'ചിതറി പതറി നിൽക്കുന്നൊരു അവസ്ഥയിലാണ് ഞാൻ'; ഓണം തൂക്കാൻ മോഹൻലാൽ-സത്യൻ അന്തിക്കാട് കൂട്ടുകെട്ട്; 'ഹൃദയപൂർവ്വം' ട്രെയ്‌ലർ പുറത്ത്
കൊച്ചി: പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന മോഹൻലാൽ-സത്യൻ അന്തിക്കാട് ചിത്രം 'ഹൃദയപൂർവ്വ'ത്തിൻ്റെ ട്രെയ്‌ലർ പുറത്തിറങ്ങി. ഓണം റിലീസായി ഈ മാസം 28-ന് തിയേറ്ററുകളിലെത്തുന്ന ചിത്രം, ഒരു സമ്പൂർണ്ണ ഫീൽ ഗുഡ് എൻ്റർടെയ്നർ ആയിരിക്കുമെന്ന വ്യക്തമായ സൂചന നൽകുന്നതാണ് പുതിയ ട്രെയ്‌ലർ.
1.51 മിനിറ്റ് ദൈർഘ്യമുള്ള ട്രെയ്‌ലറിൽ സമീപകാല കഥാപാത്രങ്ങളിൽ നിന്ന് വ്യത്യസ്തമായ ഭാവപ്പകർച്ചകളോടെയാണ് മോഹൻലാൽ പ്രത്യക്ഷപ്പെടുന്നത്. ചിത്രത്തിൻ്റെ മുൻപ് പുറത്തിറങ്ങിയ ടീസറിനും മറ്റ് പ്രൊമോഷണൽ മെറ്റീരിയലുകൾക്കും ലഭിച്ച മികച്ച സ്വീകാര്യതയ്ക്ക് പിന്നാലെയാണ് ട്രെയ്‌ലർ എത്തിയിരിക്കുന്നത്.
ഇടവേളയ്ക്ക് ശേഷം മോഹൻലാൽ-സത്യൻ അന്തിക്കാട് ടീം വീണ്ടും ഒന്നിക്കുന്നു എന്നതാണ് 'ഹൃദയപൂർവ്വ'ത്തിൻ്റെ പ്രധാന ആകർഷണം. ആശിർവാദ് സിനിമാസിൻ്റെ ബാനറിൽ ആൻ്റണി പെരുമ്പാവൂറാണ് ചിത്രം നിർമ്മിക്കുന്നത്. മാളവിക മോഹനൻ ഒരു പ്രധാന കഥാപാത്രത്തെ അവതരിപ്പിക്കുമ്പോൾ സിദ്ദിഖ്, ബാബുരാജ്, സബിതാ ആനന്ദ് എന്നിവരും താരനിരയിലുണ്ട്.
ഏറെക്കാലത്തിന് ശേഷം കേരളത്തിന് പുറത്ത് ചിത്രീകരിക്കുന്ന സത്യൻ അന്തിക്കാട് സിനിമ എന്ന പ്രത്യേകതയും ഇതിനുണ്ട്. പൂനെയാണ് ചിത്രത്തിൻ്റെ പ്രധാന കഥാപശ്ചാത്തലം. ബന്ധങ്ങളുടെ മൂല്യം പറയുന്ന, നർമ്മവും വൈകാരിക മുഹൂർത്തങ്ങളും സമന്വയിപ്പിക്കുന്ന ഒരു ചിത്രമായിരിക്കുമെന്ന് സംവിധായകൻ മുൻപ് വ്യക്തമാക്കിയിരുന്നു. അഖിൽ സത്യൻ്റേതാണ് കഥ. ടി.പി. സോനു എന്ന നവാഗതൻ തിരക്കഥ ഒരുക്കുമ്പോൾ സംഗീതം ജസ്റ്റിൻ പ്രഭാകറും ഛായാഗ്രഹണം അനു മൂത്തേടത്തും നിർവഹിക്കുന്നു.
