വിവിധ സംസ്ഥാനങ്ങളിലെ ആയോധന കലാരൂപങ്ങളെയും ആചാരങ്ങളെയും കോര്‍ത്തിണക്കിയൊരുക്കിയ ഗാനം; 'റണ്‍ ഇറ്റ് അപ്പ്'; ആസ്വാദക ഹൃദയങ്ങള്‍ കീഴടക്കി ഹനുമാന്‍ കൈന്‍ഡിന്റെ പുതിയ സംഗീത വിഡിയോ
മുംബൈ: ബിഗ് ഡോഗ്‌സിന് ശേഷം സംഗീതപ്രേമികള്‍ക്കിടയില്‍ തരംഗം സൃഷ്ടിച്ച് ഹനുമാന്‍ കൈന്‍ഡിന്റെ പുത്തന്‍ സംഗീത വിഡിയോ. ഇന്ത്യന്‍ പാരമ്പര്യം സംസ്‌കാരം കലാവൈവിധ്യങ്ങള്‍ എന്നിവയൊക്കെ ലോകത്തിനു മുമ്പില്‍ അവതരിപ്പിക്കുകയാണ് ഹനുമാന്‍കൈന്‍ഡ് ഗാനത്തിലൂടെ. 'റണ്‍ ഇറ്റ് അപ്പ്' എന്ന പേരിലാണ് ഗാനം ഒരുക്കിയിരിക്കുന്നത്. വിവിധ സംസ്ഥാനങ്ങളിലെ ആയോധന കലാരൂപങ്ങളെയും ആചാരങ്ങളെയും കോര്‍ത്തിണക്കിയൊരുക്കിയ ഗാനം ചുരുങ്ങിയ സമയത്തിനകം ആസ്വാദകഹൃദയങ്ങള്‍ കീഴടക്കിക്കഴിഞ്ഞു.
ആധുനിക ഹിപ്‌ഹോപ് ബീറ്റുകളുടെയും പരമ്പരാഗത സംഗീതത്തിന്റെയും അതുല്യമായ ഒരു മിശ്രിതമാണ് ഈ പാട്ട്. പാരമ്പര്യം, പ്രതികൂല സാഹചര്യങ്ങള്‍, പ്രചോദനം എന്നീ വിഷയങ്ങളെ സ്പര്‍ശിച്ചുകൊണ്ടാണ് 'റണ്‍ ഇറ്റ് അപ്പ്' പോവുന്നത്. അതിനായി വളരെ ശക്തമായ വരികളാണ് ഹനുമാന്‍കൈന്‍ഡ് ഉപയോ?ഗിച്ചിരിക്കുന്നത്. ദാരിദ്ര്യം നിറഞ്ഞ കാലത്ത് ഒരു നാട് അതിനെ തരണം ചെയ്യുന്നതും, സ്വന്തം വളര്‍ച്ചയിലൂടെ മറ്റു നാടുകളെയും പോറ്റുന്ന തരത്തിലേക്ക് ഉയരുമ്പോള്‍ ആ നാടും നാട്ടുകാരും നേരിട്ട പ്രശ്‌നങ്ങളും അവരുടെ പോരാട്ടങ്ങളും എല്ലാം ഗാനത്തിലൂടെ അവതരിപ്പിക്കാന്‍ ശ്രമിച്ചിട്ടുണ്ട്. മുന്നേ പോയവര്‍ തെളിച്ച മാര്‍ഗങ്ങളില്‍ നിന്നും വഴിവെട്ടി മുന്നോട്ടുപോകുന്ന ഒരു തലമുറയുടെ സ്വപ്‌നങ്ങളും ഇനി വരാന്‍ പോകുന്നവര്‍ക്കുള്ള ഊര്‍ജവും പാട്ടില്‍ നിറയുന്നു.
ബിജോയ് ഷെട്ടി സംവിധാനം ചെയ്ത മ്യൂസിക് വീഡിയോയില്‍ കളരിപ്പയറ്റ്, ഗട്ക, താങ് ടാ എന്നിവയുള്‍പ്പെടെ നിരവധി പരമ്പരാഗത ഇന്ത്യന്‍ ആയോധനകലകള്‍ പ്രദര്‍ശിപ്പിക്കുന്നു. ജന്മജ്ലിയ ഡറോസ് ആണ് പാട്ടിനു വേണ്ടി ക്യാമറ കൈകാര്യം ചെയ്തിരിക്കുന്നത്. ബ്രൗണ്‍ ക്രൂ പ്രൊഡക്ഷന്‍ ഹൗസിന്റെ ബാനറില്‍ വാസിം ഹൈദറും അനമയ് പ്രകാശും ചേര്‍ന്ന് മ്യൂസിക് വിഡിയോ നിര്‍മിച്ചിരിക്കുന്നു.
