ഗോവ ചലച്ചിത്രോത്സവത്തിൽ പ്രശംസ നേടി 'സർക്കീട്ട്'; മികച്ച ബാലതാരത്തിനുള്ള സ്പെഷ്യൽ ജൂറി പരാമർശം സ്വന്തമാക്കി ഓർഹാൻ
ഗോവ: ഗോവ 56-ാമത് ഇന്ത്യൻ അന്താരാഷ്ട്ര ചലച്ചിത്രോത്സവത്തിൽ (ഐ.എഫ്.എഫ്.ഐ) വലിയ പ്രേക്ഷക-നിരൂപക പ്രശംസ നേടി താമർ സംവിധാനം ചെയ്ത 'സർക്കീട്ട്'. 2025 നവംബർ 20-ന് ആരംഭിച്ച് 28-ന് സമാപിച്ച മേളയിൽ, ചിത്രത്തിലെ പ്രകടനത്തിന് ബാലതാരം ഓർഹാൻ മികച്ച ബാലതാരത്തിനുള്ള സ്പെഷ്യൽ ജൂറി പരാമർശം സ്വന്തമാക്കി. ചലച്ചിത്രോത്സവത്തിന്റെ ഇന്ത്യൻ പനോരമ വിഭാഗത്തിൽ പ്രദർശിപ്പിച്ച 'സർക്കീട്ട്', അന്താരാഷ്ട്ര ചലച്ചിത്ര വിഭാഗത്തിൽ മത്സരത്തിനായി തിരഞ്ഞെടുക്കപ്പെട്ട മൂന്ന് ഇന്ത്യൻ ചിത്രങ്ങളിൽ ഒന്നായിരുന്നു.
ചിത്രത്തിൽ ആസിഫ് അലി അവതരിപ്പിച്ച ആമിർ എന്ന കഥാപാത്രവും ഓർഹാൻ അവതരിപ്പിച്ച ജെഫ്‌റോൺ എന്ന ബാലനുമായുള്ള ഹൃദയസ്പർശിയായ സൗഹൃദബന്ധമാണ് പ്രധാന പ്രമേയം. ലോകം ഒരിക്കലും സാധ്യമാകില്ലെന്ന് കരുതുന്ന ഒരു സൗഹൃദത്തിന്റെ കഥ പറഞ്ഞ ഈ ചിത്രം, പ്രവാസജീവിതത്തിന്റെ വ്യക്തിപരവും വൈകാരികവുമായ പോരാട്ടങ്ങളെ വളരെ യാഥാർത്ഥ്യബോധത്തോടെ പ്രേക്ഷകർക്ക് മുന്നിലെത്തിച്ചു. ദിവ്യ പ്രഭ, ദീപക് പറമ്പോൾ, രമ്യ സുരേഷ്, പ്രശാന്ത് അലക്സാണ്ടർ, സ്വാതിദാസ് പ്രഭു, ഗോപൻ അടാട്ട്, സിൻസ് ഷാൻ തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിച്ചത്. ജെഫ്‌റോൺ എന്ന കഥാപാത്രത്തെ മികവോടെ അവതരിപ്പിച്ചതിനാണ് ഓർഹാന് ജൂറി പരാമർശം ലഭിച്ചത്.
അജിത് വിനായക ഫിലിംസിന്റെ ബാനറിൽ വിനായക അജിത് നിർമ്മിച്ച 'സർക്കീട്ട്' പൂർണ്ണമായും ഗൾഫ് രാജ്യങ്ങളിലാണ് ചിത്രീകരിച്ചത്. യു.എ.ഇ., ഷാർജ, റാസൽഖൈമ, ഫുജൈറ എന്നിവിടങ്ങളിലായിരുന്നു ചിത്രീകരണ കേന്ദ്രങ്ങൾ. ഫ്‌ളോറിൻ ഡൊമിനിക് ആക്ഷൻ ഫിലിംസിന്റെ ബാനറിൽ ചിത്രത്തിന്റെ സഹനിർമ്മാണം നിർവഹിച്ചു. താമറിന്റെ രണ്ടാമത്തെ ചിത്രമായ 'സർക്കീട്ട്', അദ്ദേഹത്തിന്റെ ആദ്യ സംവിധാന സംരംഭമായ 'ആയിരത്തൊന്നു നുണകളും' എന്ന ചിത്രം പോലെ തന്നെ മികച്ച നിരൂപക പ്രശംസ നേടിയിരുന്നു. 'ആയിരത്തൊന്നു നുണകളും' സോണിലിവിലൂടെ പുറത്തിറങ്ങുകയും ഐ.എഫ്.എഫ്.കെയിൽ പ്രദർശിപ്പിക്കപ്പെടുകയും ചെയ്തിരുന്നു.
