കൊച്ചി: മോഹൻലാൽ നായകനായ ജീത്തു ജോസഫ് ചിത്രം 'ദൃശ്യം 3'യുടെ ആഗോള വിതരണാവകാശങ്ങൾ പ്രമുഖ പ്രൊഡക്ഷൻ-വിതരണ കമ്പനിയായ പനോരമ സ്റ്റുഡിയോസ് സ്വന്തമാക്കി. ചിത്രീകരണം അവസാന ഘട്ടത്തിലേക്ക് കടക്കുന്ന ഈ ത്രില്ലർ സിനിമയുടെ തിയേറ്റർ, ഡിജിറ്റൽ, എയർബോൺ അവകാശങ്ങളാണ് ആശീർവാദ് സിനിമാസിൽ നിന്ന് പനോരമ സ്റ്റുഡിയോസ് വാങ്ങിയത്. ഈ നീക്കം ചിത്രത്തിന്റെ മലയാളം പതിപ്പിന്റെ റിലീസ് വൈകുമോ എന്ന ആശങ്ക ആരാധകർക്കിടയിൽ ഉയർത്തിയിട്ടുണ്ട്.

പനോരമ സ്റ്റുഡിയോസ് പുറത്തുവിട്ട ഔദ്യോഗിക കുറിപ്പിലൂടെയാണ് ആഗോള തിയേറ്റർ അവകാശങ്ങളും ഡിജിറ്റൽ അവകാശങ്ങളും ഉൾപ്പെടെയുള്ളവ സ്വന്തമാക്കിയ വിവരം അറിയിച്ചത്. ഇന്ത്യയിലും വിദേശത്തുമുള്ള വിതരണത്തിന് ഇത് വഴിയൊരുക്കും. 'ദൃശ്യം 3'യുടെ എല്ലാ ഭാഷാ പതിപ്പുകളും ഒരേസമയം തിയേറ്ററുകളിൽ എത്തുമെന്നായിരുന്നു നേരത്തെ പുറത്തുവന്ന റിപ്പോർട്ടുകൾ. എന്നാൽ ഹിന്ദി, തെലുങ്ക് റീമേക്കുകളുടെ നിർമാണം ഇതുവരെ ആരംഭിച്ചിട്ടില്ല.

മലയാളം പതിപ്പ് ആദ്യം പുറത്തിറങ്ങുമെന്നും മറ്റ് റീമേക്കുകൾ പിന്നീട് എത്തുമെന്നും അഭ്യൂഹങ്ങൾ പ്രചരിക്കുന്നുണ്ട്. അതേസമയം, നിർമ്മാതാക്കളുടെ ഭാഗത്തുനിന്ന് റിലീസ് തന്ത്രത്തെക്കുറിച്ച് ഔദ്യോഗിക പ്രഖ്യാപനങ്ങളൊന്നും ഇതുവരെ ഉണ്ടായിട്ടില്ല. ഇത് റിലീസ് തീയതി സംബന്ധിച്ച അനിശ്ചിതത്വം വർദ്ധിപ്പിക്കുന്നു.

2013-ൽ ആദ്യഭാഗം തിയേറ്ററുകളിലും 2021-ൽ രണ്ടാം ഭാഗം ആമസോൺ പ്രൈം വീഡിയോ വഴിയും പുറത്തിറങ്ങിയ 'ദൃശ്യം' ഫ്രാഞ്ചൈസി മലയാളത്തിലെ എക്കാലത്തെയും വലിയ വിജയങ്ങളിൽ ഒന്നാണ്. കേബിൾ ടി.വി ശൃംഖല ഉടമയായ ജോർജുകുട്ടി എന്ന കഥാപാത്രം തന്റെ കുടുംബത്തെ സംരക്ഷിക്കാൻ നടത്തുന്ന പോരാട്ടമാണ് ചിത്രത്തിന്റെ പ്രമേയം. നിരൂപക പ്രശംസയും ജനപ്രീതിയും ഒരുപോലെ നേടിയ ചിത്രത്തിന്റെ മൂന്നാം ഭാഗത്തിനായി ആകാംഷയോടെ കാത്തിരിക്കുകയാണ് പ്രേക്ഷകർ.

മോഹൻലാൽജീത്തു ജോസഫ്ദൃശ്യം

സ്വന്തം ലേഖകൻ