'ഞാൻ ഗ്യാപ്പിട്ടല്ലേ നിന്നത്, അവൾ വീഡിയോ ഒന്നും എടുത്തിട്ടില്ല'; നാദിർഷയും വിഷ്ണു ഉണ്ണികൃഷ്ണനും വീണ്ടും ഒന്നിക്കുന്ന 'മാജിക് മഷ്റൂംസ്'; രസകരമായ ടീസർ പുറത്ത്
കൊച്ചി: കട്ടപ്പനയിലെ ഋത്വിക് റോഷന് ശേഷം നാദിർഷയും വിഷ്ണു ഉണ്ണികൃഷ്ണനും വീണ്ടും ഒന്നിക്കുന്ന 'മാജിക് മഷ്റൂംസ്' ടീസർ പുറത്തിറങ്ങി. ഈ മാസം 23-ന് ചിത്രം തിയേറ്ററുകളിൽ പ്രദർശനത്തിനെത്തും. സമകാലീന സംഭവങ്ങളെ ആസ്പദമാക്കി ഒരുക്കിയ മുഴുനീള ഫാമിലി-കോമഡി എന്റർടെയ്നറായിരിക്കും ഈ ചിത്രമെന്നാണ് പുറത്തിറങ്ങിയ ടീസർ നൽകുന്ന സൂചന. ചിത്രത്തിന്റെ ട്രെയിലർ ഇതിനകം പ്രേക്ഷകർക്കിടയിൽ ശ്രദ്ധ നേടിയിരുന്നു.
മലയാളത്തിന്റെ വാനമ്പാടി കെ.എസ്. ചിത്രയും റിമി ടോമിയും ആദ്യമായി ഒന്നിച്ചു പാടിയ 'ആരാണേ ആരാണേ...' എന്ന് തുടങ്ങുന്ന ഗാനം ഏറെ ശ്രദ്ധ നേടിയിരുന്നു. ശ്രേയ ഘോഷാലും ഹനാൻ ഷായും ചേർന്നു പാടിയ 'തലോടി മറയുവതെവിടെ നീ...', ശങ്കർ മഹാദേവൻ ആലപിച്ച 'ഒന്നാം കുന്നിൻ' എന്നീ ഗാനങ്ങളും ഇതിനോടകം ജനപ്രിയമായിട്ടുണ്ട്. കെ.എസ്. ചിത്ര, ശങ്കർ മഹാദേവൻ, ശ്രേയാ ഘോഷാൽ, വിനീത് ശ്രീനിവാസൻ, ജാസി ഗിഫ്റ്റ്, ഹനാൻ ഷാ, റിമി ടോമി, രഞ്ജിനി ജോസ്, ഖദീജ നാദിർഷ തുടങ്ങി നിരവധി പ്രമുഖ ഗായകർ ചിത്രത്തിനായി ശബ്ദം നൽകിയിട്ടുണ്ട്.
അക്ഷയ ഉദയകുമാറാണ് ചിത്രത്തിലെ നായിക. ഹരിശ്രീ അശോകൻ, അജു വർഗീസ്, ജോണി ആന്റണി, ജാഫർ ഇടുക്കി, ബോബി കുര്യൻ, സിദ്ധാർത്ഥ് ഭരതൻ, അഷറഫ് പിലാക്കൽ, പ്രമോദ് വെളിയനാട്, അബിൻ ബിനോ, അരുൺ പുനലൂർ, ശാന്തിവിള ദിനേശ്, മീനാക്ഷി ദിനേശ്, പൂജ മോഹൻരാജ്, മനീഷ കെ.എസ്., ആലീസ് പോൾ, മാസ്റ്റർ സൂഫിയാൻ സാലി, മാസ്റ്റർ ദ്രുപദ്, മാസ്റ്റർ വൈഷ്ണവ്, ബേബി വൈദേഹി നായർ തുടങ്ങിയ വലിയൊരു താരനിര ചിത്രത്തിൽ അണിനിരക്കുന്നുണ്ട്. മഞ്ചാടി ക്രിയേഷൻസിന്റെ ബാനറിൽ അഷ്റഫ് പിലാക്കലാണ് 'മാജിക് മഷ്റൂംസ്' നിർമ്മിച്ചിരിക്കുന്നത്. നവാഗതനായ ആകാശ് ദേവാണ് ചിത്രത്തിന്റെ കഥയും തിരക്കഥയും സംഭാഷണവും ഒരുക്കിയിരിക്കുന്നത്. ഭാവന റിലീസാണ് ചിത്രത്തിന്റെ വിതരണം ഏറ്റെടുത്തിരിക്കുന്നത്.
സുജിത്ത് വാസുദേവ് ഛായാഗ്രഹണം നിർവഹിക്കുന്ന ഈ ചിത്രത്തിന്റെ എഡിറ്റർ ജോൺകുട്ടിയാണ്. എം. ബാവ, ഷിജി പട്ടണം എന്നിവർ പ്രൊഡക്ഷൻ ഡിസൈനും നാദിർഷ സംഗീതവും മണികണ്ഠൻ അയ്യപ്പ പശ്ചാത്തല സംഗീതവും ഒരുക്കിയിരിക്കുന്നു. ബി.കെ. ഹരിനാരായണൻ, സന്തോഷ് വർമ്മ, രാജീവ് ആലുങ്കൽ, രാജീവ് ഗോവിന്ദൻ, യദു കൃഷ്ണൻ ആർ. എന്നിവരാണ് ഗാനരചന നിർവഹിച്ചിരിക്കുന്നത്. ബ്രിന്ദ, ദിനേഷ്, ശ്രീജിത്ത് ഡാൻസ് സിറ്റി എന്നിവർ ചേർന്നാണ് നൃത്തസംവിധാനം. ഫസൽ എ. ബക്കർ റിറെക്കോർഡിങ് മിക്സറും സച്ചിൻ സുധാകരൻ സൗണ്ട് ഡിസൈനും നിർവഹിച്ചിരിക്കുന്നു. പി.വി. ശങ്കർ മേക്കപ്പും ദീപ്തി അനുരാഗ് വസ്ത്രാലങ്കാരവും നരസിംഹ സ്വാമി ക്യാരക്ടർ സ്റ്റൈലിസ്റ്റായും പ്രവർത്തിച്ചിരിക്കുന്നു. ഷൈനു ചന്ദ്രഹാസ് ചീഫ് അസോസിയേറ്റും രജീഷ് പത്തംകുളം പ്രൊജക്ട് ഡിസൈനറുമാണ്.
