വയലന്‍സ് ചിത്രങ്ങളില്‍ അഭിനയിക്കുന്ന താരങ്ങള്‍ ആത്മപരിശോധന നടത്തണം; സിനിമാ പോസ്റ്ററുകളില്‍ ഇന്ന് ചിരിക്കുന്ന ചിത്രങ്ങളില്ലെന്ന് കമല്‍
വയലന്‍സ് ചിത്രങ്ങളില്‍ അഭിനയിക്കുന്ന താരങ്ങള്‍ ആത്മപരിശോധന നടത്തണം
തിരുവനന്തപുരം: സംസ്ഥാനത്ത് വര്‍ധിച്ച അക്രമ സംഭവങ്ങളുടെയും ലഹരി ഉപയോഗത്തിന്റെയും പശ്ചാത്തലത്തില്‍ വയലന്‍സിന്റെ അതിപ്രസരമുള്ള ചിത്രങ്ങള്‍ക്കെതിരെ സംവിധായകന്‍ കമല്‍. യുവാക്കളില്‍ ജനപ്രീതി വര്‍ധിക്കും എന്നതിനാല്‍ വയലന്‍സ് നിറഞ്ഞ കഥാപാത്രങ്ങള്‍ അവതരിപ്പിക്കാനാണ് ഇപ്പോഴത്തെ നായകന്മാര്‍ക്ക് താല്‍പര്യമെന്ന് കമല്‍ പറഞ്ഞു.
ഇത്തരം സിനിമകള്‍ക്ക് നായകന്‍മാര്‍ പെട്ടെന്ന് ഡേറ്റ് നല്‍കുന്നു. സിനിമാ പോസ്റ്ററുകള്‍ക്ക് പണ്ട് ചിരിക്കുന്ന ചിത്രങ്ങളാണ് വേണ്ടിയിരുന്നത്. എന്നാലിപ്പോള്‍ വളരെ കലിപ്പായി നില്‍ക്കുന്ന നായകന്‍മാരെയാണ് കാണുന്നത്. എന്തിനാണ് ഇങ്ങനെയുള്ള കഥാപാത്രങ്ങള്‍ ചെയ്യുന്നതെന്ന് താരങ്ങള്‍ ആത്മപരിശോധന നടത്തണം. നിങ്ങളീ വലിയ സമൂഹത്തെ തെറ്റായ പാതയിലേക്ക് നയിക്കാന്‍ കാരണമാവുന്നുണ്ടെന്നും അദ്ദേഹം പറഞ്ഞു.
സിനിമയാണ് യുവാക്കളെ ഏറ്റവും കൂടുതല്‍ സ്വാധീനിക്കുന്ന മാധ്യമം. കുട്ടികള്‍ക്ക് അനുകരിക്കുന്ന പ്രവണതയുണ്ട്. സിനിമകളില്‍ അടുത്ത കാലത്ത് ഉണ്ടായ വയലന്‍സിന്റെ അതിപ്രസരം കുട്ടികളെ പ്രോല്‍സാഹിപ്പിക്കുന്നുണ്ടെന്നും കമല്‍ വ്യക്തമാക്കി.
