‘എമ്പുരാനേ... എമ്പുരാനേ...’; തീയേറ്ററുകൾ കുലുക്കിയ ഗാനം; എമ്പുരാനിലെ പ്രേക്ഷകര്‍ കാത്തിരുന്ന ഗാനം പുറത്തിറങ്ങി
കൊച്ചി: പൃഥ്വിരാജ് സുകുമാരൻ മോഹൻലാലിനെ കേന്ദ്രകഥാപാത്രമാക്കി സംവിധാനം എമ്പുരാൻ തീയേറ്ററുകളിൽ പ്രദർശനം തുടരുകയാണ്. മലയാളത്തിലെ ഏറ്റവും കളക്ഷൻ നേടിയ ചിത്രമെന്ന റെക്കോർഡ് ഇതിനോടകം ചിത്രം സ്വന്തമാക്കി കഴിഞ്ഞു. റിലീസാകുന്നതിന് മുന്നേ തന്നെ പ്രേക്ഷക മനസ്സുകളിൽ ഇടം നേടാൻ ചിത്രത്തിലെ 'എമ്പുരാനേ' എന്ന ടൈറ്റിൽ ഗാനത്തിനായി. ഇപ്പോഴിതാ ഗാനം ഇപ്പോള്‍ റിലീസ് ചെയ്തിരിക്കുന്നത്. ഗാനം പുറത്തിറങ്ങിയ വിവരം മോഹന്‍ലാലും, പൃഥ്വിരാജും തങ്ങളുടെ സോഷ്യല്‍മീഡിയാ പേജുകളിലൂടെ അറിയിച്ചു. എമ്പുരാനിലെ പലഭാഗങ്ങളാണ് വീഡിയോയില്‍ ഉള്‍പ്പെടുത്തിയിട്ടുള്ളത്.
പാട്ടിന്റെ യൂട്യൂബ് ലിങ്ക് ഉള്‍പ്പെടെ നല്‍കിക്കൊണ്ടാണ് പോസ്റ്റ്. ദീപക് ദേവ് സംഗീതം നല്‍കിയ ഗാനം എഴുതിയത് വിനായക് ശശികുമാറാണ്. ആനന്ദ് ശ്രീരാജ്, അലങ്കൃത മേനോന്‍, പൃഥ്വിരാജ് എന്നിവരാണ് ആലപിച്ചിരിക്കുന്നത്. പൃഥ്വിരാജിന്റെ മകള്‍ അലങ്കൃത ചിത്രത്തില്‍ ഗാനം ആലപിച്ചിട്ടുണ്ടെന്ന വിവരം നേരത്തേ പുറത്തുവന്നിരുന്നു. എമ്പുരാനേ എന്ന ഭാഗം ആലപിച്ചതില്‍ ഏറ്റവും ഹൃദ്യമായത് അലങ്കൃതയുടേതാണെന്ന അഭിപ്രായമാണ് പ്രേക്ഷകര്‍ക്ക്. ഒടുവിലിതാ തിയേറ്ററില്‍ സിനിമ കണ്ടവര്‍ക്ക് പുറമെ ഏവരിലേക്കും എമ്പുരാനേ എന്ന ഗാനം എത്തിയിരിക്കുകയാണ്. ശ്രീ ഗോകുലം മൂവീസ്, ആശീര്‍വാദ് സിനിമാസ്, ലൈക്ക പ്രൊഡക്ഷന്‍സ് എന്നിവയുടെ ബാനറില്‍ ഗോകുലം ഗോപാലന്‍, ആന്റണി പെരുമ്പാവൂര്‍, സുഭാസ്‌കരന്‍ എന്നിവര്‍ ചേര്‍ന്നാണ് എമ്പുരാന്‍ നിര്‍മിച്ചത്. മുരളി ഗോപി രചന നിര്‍വഹിച്ച ചിത്രം മലയാള സിനിമയുടെ ചരിത്രത്തിലെ ആദ്യത്തെ ഐമാക്സ് റിലീസായി എത്തിയ സിനിമകൂടിയാണ്.
മലയാളം, തമിഴ്, ഹിന്ദി, തെലുങ്ക്, കന്ന‍‍ഡ എന്നീ ഭാഷകളിലാണ് സിനിമ പ്രദർശനത്തിനെത്തിയത്. പൃഥ്വിരാജ്, മഞ്ജു വാര്യർ, ടൊവിനോ തോമസ്, ഇന്ദ്രജിത് സുകുമാരൻ, സുരാജ് വെഞ്ഞാറമൂട്, ജെറോം ഫ്ലിൻ, ബൈജു , സായ്‌കുമാർ, ആൻഡ്രിയ ടിവാടർ, അഭിമന്യു സിങ്, സാനിയ ഇയ്യപ്പൻ, ഫാസിൽ, സച്ചിൻ ഖഡ്കർ, നൈല ഉഷ, ജിജു ജോൺ, നന്ദു, മുരുകൻ മാർട്ടിൻ, ശിവജി ഗുരുവായൂർ, മണിക്കുട്ടൻ, അനീഷ് ജി മേനോൻ, ശിവദ, അലക്സ് ഒനീൽ, എറിക് എബണി, കാർത്തികേയ ദേവ്, മിഹയേല് നോവിക്കോവ്, കിഷോർ, സുകാന്ത്, ബെഹ്‌സാദ്‌ ഖാൻ, നിഖാത് ഖാൻ, സത്യജിത് ശർമ്മ, നയൻ ഭട്ട്, ശുഭാംഗി, ജൈസ് ജോസ് തുടങ്ങി വമ്പൻ താരനിരയാണ് അണിനിരക്കുന്നത്. ഗെയിം ഓഫ് ത്രോൺസിലൂടെ ലോക പ്രശസ്തനായ ജെറോം ഫ്‌ളിന്നിന്റെ സാന്നിധ്യം ചിത്രത്തിന്റെ താരനിരക്ക് നൽകിയത് ഒരു ഇന്റർനാഷണൽ അപ്പീലാണ്.
2023 ഒക്ടോബർ 5 ന് ഫരീദാബാദിൽ ചിത്രീകരണം ആരംഭിച്ച എമ്പുരാൻ, യുണൈറ്റഡ് സ്റ്റേറ്റ്സ്, യു കെ, യുഎഇ , ചെന്നൈ, മുംബൈ, ഗുജറാത്ത്, ലഡാക്ക്, കേരളം, ഹൈദരാബാദ്, ഷിംല, ലേ എന്നിവയുൾപ്പെടെ വിവിധ സ്ഥലങ്ങളിൽ ആയാണ് ഒരുക്കിയത്. ചിത്രത്തിന്റെ ഛായാഗ്രഹണം സുജിത് വാസുദേവും, എഡിറ്റിംഗ് നിർവഹിച്ചത് അഖിലേഷ് മോഹനുമാണ്. മോഹൻദാസ് കലാസംവിധാനം നിർവഹിച്ച ചിത്രത്തിന് ആക്ഷൻ ഒരുക്കിയത് സ്റ്റണ്ട് സിൽവയാണ്. നിർമ്മൽ സഹദേവ് ആണ് ചിത്രത്തിന്റെ ക്രീയേറ്റീവ് ഡയറക്ടർ. പൂർണ്ണമായും അനാമോർഫിക് ഫോർമാറ്റിൽ ഷൂട്ട് ചെയ്ത ചിത്രത്തിന്റെ മൂന്നാം ഭാഗവും ഇതേ ഫോർമാറ്റിൽ തന്നെയാവും ഒരുക്കുക എന്നും സംവിധായകൻ പൃഥ്വിരാജ് വെളിപ്പെടുത്തുകയും ചെയ്തിരുന്നു.
