നിങ്ങൾ മാംസം കഴിക്കാൻ പാടില്ല; മദ്യപാനവും പുകവലിയും പൂർണമായും ഒഴുവാക്കണം...!!; ഒരു സിനിമയുടെ തിയറ്റർ നിബന്ധനകൾ വായിച്ചവരുടെ കിളി പോയി; ചിത്രം ‘കാന്താര’യുടെ പേരിൽ പുറത്തുവന്ന പോസ്റ്ററിൽ പറയുന്നത് ഇങ്ങനെ; സോഷ്യൽ മീഡിയയിൽ തീപ്പാറും ചർച്ചകൾ; ഒടുവിൽ നടന്റെ എൻട്രിയിൽ ആശ്വാസം
ബെംഗളൂരു: സൂപ്പർഹിറ്റ് കന്നഡ ചിത്രം 'കാന്താര' കാണാനെത്തുന്നവർ മദ്യപാനം, പുകവലി, മാംസാഹാരം എന്നിവ ഒഴിവാക്കണമെന്ന തരത്തിൽ സാമൂഹ്യമാധ്യമങ്ങളിൽ പ്രചരിക്കുന്ന പോസ്റ്റർ പൂർണ്ണമായും വ്യാജമാണെന്ന് ചിത്രത്തിന്റെ സംവിധായകനും നായകനുമായ ഋഷഭ് ഷെട്ടി അറിയിച്ചു. ഇത് ആരോ മനഃപൂർവം സൃഷ്ടിച്ചെടുത്ത വ്യാജ പ്രചാരണമാണെന്നും, ഈ പോസ്റ്ററുമായി സിനിമയുടെ അണിയറ പ്രവർത്തകർക്ക് യാതൊരു ബന്ധവുമില്ലെന്നും അദ്ദേഹം വ്യക്തമാക്കി.
കഴിഞ്ഞ ദിവസം മുതലാണ് 'കാന്താര' സിനിമ കാണാൻ തിയേറ്ററുകളിൽ എത്തുന്നവർ ഒക്ടോബർ 2ന് ചില കാര്യങ്ങളിൽ ശ്രദ്ധിക്കണം എന്ന തരത്തിലുള്ള ഒരു പോസ്റ്റർ സാമൂഹ്യമാധ്യമങ്ങളിൽ വ്യാപകമായി പ്രചരിക്കാൻ തുടങ്ങിയത്. "ഒക്ടോബർ 2ന് കാന്താര കാണാൻ തിയറ്ററിൽ വരുന്നവർ ദൈവികമായ മൂന്ന് കാര്യങ്ങളിൽ ശ്രദ്ധിക്കുക. മദ്യപിക്കാൻ പാടില്ല, പുകവലിക്കാൻ പാടില്ല, മാംസ ഭക്ഷണങ്ങൾ കഴിക്കാൻ പാടില്ല. ഇത്രയും കാര്യങ്ങൾ സിനിമ തിയറ്ററിൽ കാണുന്ന ദിവസം പാലിക്കാൻ ശ്രദ്ധിക്കുക. ഇക്കാര്യങ്ങൾ വ്യക്തമാക്കി ഗൂഗിൾ ഫോം പൂരിപ്പിച്ചതിനു ശേഷം നിങ്ങളുടെ പങ്കാളിത്തം ഉറപ്പാക്കുക" എന്നിങ്ങനെയായിരുന്നു പോസ്റ്ററിലെ ഉള്ളടക്കം.
ഈ പ്രചാരണങ്ങൾ വ്യാപകമായതോടെ ഒരു വിഭാഗം പ്രേക്ഷകർ ഇതിനെ പിന്തുണച്ച് രംഗത്തെത്തുകയും 'വ്രതം എടുത്ത് കാന്താര കാണാൻ ആരൊക്കെ ഉണ്ട്' എന്ന തരത്തിലുള്ള ഹാഷ്ടാഗുകളോടെ ചിത്രങ്ങൾ പങ്കുവെക്കുകയും ചെയ്തു. ഇത്രയധികം പ്രചാരം ലഭിച്ചതോടെയാണ് ഋഷഭ് ഷെട്ടി വിഷയത്തിൽ പ്രതികരണവുമായി രംഗത്തെത്തിയത്.
"ഈ പോസ്റ്റർ കണ്ടപ്പോൾ ഞാൻ ശരിക്കും ഞെട്ടിപ്പോയി. ഉടൻ തന്നെ പ്രൊഡക്ഷൻ ടീമുമായി ബന്ധപ്പെട്ട് കാര്യങ്ങൾ തിരക്കിയറിഞ്ഞു. ഇത് തീർത്തും വ്യാജ പ്രചാരണമാണെന്ന് അവർ സ്ഥിരീകരിച്ചു. ആളുകളുടെ ഭക്ഷണ ശീലങ്ങളെയോ വ്യക്തിപരമായ ഇഷ്ടാനിഷ്ടങ്ങളെയോ ചോദ്യം ചെയ്യാൻ ആർക്കും അവകാശമില്ല. ഇത് ശ്രദ്ധ നേടി പ്രചരിപ്പിക്കാൻ ആരോ മനഃപൂർവം ചെയ്ത ചതിയാണ്," ഋഷഭ് ഷെട്ടി പറഞ്ഞു.
ഇന്ത്യയൊട്ടാകെ വൻ വിജയങ്ങൾ നേടിയ ചിത്രമാണ് 'കാന്താര'. ചിത്രത്തിന്റെ രണ്ടാം ഭാഗത്തെക്കുറിച്ചുള്ള ചർച്ചകളും അണിയറയിൽ പുരോഗമിക്കുന്നുണ്ട്. ഈ സാഹചര്യത്തിൽ ഇത്തരത്തിലുള്ള വ്യാജ വാർത്തകളും പ്രചാരണങ്ങളും സിനിമയുടെ യഥാർത്ഥ ലക്ഷ്യത്തിനും പ്രേക്ഷകരുമായുള്ള ബന്ധത്തിനും കോട്ടം വരുത്തുമോ എന്ന ആശങ്കയും നിലനിൽക്കുന്നുണ്ട്. ഇത്തരം വ്യാജ പോസ്റ്ററുകൾക്കെതിരെ നിയമ നടപടികൾ സ്വീകരിക്കുമോ എന്ന കാര്യത്തിൽ അണിയറ പ്രവർത്തകർ ഇതുവരെ പ്രതികരിച്ചിട്ടില്ല.
