നിങ്ങളുടെ പേരിനൊപ്പം ഏത് സിനിമ ചേര്ക്കണം?; നടൻ സന്ദീപ് പ്രദീപിന്റെ 'വിളിപ്പേരി'ല് സോഷ്യല് മീഡിയയിൽ പൊരിഞ്ഞ ചർച്ച
മലയാള സിനിമയിലെ യുവതാരം സന്ദീപ് പ്രദീപിന്റെ പേരിനൊപ്പം ഏത് സിനിമയുടെ പേര് ചേര്ക്കണം എന്നതിനെച്ചൊല്ലി സാമൂഹിക മാധ്യമങ്ങളിൽ ചൂടേറിയ ചർച്ച. സന്ദീപിന്റെ ആദ്യ നായകവേഷമായ 'പടക്കളം' എന്ന ചിത്രത്തിന്റെ പേര് ചേര്ത്ത് 'പടക്കളം സന്ദീപ്' എന്ന് വിശേഷിപ്പിക്കുന്നതിനെതിരെ ഒരു വിഭാഗം പ്രേക്ഷകർ രംഗത്തെത്തിയതോടെയാണ് വിഷയം ശ്രദ്ധേയമായത്. 'പടക്കള'ത്തേക്കാൾ വലിയ വിജയമായ 'എക്കോ'യുടെ പേരാണ് ചേര്ക്കേണ്ടതെന്നാണ് ഇവരുടെ വാദം.
മലയാള സിനിമയിൽ അഭിനേതാക്കൾക്ക് അവരഭിനയിച്ച ശ്രദ്ധേയ ചിത്രങ്ങളുടെയോ കഥാപാത്രങ്ങളുടെയോ പേര് സ്വന്തം പേരിനൊപ്പം ലഭിക്കുന്നത് പുതിയ കാര്യമല്ല. സ്ഫടികം ജോർജ്, മണിയൻപിള്ള രാജു, ഭീമൻ രഘു, ഇടവേള ബാബു തുടങ്ങിയവർ ഇത്തരത്തിൽ അറിയപ്പെടുന്നവരാണ്. ഈ പേരുകൾ കാലങ്ങളെടുത്ത് പ്രേക്ഷകർ ഉറപ്പിക്കുന്നതും കഥാപാത്രങ്ങൾ അവരിൽ ചെലുത്തിയ സ്വാധീനത്തിന്റെ പ്രതിഫലനവുമാണ്. ചിലപ്പോഴൊക്കെ കഥാപാത്രങ്ങളുടെ യഥാർത്ഥ പേരാണ് നടന്റെ പേരെന്ന് പോലും പ്രേക്ഷകർ തെറ്റിദ്ധരിക്കാറുണ്ട്.
പ്രധാനമായും സഹനടനായി തിളങ്ങിയ സന്ദീപ്, 'പതിനെട്ടാം പടി'യിലെ ചെറിയ വേഷത്തിലൂടെയാണ് അഭിനയ രംഗത്തെത്തിയത്. പിന്നീട് നേരിട്ടുള്ള ഒടിടി റിലീസായ 'അന്താക്ഷരി'യിൽ അഭിനയിച്ചു. 'ഫാഹിം' എന്ന ചിത്രമാണ് സന്ദീപിന് കരിയറിൽ ഒരു ബ്രേക്ക് നൽകിയത്. നസ്ലെനൊപ്പം 'ആലപ്പുഴ ജിംഖാന'യിലും വേഷമിട്ടു. 'പടക്കളം' എന്ന ചിത്രത്തിലൂടെയാണ് സന്ദീപ് ആദ്യമായി നായകവേഷത്തിലെത്തുന്നത്. ഈ ചിത്രം മികച്ച വിജയവും നേടിയിരുന്നു.
'പടക്കളം' വിജയകരമായതോടെയാണ് സന്ദീപിന്റെ പേരിനൊപ്പം ഈ ചിത്രം ചേർത്ത് സമൂഹമാധ്യമങ്ങളിൽ 'പടക്കളം സന്ദീപ്' എന്ന പ്രയോഗം സജീവമായത്. ഇത് കുറച്ചുകാലമായി നിലവിലുണ്ടായിരുന്നെങ്കിലും, അടുത്തിടെയാണ് ഈ വിഷയം ചർച്ചാവിഷയമായത്. 'പടക്കളം സന്ദീപ്' എന്ന പേരിനോട് യോജിക്കാത്ത ഒരു വിഭാഗം, സിനിമയുടെ പേര് നടന്റെ പേരിനൊപ്പം ലഭിക്കുന്നത് ഒരു നേട്ടമായി കാണുന്നില്ലെന്ന് വാദിക്കുന്നു. എന്നാൽ, മറ്റൊരു വിഭാഗം ഈ പ്രവണതയെ സ്വാഗതം ചെയ്യുന്നു. 'പടക്കള'ത്തിന് ശേഷം സന്ദീപ് നായകനായെത്തിയ 'എക്കോ' അതിനേക്കാൾ വലിയ വിജയം നേടിയതിനാൽ 'എക്കോ സന്ദീപ്' എന്ന് വിളിക്കുന്നതാണ് കൂടുതൽ ഉചിതമെന്നും ചിലർ വാദിക്കുന്നുണ്ട്.
എങ്കിലും, ഏതാനും പോസ്റ്റുകളിൽ ഇത്തരം പരാമർശങ്ങൾ വന്നതുകൊണ്ട് ഒരു നടന്റെ ബഹുഭൂരിപക്ഷം പ്രേക്ഷകരും അത്തരത്തിൽ വിളിക്കണമെന്നില്ലെന്നും, ഈ വിളിപ്പേരിന് പ്രേക്ഷകർക്കിടയിൽ എത്രത്തോളം സ്വീകാര്യത ലഭിക്കുമെന്ന് വരും നാളുകളിൽ കണ്ടറിയണമെന്നുമാണ് സിനിമാ നിരീക്ഷകർ അഭിപ്രായപ്പെടുന്നത്.
