പ്രശസ്ത ജാപ്പനീസ് നടി 'മിയോ നകയാമ' യെ മരിച്ച നിലയിൽ കണ്ടെത്തി; മൃതദേഹം വീടിനുള്ളിലെ ബാത്ത് ടബ്ബിനുള്ളിൽ; പോലീസ് അന്വേഷണം തുടങ്ങി

ടോക്കിയോ: പ്രമുഖ ജാപ്പനീസ് നടിയും ഗായികയുമായ 'മിയോ നകയാമ'യെ മരിച്ച നിലയില്‍ കണ്ടെത്തി. ടോക്യോയിലെ വീടിനുള്ളിലാണ് താരത്തെ മരിച്ച നിലയിൽ കണ്ടെത്തിയത്. ബാത്ത് ടബ്ബിനുള്ളിൽ നിന്നുമാണ് മൃതദേഹം കണ്ടെത്തിയത്. നടിക്ക് 54 വയസ്സായിരുന്നു. മരണവിവരം താരത്തിന്റെ ടീം വെബ്‌സൈറ്റിലൂടെ പുറത്തുവിട്ടിട്ടുണ്ട്.

മിയോ നകയാമയുടെ മരണം സംഭവിച്ച് അന്വേഷണം നടക്കുകയാണെന്നും വെബ്‌സൈറ്റില്‍ പോസ്റ്റ് ചെയ്ത കുറിപ്പ് വ്യക്തമാക്കുന്നു. വെള്ളിയാഴ്ച ഒസാകയില്‍ ഒരു പരിപാടി ഷെഡ്യൂള്‍ ചെയ്തിരുന്നെങ്കിലും നടിയുടെ ആരോഗ്യപ്രശ്‌നങ്ങള്‍ മൂലം പരിപാടി ക്യാന്‍സല്‍ ചെയ്തിരുന്നു.

ജെപോപ്പിലെ പ്രമുഖ താരമാണ് നകയാമ. 80കളിലും 90കളിലുമാണ് താരം ഏറെ പ്രശസ്തിയാര്‍ജിച്ചത്. 1995ല്‍ പുറത്തിറങ്ങിയ ലവ് ലെറ്റര്‍ എന്ന ചിത്രം ആഗോളതലത്തില്‍ നിരൂപകപ്രശംസകളേറ്റുവാങ്ങിയ ചിത്രമായിരുന്നു. ഗായികയെന്ന നിലയ്ക്കും നകയാമ പ്രശസ്തി നേടിയിട്ടുണ്ട്.