- HOME
- NEWS
- POLITICS
- SPORTS
- CINEMA
- CHANNEL
- MONEY
- RELIGION
- INTERVIEW
- SCITECH
- OPINION
- FEATURE
- MORE
ആദ്യ ദിനം തന്നെ ബോക്സ് ഓഫീസിൽ തകർപ്പൻ പ്രകടനം; വിദേശത്തും 'മാർക്കോ' തരംഗം; ഉണ്ണി മുകുന്ദൻ ചിത്രത്തിന്റെ ആഗോള ഓപ്പണിംഗ് കണക്കുകൾ പുറത്ത്
കൊച്ചി: തീയേറ്ററുകളിൽ എത്തി ആദ്യ ദിവസം തന്നെ തരംഗമായിരിക്കുകയാണ് ഉണ്ണി മുകുന്ദൻ നായകനായെത്തിയ ആക്ഷൻ ത്രില്ലർ 'മാർക്കോ'. വമ്പൻ ഹൈപ്പോടെ തീയേറ്ററുകളിലെത്തിയ ചിത്രം മികച്ച പ്രേക്ഷക പ്രതികരണം നേടി മുന്നേറുകയാണ്. മലയാളത്തിലെ മോസ്റ്റ് വയലന്റ് ഫിലിം എന്ന ലേബലിലെത്തുന്ന ചിത്രം ഹനീഫ് അദേനിയാണ് സംവിധാനം ചെയ്തിരിക്കുന്നത്. 'മാർക്കോ' മലയാളത്തില് ഇന്നുവരെ പുറത്തിറങ്ങിയതില്വെച്ച് ഏറ്റവും വയലന്സ് ഉള്ള ചിത്രമാണെന്നാണ് പ്രേക്ഷകരുടെ അഭിപ്രായം. ഇപ്പോഴിതാ ചിത്രത്തിന്റെ ആദ്യ ദിനത്തിലെ ആഗോള ഓപണിംഗ് കളക്ഷന് പുറത്തുവിട്ടിരിക്കുകയാണ് നിര്മ്മാതാക്കള്.
വിദേശ മാര്ക്കറ്റിലും ചിത്രത്തിന് മികച്ച അഭിപ്രായമാണ് ലഭിച്ചിരിക്കുന്നത് എന്നതാണ് നിര്മ്മാതാക്കള് പുറത്തുവിട്ടിരിക്കുന്ന കണക്കിലൂടെ വ്യക്തമാവുന്നത്. ഇതുപ്രകാരം ചിത്രത്തിന്റെ ആഗോള ഓപ്പണിംഗ് 10.8 കോടിയാണ്. ചിത്രം കേരളത്തില് നിന്ന് 4.5 കോടിയോളം നേടിയതായി റിപ്പോർട്ടുകൾ പുറത്ത് വന്നിരുന്നു. ഉണ്ണി മുകുന്ദന്റെ കരിയര് ബെസ്റ്റ് ഓപണിംഗ് ആണ് ഇത്. ആദ്യ ഷോകൾ കഴിഞ്ഞതോടെ ചിത്രത്തിന് മികച്ച റിപ്പോർട്ടുകളാണ് പുറത്ത് വന്നത്. ഇതോടെ ടിക്കറ്റ് ബുക്കിംഗ് പ്ലാറ്റ്ഫോമുകളില് ചിത്രത്തിന് മികച്ച പ്രതികരണമാണ് ലഭിക്കുന്നത്. ഞായറാഴ്ചത്തെ ചില ഷോകള് ഇപ്പോഴേ ഫില് ആയിട്ടുമുണ്ട്. ആദ്യ ദിന റെക്കോര്ഡ് ഇട്ട സ്ഥിതിക്ക് ചിത്രം ആദ്യ വാരാന്ത്യത്തില് എത്ര നേടുമെന്ന് അറിയാനുള്ള കാത്തിരിപ്പിലാണ് ആരാധകർ.
ആക്ഷന് വലിയ പ്രാധാന്യം ഒരുക്കിയിരിക്കുന്ന സിനിമയിലെ സംഘട്ടനങ്ങള് ഒരുക്കിയിരിക്കുന്നത് പ്രമുഖ ആക്ഷൻ ഡയറക്ടർ കലൈ കിങ്ങ്സ്റ്റണാണ്. ചിത്രത്തിൽ ഏഴ് സംഘട്ടന രംഗങ്ങളാണുള്ളത്. കരിയറിലെ ഏറ്റവും വ്യത്യസ്ഥമായ കഥാപാത്രമാണ് ജഗദീഷ് ചിത്രത്തിൽ അവതരിപ്പിച്ചിരിക്കുന്നതെന്നാണ് വിവരം. ക്യൂബ്സ് എന്റർടെയ്ൻമെന്റ്സ്, ഉണ്ണി മുകുന്ദൻ ഫിലിംസ് എന്നീ ബാനറുകളിൽ ഷെരീഫ് മുഹമ്മദ് ആണ് മാർക്കോ നിർമിക്കുന്നത്. കെജിഎഫ്, സലാര് അടക്കമുള്ള ബിഗ് ബഡ്ജറ്റ് ചിത്രങ്ങളുടെ സംഗീത സംവിധായകന് രവി ബസ്റൂര് ആണ് മാര്ക്കോയിലെയും ഈണങ്ങള് ഒരുക്കുന്നത്.
സിദ്ദിഖ്, ജഗദീഷ്, ആൻസൺ പോൾ, കബീർ ദുഹാൻസിംഗ് (ടർബോ ഫെയിം), അഭിമന്യു തിലകൻ, മാത്യു വർഗീസ്, അർജുൻ നന്ദകുമാർ, ബീറ്റോ ഡേവിസ്, ദിനേശ് പ്രഭാകർ, ശ്രീജിത്ത് രവി, ലിഷോയ്, ബാഷിദ് ബഷീർ, ജിയാ ഇറാനി, സനീഷ് നമ്പ്യാർ, ഷാജി ഷാഹിദ്, ഇഷാൻ ഷൗക്കത്, അജിത് കോശി, യുക്തി തരേജ, ദുർവാ താക്കർ, സജിത ശ്രീജിത്ത്, പ്രവദ മേനോൻ, സ്വാതി ത്യാഗി, സോണിയ ഗിരി, മീര നായർ, ബിന്ദു സജീവ്, ചിത്ര പ്രസാദ് തുടങ്ങി നിരവധി താരങ്ങളും ഈ ബിഗ് ബജറ്റ് ചിത്രത്തിൽ അണിനിരക്കുന്നുണ്ട്.