കലാഭവൻ നവാസിന്റെ അവസാനത്തെ ചിത്രം; ശ്രദ്ധനേടി ഹൊറർ കോമഡി സിനിമ 'പ്രകമ്പന'ത്തിന്റെ ടീസർ

കൊച്ചി: അന്തരിച്ച നടൻ കലാഭവൻ നവാസ് അവസാനമായി അഭിനയിച്ച ചിത്രം 'പ്രകമ്പന'ത്തിന്റെ ടീസർ പുറത്തിറങ്ങി. യുവതാരങ്ങളായ ഗണപതിയും സാഗർ സൂര്യയും പ്രധാന വേഷങ്ങളിലെത്തുന്ന ഈ ഹൊറർ കോമഡി ചിത്രം ഈ വർഷം ആദ്യത്തോടെ തിയറ്ററുകളിലെത്തും. നവരസ ഫിലിംസും പ്രശസ്ത സംവിധായകൻ കാർത്തിക് സുബ്ബരാജിന്റെ സ്റ്റോൺ ബെഞ്ച് സ്റ്റുഡിയോസും ചേർന്നാണ് ചിത്രം നിർമിക്കുന്നത്.

ചിത്രം മുഴുനീളം രസകരമായി അനുഭവപ്പെട്ടതിനാലാണ് നിർമാണത്തിൽ പങ്കാളിയാകാൻ തീരുമാനിച്ചതെന്ന് കാർത്തിക് സുബ്ബരാജ് നേരത്തെ വ്യക്തമാക്കിയിരുന്നു. 'നദികളിൽ സുന്ദരി യമുന' എന്ന ചിത്രത്തിനുശേഷം വിജേഷ് പാണത്തൂർ സംവിധാനം ചെയ്യുന്ന പ്രോജക്ട് കൂടിയാണിത്. ശ്രീജിത്ത് കെ. എസ്, കാർത്തികേയൻ എസ്, സുധീഷ്.എൻ എന്നിവരാണ് ചിത്രത്തിന്റെ നിർമാതാക്കൾ. വിവേക് വിശ്വം ഐ. എം, പി. മോൻസി, റിജോഷ്, ദിലോർ, ബ്ലെസ്സി എന്നിവർ സഹനിർമാതാക്കളാകുമ്പോൾ, അഭിജിത്ത് സുരേഷാണ് എക്സിക്യൂട്ടീവ് പ്രൊഡ്യൂസർ.

ഒരു മെൻസ് ഹോസ്റ്റൽ ജീവിതവും അതിന്റെ രസങ്ങളുമാണ് ചിത്രത്തിന്റെ പ്രധാന പശ്ചാത്തലം. കൊച്ചിയിലെ ഒരു ഹോസ്റ്റലും കണ്ണൂരുമാണ് പ്രധാന ലൊക്കേഷനുകൾ. ഗണപതി, സാഗർ സൂര്യ എന്നിവരെ കൂടാതെ അമീൻ, കലാഭവൻ നവാസ്, രാജേഷ് മാധവൻ, മല്ലിക സുകുമാരൻ, അസീസ് നെടുമങ്ങാട്, പി.പി കുഞ്ഞികൃഷ്ണൻ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. ശീതൾ ജോസഫാണ് ചിത്രത്തിലെ നായിക.

'പണി' എന്ന ചിത്രത്തിലെ ശക്തമായ വില്ലൻ കഥാപാത്രത്തിലൂടെ ശ്രദ്ധ നേടിയ സാഗർ സൂര്യയും, തനതായ ഹാസ്യശൈലിക്ക് പേരുകേട്ട ഗണപതിയും ഒരുമിക്കുമ്പോൾ 'പ്രകമ്പനം' വലിയ പ്രതീക്ഷകളാണ് നൽകുന്നത്. ചിത്രത്തിന്റെ കഥയും സംവിധായകൻ വിജേഷ് പാണത്തൂരിന്റേതാണ്. നവാഗതനായ ശ്രീഹരി വടക്കൻ തിരക്കഥയും സംഭാഷണവും ഒരുക്കിയിരിക്കുന്നു. ബിബിൻ അശോക് സംഗീതവും ശങ്കർ ശർമ പശ്ചാത്തല സംഗീതവും നിർവഹിക്കുന്നു. വിനായക് ശശികുമാറാണ് ഗാനരചന. ആൽബി ആന്റണി ഛായാഗ്രഹണവും സൂരജ് ഇ.എസ് എഡിറ്റിംഗും സുഭാഷ് കരുൺ കലാസംവിധാനവും നിർവഹിച്ചിരിക്കുന്നു.

പ്രൊഡക്ഷൻ കൺട്രോളർ -നന്ദു പൊതുവാൾ. ലൈൻ പ്രൊഡ്യൂസർ -അനന്ത നാരായൺ. പ്രൊഡക്ഷൻ മാനേജേഴ്സ് -ശശി പൊതുവാൾ, കമലാക്ഷൻ. സൗണ്ട് ഡിസൈൻ -കിഷൻ മോഹൻ ( സപ്ത). ഫൈനൽ മിക്സ് -എം.ആർ. രാജകൃഷ്ണൻ. ഡി.ഐ -രമേശ് സി.പി. വിഎഫ്എക്സ് -മെറാക്കി. വസ്ത്രാലങ്കാരം -സുജിത്ത് മട്ടന്നൂർ. മേക്കപ്പ് -ജയൻ പൂങ്കുളം.