തിരുവനന്തപുരം: വിഖ്യാത സംവിധായകൻ ഡോ. ബിജു ഒരുക്കിയ 'പപ്പ ബുക്ക' എന്ന ചിത്രം ഈ വർഷത്തെ കേരള രാജ്യാന്തര ചലച്ചിത്രോത്സവത്തിൽ (ഐ.എഫ്.എഫ്.കെ.) കേരള പ്രീമിയറിന് എത്തുന്നു. ഡിസംബർ 12 മുതൽ 19 വരെ നടക്കുന്ന മേളയുടെ ലോക സിനിമാ വിഭാഗത്തിലാണ് ഈ ചിത്രം പ്രദർശിപ്പിക്കുക. പപ്പുവ ന്യൂ ഗിനിയുടെ ചരിത്രത്തിലെ ആദ്യത്തെ ഔദ്യോഗിക ഓസ്കാർ എൻട്രിയെന്ന സവിശേഷതയും 'പപ്പ ബുക്ക'യ്ക്കുണ്ട്. ഒരു ഇന്ത്യൻ സംവിധായകൻ ഒരുക്കിയ ചിത്രം മറ്റൊരു രാജ്യത്തെ പ്രതിനിധീകരിച്ച് ഓസ്കാറിനായി തിരഞ്ഞെടുക്കപ്പെടുന്നത് ഇത് ആദ്യമായാണ്.

മികച്ച വിദേശഭാഷാ ചിത്രത്തിനുള്ള ഓസ്കാർ പുരസ്കാരത്തിനായി പപ്പുവ ന്യൂ ഗിനിയുടെ പ്രത്യേക സെലക്ഷൻ കമ്മിറ്റിയാണ് 'പപ്പ ബുക്ക'യെ തിരഞ്ഞെടുത്തത്. ഇന്ത്യയും പപ്പുവ ന്യൂ ഗിനിയും സംയുക്തമായി നിർമ്മിച്ച ഈ ചിത്രം പൂർണ്ണമായും പപ്പുവ ന്യൂ ഗിനിയിലാണ് ചിത്രീകരിച്ചിരിക്കുന്നത്. പപ്പുവ ന്യൂ ഗിനിയൻ ഭാഷയായ ടോക് പിസിനൊപ്പം ഹിന്ദി, ബംഗാളി, ഇംഗ്ലീഷ് ഭാഷകളും ചിത്രത്തിൽ ഉപയോഗിച്ചിട്ടുണ്ട്.

പപ്പുവ ന്യൂ ഗിനിയൻ നിർമ്മാണ കമ്പനിയായ നാഫയുടെ ബാനറിൽ നോലെന തൌലാ വുനം, ഇന്ത്യൻ നിർമ്മാതാക്കളായ അക്ഷയ് കുമാർ പരിജ (അക്ഷയ് പരിജ പ്രൊഡക്ഷൻസ്), പാ രഞ്ജിത്ത് (നീലം പ്രൊഡക്ഷൻസ്), പ്രകാശ് ബാരെ (സിലിക്കൺ മീഡിയ) എന്നിവരാണ് ചിത്രം നിർമ്മിച്ചത്. 85 വയസ്സുള്ള പപ്പുവ ന്യൂ ഗിനിയിലെ ട്രൈബൽ വിഭാഗത്തിൽ നിന്നുള്ള സിനെ ബൊബോറോ ആണ് ചിത്രത്തിലെ പ്രധാന കഥാപാത്രമായ പപ്പ ബുക്കയെ അവതരിപ്പിക്കുന്നത്.

ഇന്ത്യയിൽ നിന്ന് പ്രശസ്ത ബംഗാളി നടി റിതാഭാരി ചക്രബർത്തിയും മലയാളി നടൻ പ്രകാശ് ബാരെയും പ്രധാന വേഷങ്ങളിലുണ്ട്. ജോൺ സൈക്, ബാർബറ അനാറ്റു, ജേക്കബ് ഒബുരി, സാന്ദ്രാ ദാവുമ, ക്ലെമന്റ് ജിമാ, മാക്സ് മാസോ തുടങ്ങിയവരാണ് മറ്റ് അഭിനേതാക്കൾ. മൂന്നു തവണ ഗ്രാമി പുരസ്കാരം നേടിയ റിക്കി കേജ് സംഗീതം ഒരുക്കിയ ചിത്രത്തിന്റെ ഛായാഗ്രഹണം യെദു രാധാകൃഷ്ണനും സഹതിരക്കഥ ദാനിയൽ ജോനർദഗ്ട്ടും എഡിറ്റിംഗ് ഡേവിസ് മാനുവലുമാണ് നിർവഹിച്ചിരിക്കുന്നത്.

ഡോ ബിജുപപ്പ ബുക്കഐ എഫ് എഫ് കെ

സ്വന്തം ലേഖകൻ