ഇന്ദ്രജിത്തിന്റെ ക്രൈം ഇന്‍വെസ്റ്റിഗേഷന്‍ ത്രില്ലര്‍ 'ധീരം'; ജിതിന്‍ സുരേഷ് ടി സംവിധാനം ടൈറ്റില്‍ റിവീലിംഗ് ടീസര്‍ പുറത്ത്
ഇന്ദ്രജിത്തിന്റെ ക്രൈം ഇന്‍വെസ്റ്റിഗേഷന്‍ ത്രില്ലര്‍
കൊച്ചി: ഇന്ദ്രജിത്ത് സുകുമാരനെ നായകനാക്കി നവാഗതനായ ജിതിന്‍ സുരേഷ് ടി സംവിധാനം ചെയ്യുന്ന പുതിയ ചിത്രത്തിന്റെ ടൈറ്റില്‍ റിവീലിംഗ് ടീസര്‍ റിലീസ് ചെയ്തു. ക്രൈം ഇന്‍വെസ്റ്റിഗേഷന്‍ ത്രില്ലറായി ഒരുങ്ങുന്ന ചിത്രത്തിന്റെ പേര് 'ധീരം' എന്നാണ്. നിരവധി ഹ്രസ്വചിത്രങ്ങളിലൂടെ പ്രശസ്തനായ ജിതിന്‍ ആദ്യമായി സംവിധാനം ചെയ്യുന്ന ചിത്രം കൂടിയാണ് ധീരം.
ഏറെ കൗതുകമുണര്‍ത്തുന്ന രീതിയിലാണ് ടീസര്‍ ഒരുക്കിയിരിക്കുന്നത്. സിനിമാ മേഖലയിലെ 99പേര് ചേര്‍ന്നാണ് ടീസര്‍ പുറത്തിറക്കിയത്. ചേട്ടന് ആശംസ അറിയിച്ചാണ് പൃഥ്വിരാജ് ടീസര്‍ പങ്കിട്ടത്. മമ്മൂട്ടി, മോഹന്‍ലാല്‍, മഞ്ജു വാരിയര്‍, ലിജോ ജോസ് പെല്ലിശ്ശേരി തുടങ്ങി നിരവധി പേരും സോഷ്യല്‍ മീഡിയ പേജുകളിലൂടെ ടൈറ്റില്‍ റിവിലിംഗ് ടീസര്‍ പുറത്തുവിട്ടിട്ടുണ്ട്.
തീര്‍ത്തും ഒരു ഇന്‍വെസ്റ്റിഗേഷന്‍ ക്രൈം ത്രില്ലര്‍ ചിത്രത്തിന് വേണ്ട സ്വഭാവം ടീസറില്‍ നിന്നും വ്യക്തമാണ്. നോ വേ ഔട്ട് എന്ന ചിത്രത്തിന് ശേഷം റെമൊ എന്റര്‍ടൈന്‍മെന്റ്‌സിന്റെ ബാനറില്‍ റെമോഷ് എം.എസ് ആണ് നിര്‍മ്മാണം.
ഒരേ മുഖം, പുഷ്പക വിമാനം, പട കുതിര എന്നീ ചിത്രങ്ങളുടെ തിരക്കഥ ഒരുക്കിയ ദീപു എസ് നായര്‍, സന്ദീപ് സദാനന്ദന്‍ എന്നിവര്‍ ചേര്‍ന്നാണ് ത്രില്ലര്‍ സ്വഭാവത്തിലുള്ള ചിത്രത്തിന്റെ തിരക്കഥ എഴുതിയിരിക്കുന്നത്. ഇന്ദ്രജിത്തിനൊപ്പം അജു വര്‍ഗ്ഗീസ്, ദിവ്യ പിള്ള, നിഷാന്ത് സാഗര്‍, വിജയരാഘവന്‍, റെബ മോണിക്ക ജോണ്‍ തുടങ്ങിയവരും ചിത്രത്തില്‍ പ്രധാന വേഷത്തിലെത്തുന്നു.
