കമൽ ഹാസൻ മണിരത്നം ചിത്രം 'തഗ് ലൈഫ്' ഷൂട്ടിംഗ് പൂർത്തിയായി; വിവരങ്ങൾ പുറത്തുവിട്ട് നിർമാതാക്കൾ; പുതിയ അപ്ഡേറ്റുകൾക്കായി കാത്തിരിപ്പിൽ ആരാധകർ

കമൽ ഹാസനെ പ്രധാന വേഷത്തിലെത്തിച്ച് മണിരത്നം സംവിധാനം ചെയ്യുന്ന ചിത്രമാണ് 'തഗ് ലൈഫ്'. ഈ സിനിമയുടെ ഓരോ അപ്ഡേറ്റും പ്രേക്ഷകർ വളരെ ആകാംക്ഷയിലാണ് കാത്തിരിക്കുന്നത്. ഇപ്പോൾ നീണ്ട 37 വർഷങ്ങൾക്കിപ്പുറമാണ് കമൽ ഹാസനും മണി രത്നവും ഒന്നിക്കുന്നത്. ജോജു ജോർജ്, തൃഷ, അഭിരാമി, ഐശ്വര്യാ ലക്ഷ്മി, നാസർ തുടങ്ങിയവർക്കൊപ്പം ചിത്രത്തിലെ മറ്റൊരു പ്രധാന കഥാപാത്രത്തെ അവതരിപ്പിക്കുന്നത് നടൻ ചിമ്പുവാണ്. ഇപ്പോഴിതാ സിനിമയുടെ പുതിയ അപ്ഡേറ്റുമായി നിർമാതാക്കൾ എത്തിയിരിക്കുകയാണ്.

തഗ് ലൈഫിന്റെ ചിത്രീകരണം പൂർത്തിയായ വിവരം നിർമാതാക്കൾ ഇന്ന് സോഷ്യൽ മീഡിയയിലൂടെ അറിയിച്ചിരിക്കുകയാണ്. കമൽ ഹാസന്റെ രാജ്കമൽ ഫിലിംസിനൊപ്പം മണി രത്നത്തിൻറെ മദ്രാസ് ടാക്കീസും ഉദയനിധി സ്റ്റാലിൻറെ റെഡ് ജയൻറ് മൂവീസും ചേർന്നാണ് ചിത്രം നിർമിക്കുന്നത്. 'രംഗരായ ശക്തിവേൽ നായ്ക്കർ' എന്നാണ് ചിത്രത്തിൽ കമൽ ഹാസൻ അവതരിപ്പിക്കുന്ന വേഷത്തിന്റെ പേര്.

മണി രത്‌നത്തിനൊപ്പം പതിവ് സഹപ്രവർത്തകരായ സംഗീതസംവിധായകൻ എ.ആർ റഹ്‌മാനും എഡിറ്റർ ശ്രീകർ പ്രസാദും ഈ ചിത്രത്തിലും ഒരുമിക്കുന്നത് ആരാധകരെ ആവേശത്തിലാഴ്ത്തിയിരിക്കുകയാണ്. രവി കെ ചന്ദ്രൻ ആണ് ഛായാഗ്രാഹകൻ. അശോക് സെൽവൻ, അലി ഫസൽ, പങ്കജ് ത്രിപാഠി, ജിഷു സെൻഗുപ്ത, സാന്യ മൽഹോത്ര, രോഹിത് ഷറഫ്, വൈയാപുരി എന്നിവരാണ് മറ്റ് പ്രധാന കഥാപാത്രങ്ങൾ.