ജനപ്രിയ ഇന്ത്യൻ നായികമാരുടെ പട്ടിക പുറത്ത്; സാമന്ത മുന്നിൽ; പട്ടികയിൽ ഇടം പിടിക്കാതെ മലയാള നടിമാർ

ജനപ്രിയ ഇന്ത്യൻ നായികമാരുടെ പട്ടികയിൽ തെന്നിന്ധ്യൻ താര സുന്ദരി സാമന്ത ഒന്നാമത്. ഓർമാക്സ് മീഡിയയാണ് ജനപ്രീതിയില്‍ ആദ്യ പത്ത് സ്ഥാനത്തുള്ള നടിമാരുടെ പട്ടിക പുറത്ത് വിട്ടത്. ബോളിവുഡ് നടി ആലിയ ഭട്ട് ആണ് ലിസ്റ്റിൽ രണ്ടാമത്. സെപ്റ്റംബർ മാസത്തെ പട്ടികയാണ് ഇപ്പോൾ പുറത്തുവന്നിരിക്കുന്നത്. പട്ടികയിൽ ഒരു മലയാളി നടി പോലും ഇടം പിടിച്ചില്ല.

ദീപിക പദുകോൺ മൂന്നാം സ്ഥാനം സ്വന്തമാക്കിയപ്പോൾ, ലേഡി സൂപ്പർ സ്റ്റാർ നയൻ‌താര പട്ടികയിൽ നാലാം സ്ഥാനതെത്തി. തമിഴ് നടി തൃഷയാണ് അഞ്ചാം സ്ഥാനത്ത്. ഈ വർഷത്തെ ബോളിവുഡിലെ ഏറ്റവും വലിയ വിജയ ചിത്രമായ സ്ത്രീ 2 വിലെ മികച്ച പ്രകടനത്തോടെ ശ്രദ്ധ കപൂർ ആറാം സ്ഥാനവും നേടി. കാജൽ അഗർവാൾ ഏഴാം സ്ഥാനത്തും സായ് പല്ലവി എട്ടാം സ്ഥാനത്തുമാണുള്ളത്.

പുഷപ 2 തുടങ്ങിയ നിരവധി ബിഗ് ബജറ്റ് സിനിമകളുടെ ഭാഗമായ രശ്‌മിക മന്ദനാ ഒൻപതാം സ്ഥാനം കൈക്കലാക്കിയപ്പോൾ ബോളിവുഡ് നടി കിയാരാ അദ്വാനിയാണ് പത്താം സ്ഥാനത്ത്. ശങ്കർ സംവിധാനം ചെയ്ത് രാംചരൺ നായകനായി എത്തുന്ന ഗെയിം ചേഞ്ചർ ആണ് ഇനി പുറത്തിറങ്ങാനുള്ള കിയാരാ അദ്വാനിയുടെ അടുത്ത ചിത്രം. നേരത്തെ, ഏറ്റവും ജനപ്രീതിയുള്ള നടന്മാരുടെ പട്ടികയും ഓർമാക്സ് മീഡിയ പുറത്തുവിട്ടിരുന്നു.