ഒടിടി റിലീസിനൊരുങ്ങി പ്രണവ് മോഹൻലാൽ ചിത്രം; 'ഡീയസ് ഈറെ' ഡിസംബർ അഞ്ച് മുതൽ; സ്ട്രീമിംഗ് ജിയോ ഹോട്ട്സ്റ്റാറിൽ
കൊച്ചി: പ്രണവ് മോഹൻലാലിനെ നായകനാക്കി രാഹുൽ സദാശിവൻ സംവിധാനം ചെയ്ത ഹൊറർ ത്രില്ലർ ചിത്രം 'ഡീയസ് ഈറെ' ഡിസംബർ അഞ്ച് മുതൽ പ്രമുഖ ഒ.ടി.ടി. പ്ലാറ്റ്‌ഫോമായ ജിയോ ഹോട്ട്സ്റ്റാറിൽ സ്ട്രീമിംഗ് ആരംഭിക്കും. ഒക്ടോബർ 31-ന് തിയേറ്ററുകളിൽ റിലീസ് ചെയ്ത ചിത്രം, മികച്ച പ്രേക്ഷക പ്രതികരണവും സാമ്പത്തിക വിജയവും നേടിയിരുന്നു. പ്രണവ് മോഹൻലാലിന്റെ കരിയറിലെ ആദ്യ ഹൊറർ ചിത്രമെന്ന നിലയിൽ 'ഡീയസ് ഈറെ' ഏറെ ശ്രദ്ധിക്കപ്പെട്ടു.
നൈറ്റ് ഷിഫ്റ്റ് സ്റ്റുഡിയോസ്, വൈ നോട്ട് സ്റ്റുഡിയോസ് എന്നീ ബാനറുകളിൽ ചക്രവര്‍ത്തി രാമചന്ദ്ര, എസ്. ശശികാന്ത് എന്നിവർ ചേർന്നാണ് ചിത്രം നിർമ്മിച്ചത്. രാഹുൽ സദാശിവൻ തന്നെയാണ് ചിത്രത്തിന്റെ സംവിധാനവും തിരക്കഥയും നിർവഹിച്ചത്. 'ഡീയസ് ഈറെ'യിലെ പ്രണവിന്റെ കഥാപാത്രം അദ്ദേഹത്തിന്റെ അഭിനയ ജീവിതത്തിലെ ഏറ്റവും മികച്ച പ്രകടനങ്ങളിലൊന്നായാണ് റിപ്പോർട്ടുകൾ വിലയിരുത്തുന്നത്.
തിയേറ്ററുകളിൽ ആദ്യ ദിനം 4.7 കോടി രൂപ നേടിയ ചിത്രം, രണ്ടാം ദിനം 22 ശതമാനം വർധനവോടെ 5.75 കോടി രൂപയും മൂന്നാം ദിനം 6.35 കോടി രൂപയും കരസ്ഥമാക്കി. നാല്, അഞ്ച് ദിവസങ്ങളിൽ യഥാക്രമം മൂന്ന് കോടിയും 2.50 കോടിയുമാണ് ഇന്ത്യയിൽ നിന്ന് 'ഡീയസ് ഈറെ'യുടെ ബോക്സ് ഓഫീസ് കളക്ഷൻ. ജിബിൻ ഗോപിനാഥ്, ജയ കുറുപ്പ്, അരുൺ അജികുമാർ, ഷൈൻ ടോം ചാക്കോ, സുഷ്മിത ഭട്ട് തുടങ്ങിയവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചു. ക്രിസ്റ്റ് സേവ്യറാണ് പശ്ചാത്തല സംഗീതം ഒരുക്കിയത്.
'ഉഗ്ര കോപത്തിന്റെ ദിനം' എന്ന് അർത്ഥം വരുന്ന ഒരു ലാറ്റിൻ പദമാണ് 'ഡീയസ് ഈറെ'. മരിച്ചവർക്കായി പാടുന്ന ഒരു പുരാതന ലാറ്റിൻ കവിതയെ ഇത് സൂചിപ്പിക്കുന്നു. കാഹളം മുഴക്കി ആത്മാക്കളെ ദൈവസിംഹാസനത്തിനു മുന്നിൽ വിളിച്ചുകൂട്ടുന്ന അന്ത്യവിധിയാണ് ഈ കവിതയിൽ വിവരിക്കുന്നത്; രക്ഷപ്പെടുന്നവരെ മോചിപ്പിക്കുകയും അല്ലാത്തവരെ നിത്യജ്വാലകളിലേക്ക് എറിയുകയും ചെയ്യുന്ന സന്ദർഭത്തെയും ഇത് പ്രതിപാദിക്കുന്നു. പതിമൂന്നാം നൂറ്റാണ്ടിൽ എഴുതപ്പെട്ടതെന്നു കരുതുന്ന ഈ കവിതയുടെ ഉത്ഭവത്തെക്കുറിച്ച് തർക്കങ്ങൾ നിലവിലുണ്ട്.
