സത്യൻ അന്തിക്കാട്-മോഹൻലാൽ ചിത്രത്തിന്റെ അപ്ഡേറ്റെത്തി; 'ഹൃദയപൂർവ്വം' ടീസർ നാളെയെത്തുമെന്ന് മോഹൻലാൽ; ഓണം ലാലേട്ടനൊപ്പമെന്ന് ആരാധകർ

കൊച്ചി: മോഹൻലാലിന്റെ ഓണം റിലീസായി തീയേറ്ററുകളിൽ എത്താൻ ഒരുങ്ങുന്ന ചിത്രമാണ് 'ഹൃദയപൂര്‍വ്വം'. സത്യൻ അന്തിക്കാടും മോഹൻലാലും ഒന്നിക്കുന്ന ഇരുപതാമത്തെ ചിത്രമാണിത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിക്കുന്ന ചിത്രത്തിന് നവാ​ഗതനായ സോനു ടി.പിയാണ് തിരക്കഥയെഴുതുന്നത്. ചിത്രത്തിനായി ഏറെ പ്രതീക്ഷയോടെ ആരാധകർ കാത്തിരിക്കുന്നത്. ഒരു ഫീൽ​ഗുഡ് എന്റർടെയ്നറായിരിക്കും ചിത്രമെന്നാണ് റിപ്പോർട്ടുകൾ. ഇപ്പോഴിതാ ചിത്രത്തിന്റെ പുതിയ അപ്‌ഡേറ്റുമായി എത്തിയിരിക്കുകയാണ് മോഹൻലാൽ.

ഹൃദയപൂർവ്വത്തിന്റെ ടീസർ നാളെ വരുമെന്നാണ് മോഹൻലാൽ അറിയിച്ചിരിക്കുന്നത്. അപ്ഡേറ്റ് എത്തിയതോടെ ആരാധകർ കമന്റുകളുമായി രംഗത്തെത്തി. 'ഓണം ലാലേട്ടനൊപ്പം ഹൃദയപൂർവം' എന്നായിരുന്നു ഒരാളുടെ കമ്മന്റ്. 'ഈ ഓണം ഹൃദയ പൂർവ്വം ഞങ്ങൾ ഇങ്ങ് എടുത്തു ലാലേട്ടാ ഒപ്പം കൂടിക്കൊ' എന്നായിരുന്നു മറ്റൊരു കമ്മന്റ്. ഒപ്പം സിനിമ വൻ വിജയമാകട്ടെ എന്ന ആശംസയും ആരാധകർ നൽകുന്നുണ്ട്. 2015ൽ പുറത്തിറങ്ങിയ 'എന്നും എപ്പോഴും' എന്ന ചിത്രത്തിലായിരുന്നു മോഹൻലാൽ-സത്യൻ അന്തിക്കാട് കൂട്ടുകെട്ടിൽ അവസാനം പുറത്തിറങ്ങിയ ചിത്രം. ലാലു അലക്സ്, സംഗീത് പ്രതാപ്, സംഗീത സിദ്ദിഖ്, ബാബുരാജ്, സബിതാ ആനന്ദ് തുടങ്ങിയവരാണ് ഹൃദയപൂർവത്തിലെ മറ്റുപ്രധാനതാരങ്ങൾ.

അഖിൽ സത്യന്റേതാണ് കഥ. നവാ​ഗതനായ ടി.പി. സോനു തിരക്കഥ ഒരുക്കുന്നു. പ്രശസ്ത പിന്നണി ഗായകനായ എസ് പി ബാലസുബ്രഹ്മണ്യത്തിന്റെ മകന് എസ് പി ചരൺ മോഹൻലാൽ-സത്യൻ അന്തിക്കാട് ചിത്രത്തിലൂടെ മലയാളത്തിൽ അരങ്ങേറ്റം കുറിക്കുന്ന വാർത്തകളും നേരത്തെ ശ്രദ്ധനേടിയിരുന്നു. സന്ദീപ് ബാലകൃഷ്ണൻ എന്നാണ് ഈ ചിത്രത്തിൽ മോഹൻലാൽ അവതരിപ്പിക്കുന്ന കഥാപാത്രത്തിന്‍റെ പേര്.

കുഞ്ഞിരാമായണം, പാച്ചുവും അത്ഭുത വിളക്കും എന്നീ ചിത്രങ്ങൾക്ക് സംഗീതസംവിധാനം നിർവഹിച്ച ജസ്റ്റിൻ്റെ മൂന്നാമത്തെ മലയാള ചിത്രമാണ് ഹൃദയപൂർവം. അനു മൂത്തേടത്ത് ക്യാമറ നിർവഹിക്കുന്നത്. കലാസംവിധാനം പ്രശാന്ത് മാധവ്, മേക്കപ്പ് പാണ്ഡ്യൻ, കോസ്റ്റ്യും ഡിസൈൻ സമീറാ സനീഷ്, സഹസംവിധാനം ആരോൺ മാത്യു, രാജീവ് രാജേന്ദ്രൻ, വന്ദന സൂര്യ, ശ്രീഹരി, പ്രൊഡക്ഷൻ മാനേജർ ആദർശ്, പ്രൊഡക്ഷൻ എക്സിക്യൂട്ടീവ് ശ്രീക്കുട്ടൻ, പ്രൊഡക്ഷൻ കൺട്രോളർ ബിജു തോമസ്, ഫോട്ടോ അമൽ.സി. സദർ, പി.ആർ.ഒ വാഴൂർ ജോസ്.