മൂന്ന് മാസം കൂടുമ്പോള്‍ മകനുമൊത്ത് ആര്‍.ആര്‍.ആര്‍ കാണും; ഞങ്ങളുടെ എക്കാലത്തെയും ഇഷ്ട ചിത്രമാണ് അത്; വലിയ ആരാധികയാണെന്ന് ബ്രിട്ടീഷ് നടി
മൂന്ന് മാസം കൂടുമ്പോള്‍ മകനുമൊത്ത് ആര്‍.ആര്‍.ആര്‍ കാണും
ഹൈദരാബാദ്: എസ്.എസ് രാജമൗലി സംവിധാനം ചെയ്ത ബ്രഹ്‌മാണ്ട ചിത്രം ആര്‍.ആര്‍.ആറിന് വലിയ ഫാന്‍ബേസ് ഉണ്ടാക്കാന്‍ സാധിച്ചിരുന്നു. ത്രില്ലടിപ്പിക്കുന്ന രംഗങ്ങള്‍ കൊണ്ട് ഏറെ സമ്പന്നമാണ് ഈ സിനിമ. താന്‍ ആര്‍.ആര്‍.ആറിന്റെ വലിയ ആരാധികയാണെന്ന് തുറന്നു പറഞ്ഞിരിക്കയാണ് ബ്രിട്ടീഷ് നടി മിന്നി ഡ്രൈവര്‍. എ.എന്‍.ഐക്ക് നല്‍കിയ അഭിമുഖത്തിലാണ് തനിക്ക് ആര്‍.ആര്‍.ആറിനോടുള്ള ഇഷ്ടത്തെ കുറിച്ചും ഇന്ത്യയിലേക്ക് സഞ്ചരിക്കാന്‍ ആഗ്രഹമുള്ളതിനെ കുറിച്ചും മിന്നി പറഞ്ഞത്. 2023ല്‍ ആര്‍.ആര്‍.ആറിന് ഓസ്‌കറും ലഭിച്ചിരുന്നു.
'ആര്‍.ആര്‍.ആര്‍ എനിക്ക് ഏറ്റവും ഇഷ്ടപ്പെട്ട ചിത്രമാണ്. എന്റെ മകനുമൊത്ത് ആ ചിത്രം കാണാന്‍ എനിക്ക് ഇഷ്ടമാണ്. ഞങ്ങളുടെ എക്കാലത്തെയും ഇഷ്ട ചിത്രമാണ് അത്. ഇതൊരു മൂന്ന് മണിക്കൂര്‍ ചിത്രമാണ് എന്നാലും മൂന്ന് മാസം കൂടുമ്പോള്‍ ഒരു വട്ടമെങ്കിലും ഞങ്ങള്‍ ആര്‍.ആര്‍.ആര്‍ കാണുമെന്ന് എനിക്ക് തോന്നുന്നു. എക്കാലത്തേയും മനോഹരമായ ചിത്രങ്ങളിലൊന്നാണ് ഇതെന്നാണ് എനിക്ക് തോന്നുന്നത്,' മിന്നീ പറഞ്ഞു.
'ഗുഡ് വില്‍ ഹണ്ടിങ്' അടക്കം 50 ഓളം ചിത്രത്തില്‍ മിന്നീ അഭിനയിച്ചിട്ടുണ്ട്. ലോകം മുഴുവന്‍ ചര്‍ച്ചയായ ചിത്രമായിരുന്നു രാജമൗലിയുടെ മാഗ്‌നം ഓപസായ ആര്‍.ആര്‍.ആര്‍. രാം ചരണ്‍, ജൂനിയര്‍ എന്‍.ടി.ആര്‍, ആലിയ ഭട്ട് എന്നിവരാണ് ചിത്രത്തില്‍ പ്രധാനകഥാപാത്രത്തെ അവതരിപ്പിച്ചത്. 'നാട്ടു.. നാട്ടു' എന്ന പ്രശസ്തമായ ഗാനത്തിനാണ് ചിത്രത്തിന് ഓസ്‌ക്ര്‍ ലഭിച്ചത്.
