പുഷ്പ 2 ഒടിടിയിലേക്ക്; റിലീസ് ഉടനെന്ന് നെറ്റ്ഫ്ലിക്സ്; ആദ്യം ഒടിടിയിലെത്തുന്നത് ദക്ഷിണേന്ത്യന്‍ ഭാഷാ പതിപ്പുകൾ
കൊച്ചി: റെക്കോർഡ് കളക്ഷൻ നേട്ടവുമായി തീയേറ്ററുകൾ അടക്കി ഭരിച്ച തെലുങ്ക് സൂപ്പർ താരം അല്ലു അർജുന്റെ ചിത്രമാണ് 'പുഷ്പ 2'. റിലീസായി രണ്ട് മാസങ്ങൾക്ക് ശേഷം ചിത്രം ഒടിടിയിലെത്തുന്ന വാർത്തകളാണ് പുറത്ത് വരുന്നത്. വലിയ ആവേശത്തോടെയാണ് ആരാധകർ ചിത്രത്തിന്റെ ഓൺലൈൻ സ്ട്രീമിംഗിനായി കാത്തിരിക്കുന്നത്. നെറ്റ്ഫ്ലിക്സിലാണ് പുഷ്പ 2 ഓണ്‍ലൈന്‍ സ്ട്രീം ചെയ്യുന്നത്.
ആദ്യഘട്ടത്തില്‍ ചിത്രത്തിന്റെ ദക്ഷിണേന്ത്യന്‍ ഭാഷ പതിപ്പുകളാണ് ഒടിടിയിലെത്തുകയെന്നാണ് സൂചന. ഇതുമായി ബന്ധപ്പെട്ട അപ്ഡേറ്റ് നെറ്റ്ഫ്ലിക്സ് കഴിഞ്ഞ ദിവസം പുറത്തുവിട്ടിരുന്നു. ചിത്രം ഉടൻ എത്തുമെന്ന് പറയുന്ന പോസ്റ്റില്‍ റിലീസ് തീയതി വെളിപ്പെടുത്തുന്നില്ല. എന്നാല്‍ ചിത്രം ജനുവരി 30ന് ഒടിടിയില്‍ എന്നാണ് പ്രതീക്ഷ. ചിത്രത്തിന്റെ ഒടിടിയിലെ ഹിന്ദി പതിപ്പിൻ്റെ റിലീസിനായി ആരാധകർ കാത്തിരിക്കേണ്ടിവരും.
തെലുങ്ക്, തമിഴ്, കന്നഡ, മലയാളം വെർഷനുകളാണ് ആദ്യം ഒടിടിയിലെത്തുന്നത്. ചിത്രത്തിന്റെ എക്സ്റ്റൻഡഡ് കട്ട് വെർഷനാണ് നെറ്ഫ്ലിക്സിലെത്തുന്നത്. തീയേറ്ററുകളിൽ കാണിക്കാത്ത 23 മിനിറ്റുകൾ ചിത്രം ഒടിടിയിലെത്തുമ്പോൾ പ്രേക്ഷകർക്ക് കാണാൻ സാധിക്കും. പുഷ്പയുടെ ജപ്പാനിലെ സീന്‍ അടക്കം കൂടുതല്‍ ചിത്രത്തില്‍ ഉണ്ടാകും എന്നാണ് വിവരം.
ഇന്ത്യയിൽ നിന്ന് 1233 കോടിയിലധികം നെറ്റ് കളക്ഷൻ നേടിയ പുഷ്പ 2 അല്ലു അർജുന്റെ കരിയറിലെ തന്നെ ഏറ്റവും വിജയകരമായ ചിത്രങ്ങളിൽ ഒന്നാണ്. ആഗോളതലത്തിൽ ചിത്രത്തിന്റെ കളക്ഷൻ 1738 കോടി രൂപയായിരുന്നു. ‘ബാഹുബലി 2’, ‘കെജിഎഫ് 2’, ‘ആർആർആർ’ തുടങ്ങിയ മെഗാ ഹിറ്റുകളെ ചിത്രം മറികടന്നിരുന്നു. രശ്മിക മന്ദാന നായികയായ ചിത്രത്തില്‍ ഫഹദ് ആണ് മറ്റൊരു പ്രധാന കഥാപാത്രത്തെ അവതരിപ്പിച്ചിരിക്കുന്നത്. ദേവി ശ്രീ പ്രസാദാണ് ചിത്രത്തിന്റെ സംഗീതം. മൈത്രീ മൂവിമേക്കേര്‍സാണ് നിര്‍മ്മാണം.
