിശാൽ എന്നിവർ മറ്റ് പ്രധാന വേഷങ്ങളിൽ എത്തുന്നു.
സൈറണാണ് ജയം രവി നായകനായി ഒടുവില്‍ പ്രദര്‍ശനത്തിന് എത്തിയ ചിത്രം. അനുപമ പരമേശ്വരൻ നായികയായി എത്തിയ ചിത്രത്തില്‍ കീര്‍ത്തി സുരേഷ് ഒരു പോലീസ് ഓഫീസറുടെ കഥാപാത്രത്തെ അവതരിപ്പിച്ചിരുന്നു. ചിത്രം പ്രതീക്ഷക്കൊത്ത വിജയം നേടിയില്ല.
