തങ്കലാന്‍ സമാനതകളില്ലാത്ത വിജയം നേടും; ചിത്രത്തെ പ്രശംസിച്ച് സൂര്യ; ചിത്രം നാളെ തിയേറ്ററിലെത്തും

ചെന്നൈ: ഇന്ത്യന്‍ സിനിമാ ലോകം തന്നെ ആകാംഷയോടെ കാത്തിരിക്കുന്ന ചിത്രമാണ് വിക്രമിനെ നായകനാക്കി പാ രഞ്ജിത്ത് സംവിധാനം ചെയ്ത ബിഗ് ബജറ്റ് ചിത്രം തങ്കലാന്‍.ആരാധകര്‍ക്കൊപ്പം തന്നെ സിനിമാ താരങ്ങളും ചിത്രത്തിന്റെ റിലീസിനായി കാത്തിരിക്കുകയാണ്.ഇപ്പോഴിതാ സിനിമാ മേഖലയില്‍നിന്ന് തങ്കലാനെ പ്രശംസിച്ചുകൊണ്ട് സാക്ഷാല്‍ സൂര്യ തന്നെ രംഗത്തെത്തിയിരിക്കുകയാണ്.

തങ്കലാന്‍… ഈ വിജയം കുറച്ചു വലുതായിരിക്കും എന്നാണ് സൂര്യ എക്സില്‍ പോസ്റ്റ് ചെയ്തത്. വിക്രം, സംവിധായകന്‍ പാ രഞ്ജിത്ത് തുടങ്ങിയവരെ പേരെടുത്തുപറഞ്ഞിട്ടുമുണ്ട് അദ്ദേഹം. സൂര്യയുടെ പോസ്റ്റ് പാ രഞ്ജിത് ഷെയര്‍ ചെയ്തിട്ടുണ്ട്. നന്ദി സര്‍ എന്നാണ് സംവിധായകന്‍ കുറിച്ചത്.വിക്രമും സൂര്യയുടെ പിന്തുണയ്ക്ക് നന്ദി അറിയിച്ചെത്തി.

കോലാര്‍ സ്വര്‍ണഖനിയുടെ പശ്ചാത്തലത്തില്‍ സ്വര്‍ണഖനനത്തിനായി ബ്രിട്ടീഷുകാര്‍ ഒരു ഗ്രാമത്തിലേക്ക് വരുന്നതിന് ശേഷമുണ്ടാകുന്ന സംഭവവികാസങ്ങളാണ് 'തങ്കലാ'ന്റെ പ്രമേയം.മലയാളി താരങ്ങളായ പാര്‍വതി തിരുവോത്ത്, മാളവിക മോഹനന്‍ എന്നിവരാണ് നായികമാര്‍. പശുപതിയാണ് ഇതിലെ മറ്റൊരു നിര്‍ണ്ണായക കഥാപാത്രത്തിന് ജീവന്‍ പകര്‍ന്നിരിക്കുന്നത്.

തമിഴിലെ ഹിറ്റ് മേക്കറും ദേശീയ അവാര്‍ഡ് ജേതാവുമായ ജി വി പ്രകാശ്കുമാര്‍ സംഗീതമൊരുക്കിയ ഈ ചിത്രത്തിന് കിഷോര്‍ കുമാര്‍ ഛായാഗ്രഹണവും സെല്‍വ ആര്‍ കെ ചിത്രസംയോജനവും നിര്‍വഹിച്ചിരിക്കുന്നു. എസ് എസ് മൂര്‍ത്തി കലാസംവിധാനം നിര്‍വഹിച്ച തങ്കലാനു സംഘട്ടനം ഒരുക്കിയത് സ്റ്റണ്ണര്‍ സാം ആണ്. ഡ്രീം ബിഗ് ഫിലിംസാണ് ഡിസ്ട്രിബ്യൂഷന്‍ പാര്‍ട്ണര്‍. നീലം പ്രൊഡക്ഷന്‍സും സ്റ്റുഡിയോ ഗ്രീനിന്റെ ബാനറില്‍ കെ.ഇ. ജ്ഞാനവേല്‍ രാജയും ചേര്‍ന്നാണ് ചിത്രം നിര്‍മിക്കുന്നത്.

സെന്‍സറിംഗ് പൂര്‍ത്തിയായപ്പോള്‍ യു/എ സര്‍ട്ടിഫിക്കറ്റ് സ്വന്തമാക്കിയ ഈ ചിത്രം നാളെ വമ്പന്‍ റിലീസായാണ് ശ്രീ ഗോകുലം മൂവീസ് കേരളത്തിലെത്തിക്കുന്നത്.