തീയേറ്ററുകളിൽ സർപ്രൈസ് ഹിറ്റ്; സുരാജ് വെഞ്ഞാറമൂടിനൊപ്പം തകർപ്പൻ പ്രകടവുമായി യുവ താരങ്ങൾ; ഒടുവിൽ 'മുറ' ഒടിടിയിൽ
കൊച്ചി: ഈ കൊല്ലം നിരവധി സർപ്രൈസ് ഹിറ്റുകളാണ് മലയാള സിനിമക്ക് ലഭിച്ചത്. അതിൽ ഏറ്റവും ശ്രദ്ധ നേടിയ ചിത്രങ്ങളിൽ ഒന്നാണ് യുവതാരങ്ങളുമായെത്തിയ 'മുറ'. 'കപ്പേള' എന്ന ചിത്രത്തിന് ശേഷം മുഹമ്മദ് മുസ്തഫ സംവിധാനം ചെയ്ത ആക്ഷൻ ഡ്രാമയിൽ യുവ താരം ഹൃദു ഹറൂണും സുരാജ് വെഞ്ഞാറമൂടും, ഒപ്പം നിരവധി പുതുമുഖ താരങ്ങളും അഭിനയിച്ചിരുന്നു. നവംബർ 8ന് തീയേറ്ററുകളിൽ എത്തിയ ചിത്രത്തിനെ പ്രശംസിച്ച് സിനിമാ താരങ്ങളടക്കം രംഗത്തെത്തിയിരുന്നു. ചിത്രം ആമസോണ്‍ പ്രൈം വീഡിയോയിലൂടെ ഒടിടിയില്‍ എത്തിയിരിക്കുകയാണ്.
ആക്ഷൻ ചിത്രങ്ങൾക്ക് വലിയ ആരാധകരുള്ള സിനിമ ഇൻഡസ്ട്രയിയാണ് മോളിവുഡ് എന്നതിന് തെളിവ് കൂടിയായിരുന്നു ചിത്രം നേടിയ വമ്പൻ വിജയം. 'എച്ച് ആർ പിക്ചേഴ്‌സിന്റെ ബാനറിൽ റിയ ഷിബുവാണ് 'മുറ' നിർമ്മിച്ചിരിക്കുന്നത്. മാല പാർവതി, കനി കുസൃതി, കണ്ണൻ നായർ, ജോബിൻ ദാസ്, അനുജിത് കണ്ണൻ, യെദു കൃഷ്ണ, വിഘ്‌നേശ്വർ സുരേഷ്, കൃഷ് ഹസൻ, സിബി ജോസഫ് എന്നിവരാണ് മുറയിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. സുരാജ് വെഞ്ഞാറമൂട് വില്ലൻ കഥാപാത്രമായി ചിത്രത്തില്‍ ഉണ്ട് എന്നതും പ്രധാന ആകര്‍ഷണമാണ്.
ഉപ്പും മുളകും ഫെയിം സുരേഷ് ബാബുവാണ് ചിത്രത്തിന്റെ രചന നിർവഹിക്കുന്നത്. ഫാസിൽ നാസർ ഛായാഗ്രഹണം നിർവഹിക്കുന്ന ചിത്രത്തിന്റെ എഡിറ്റിംഗ് ചമൻ ചാക്കോയാണ്. ചിത്രത്തിനായി സംഗീതം ഒരുക്കിയിരിക്കുന്നത് ക്രിസ്റ്റി ജോബിയാണ്. കലാസംവിധാനം ശ്രീനു കല്ലേലിൽ, മേക്കപ്പ് റോണെക്സ് സേവ്യർ, വസ്ത്രാലങ്കാരം നിസാർ റഹ്‍മത്ത്, ആക്ഷൻ പി സി സ്റ്റണ്ട്സ്, പ്രൊഡക്ഷൻ കൺട്രോളർ ജിത്ത് പിരപ്പൻകോട്, പി ആർ ഒ ആൻഡ് മാർക്കറ്റിംഗ് കൺസൾട്ടന്റ് പ്രതീഷ് ശേഖർ. എക്സിക്യൂട്ടീവ് പ്രൊഡ്യൂസർ റോണി സക്കറിയ എന്നിവരാണ്.
