തീയേറ്ററിൽ എത്തി നാലാഴ്ച പൂർത്തിയായില്ല; സൂര്യയുടെ ബിഗ് ബഡ്ജറ്റ് ചിത്രം ഒടിടിയിലേക്ക്; 'കങ്കുവ' യുടെ ഔദ്യോഗിക പ്രഖ്യാപനമെത്തി
ചെന്നൈ: വൻ ഹൈപ്പോടെ തീയേറ്ററുകളിലെത്തിയ സൂര്യയുടെ ബിഗ് ബഡ്ജറ്റ് ചിത്രമായിരുന്നു 'കങ്കുവ'. സൂര്യയുടെ കരിയറിലെ ഏറ്റവും വലിയ വിജയം ആകുമെന്ന് പ്രതീക്ഷിച്ച ചിത്രം ബോക്സ് ഓഫിസിൽ തകർന്ന് വീഴുകയായിരുന്നു. മുടക്ക് മുതൽ നേടാൻ പോലും ചിത്രത്തിനായില്ല എന്നാണ് റിപ്പോർട്ടുകൾ സൂചിപ്പിക്കുന്നത്. ആദ്യ ദിനം മുതല്‍ ചിത്രത്തിന് തീര്‍ത്തും നെഗറ്റീവ് റിപ്പോര്‍ട്ടുകളാണ് ലഭിച്ചത്. റിപ്പോര്‍ട്ട് പ്രകാരം 2024ല്‍ ഏറ്റവും വലിയ രണ്ടാമത്തെ ബോക്സോഫീസ് പരാജയമാണ് കങ്കുവ എന്നാണ് കണക്കുകൾ. സൂര്യ നായകനായി എത്തിയ പടത്തിന്റെ ബജറ്റ് 350 കോടിയാണെന്നാണ് റിപ്പോർട്ട്. നിലവിലെ കണക്ക് പ്രകാരം 127.64 കോടി മാത്രമാണ് ഇതുവരെ കങ്കുവയ്ക്ക് നേടാനായിട്ടുള്ളത്.
ഇപ്പോഴിതാ നാല് ആഴ്ച പോലും പൂര്‍ത്തിയാക്കുംമുന്‍പേ ചിത്രം ഒടിടിയില്‍ സ്ട്രീമിംഗ് ആരംഭിക്കുമെന്ന് പ്രഖ്യാപിച്ചിരിക്കുകയാണ് ആമസോണ്‍ പ്രൈം വീഡിയോ. ഈ മാസം 8 ന് ചിത്രം ആമസോണ്‍ പ്രൈം വീഡിയോയില്‍ സ്ട്രീമിംഗ് ആരംഭിക്കും. തമിഴിന് പുറമെ തെലുങ്ക്, മലയാളം, കന്നഡ ഭാഷകളിലും ചിത്രം കാണാനാവും. തീയേറ്ററുകളിൽ കാണാൻ ആളില്ലാതായതോടെ പറഞ്ഞതിലും നേരത്തെയുള്ള ചിത്രത്തിന്റെ ഒടിടി റിലീസ്.
സ്റ്റുഡിയോ ഗ്രീനിന്റെ ബാനറില്‍ കെ ഇ ജ്ഞാനവേല്‍ രാജ, യു വി ക്രിയേഷന്‍സിന്റെ ബാനറില്‍ വംശി പ്രമോദ് എന്നിവര്‍ ചേര്‍ന്നാണ് ചിത്രം നിര്‍മിച്ചത്. സൂര്യ ഇരട്ട വേഷത്തിലെത്തുന്ന ചിത്രത്തില്‍ ബോബി ഡിയോള്‍ ആണ് പ്രതിനായകനായി എത്തുന്നത്. കാര്‍ത്തിയുടെ ഗസ്റ്റ് റോളും പ്രേക്ഷകര്‍ക്ക് സര്‍പ്രൈസ് ആയിരുന്നു. ശിവയുടേത് തന്നെയാണ് ചിത്രത്തിന്റെ തിരക്കഥയും. ദേവി ശ്രീ പ്രസാദ് ആണ് സംഗീത സംവിധായകന്‍. ഛായാഗ്രഹണം വെട്രി പളനിസാമി.പിരീഡ് ആക്ഷന്‍ ഡ്രാമ വിഭാഗത്തിലായാണ് ചിത്രം ഒരുക്കിയിരിക്കുന്നത്.
