മീരാ വാസുദേവ്, ധ്യാൻ ശ്രീനിവാസൻ പ്രധാന വേഷങ്ങളിൽ; രാജേഷ് അമനകര ഒരുക്കുന്ന ഫാമിലി എന്റർടെയ്‌നർ ചിത്രം 'കല്യാണമരം'; ചിത്രീകരണം പൂർത്തിയായി
കൊച്ചി: മീരാ വാസുദേവ്, ധ്യാൻ ശ്രീനിവാസൻ, ആതിര പട്ടേൽ, ദേവനന്ദ ജിബിൻ എന്നിവരെ പ്രധാന കഥാപാത്രങ്ങളാക്കി സംവിധായകൻ രാജേഷ് അമനകര ഒരുക്കുന്ന ഫാമിലി എന്റർടെയ്‌നർ ചിത്രം 'കല്യാണമരം' ചിത്രീകരണം പൂർത്തിയാക്കി. മറിയം സിനിമാസിന്റെ ബാനറിൽ ഒരുങ്ങുന്ന ഈ ചിത്രം പാല, തൊടുപുഴ, മുളന്തുരുത്തി തുടങ്ങിയ പ്രദേശങ്ങളിലായാണ് പ്രധാനമായും ചിത്രീകരിച്ചത്.
ചിരിയും ചിന്തയും സമ്മാനിക്കുന്ന ഒരു വ്യത്യസ്ത കുടുംബകഥയാണ് 'കല്യാണമരം' പറയുന്നത്. നർമ്മത്തിൽ ചാലിച്ച് കുടുംബബന്ധങ്ങളുടെ ആഴവും ഊഷ്മളതയും വരച്ചുകാട്ടുന്ന ഈ ചിത്രം എല്ലാത്തരം പ്രേക്ഷകരെയും ഒരുപോലെ രസിപ്പിക്കുമെന്നും ആകർഷിക്കുമെന്നും അണിയറപ്രവർത്തകർ ഉറപ്പുനൽകുന്നു.
ധ്യാൻ ശ്രീനിവാസൻ, മീരാ വാസുദേവ്, ആതിര പട്ടേൽ, ദേവനന്ദ ജിബിൻ എന്നിവർക്ക് പുറമെ പ്രശാന്ത് മുരളി, മനോജ് കെ.യു, പ്രബിൻ ബാലൻ, നസീർ കൂത്തുപറമ്പ്, അമൽ രാജ് ദേവ്, ഓമനയമ്മ തുടങ്ങിയ പ്രമുഖ താരങ്ങളും ചിത്രത്തിൽ പ്രധാന വേഷങ്ങളിലെത്തുന്നുണ്ട്. ചിത്രത്തിന്റെ നിർമാതാവായ സജി കെ. ഏലിയാസ് ഒരു പരിസ്ഥിതി പ്രവർത്തകന്റെ കഥാപാത്രത്തെയും സിനിമയിൽ അവതരിപ്പിക്കുന്നു എന്നത് ഈ ചിത്രത്തിന്റെ ഒരു പ്രത്യേകതയാണ്.
ചിത്രത്തിന്റെ സാങ്കേതിക വിഭാഗവും ശ്രദ്ധേയമാണ്. ഛായാഗ്രഹണം രജീഷ് രാമനും കഥ വിദ്യ രാജേഷും സംഭാഷണം പ്രദീപ് കെ. നായരും നിർവഹിച്ചിരിക്കുന്നു. ഷാജി പട്ടിക്കരയാണ് പ്രൊഡക്ഷൻ കൺട്രോളർ. സഹസ് ബാല കലാസംവിധാനവും രതിൻ രാധാകൃഷ്ണൻ എഡിറ്റിംഗും കൈകാര്യം ചെയ്യുന്നു. സംഗീതം അജയ് ജോസഫും ഗാനരചന സന്തോഷ് വർമ്മയും നിർവഹിച്ചു. റഹീം കൊടുങ്ങല്ലൂർ മേക്കപ്പും രാധാകൃഷ്ണൻ മങ്ങാട് വസ്ത്രാലങ്കാരവും ഒരുക്കി.
പ്രൊഡക്ഷൻ എക്‌സിക്യൂട്ടീവ് നസീർ കൂത്തുപറമ്പും പി.ആർ.ഓ പി.ആർ. സുമേരനുമാണ്. പ്രതീഷ് കൃഷ്ണ ചീഫ് അസോസിയേറ്റ് ഡയറക്ടറായും നിഖിൽ പ്രേംരാജ് ക്രിയേറ്റീവ് ഡയറക്ടറായും പ്രവർത്തിക്കുന്നു. എം.എസ്. നിതിൻ അസോസിയേറ്റ് ഡയറക്ടറും അർജുൻ കേശവൻ ബാബു, നിഹാൽ എന്നിവർ അസിസ്റ്റന്റ് ഡയറക്ടർമാരുമാണ്. സ്റ്റിൽസ് ഗിരിശങ്കറും പബ്ലിസിറ്റി ഡിസൈൻസ് ജിസൻ പോളും നിർവഹിച്ചിരിക്കുന്നു.
