റോളക്‌സിനെ കടത്തി വെട്ടുമോ? 49ാം പിറന്നാള്‍ ദിനത്തില്‍ സൂര്യയുടെ പുതിയ ചിത്രത്തിന്റെ ഗ്ലിംപ്‌സ് പുറത്ത്
ചെന്നൈ: സൂര്യയും കാര്‍ത്തിക് സുബ്ബരാജും ഒന്നിക്കുന്ന സിനിമക്കായി ആരാധകര്‍ ഏറെ പ്രതീക്ഷയില്‍ കാത്തിരിക്കയാണ്. ഇപ്പോഴിതാ നടിപ്പിന്‍ നായകന്റെ പിറന്നാളിനോടനുബന്ധിച്ച് സൂര്യ 44 ന്റെ ഗ്ലിംപ്‌സ് പുറത്തുവിട്ടിരിക്കയാണ് അണിയറപ്രവര്‍ത്തകര്‍. സൂര്യയുടെ മാസ് എന്‍ട്രിയാണ് പുറത്തുവന്ന വീഡിയോയില്‍ കാണാന്‍ സാധിക്കുക.
കറുപ്പ് നിറത്തിലെ ഷര്‍ട്ടും പാന്റ്‌സും ധരിച്ച് നടന്നുവന്ന് തോക്ക് ചൂണ്ടുന്ന സൂര്യയെ വീഡിയോയില്‍ കാണാം. ഇതിനോടകം തന്നെ വിഡിയോ സോഷ്യല്‍ മീഡിയയില്‍ ഹിറ്റായിക്കഴിഞ്ഞു. സിനിമ വേറെ ലെവല്‍ ആയിരിക്കുമെന്ന് തന്നെയാണ് ഓരോ ആരാധകരുടേയും പ്രതീക്ഷ.
സൂര്യയുടെ 49-ാം പിറന്നാള്‍ ആണിന്ന്. നിരവധി ആരാധകരാണ് താരത്തിന് ആശംസകള്‍ നേരുന്നത്. 'ലവ് ലാഫ്റ്റര്‍ വാര്‍' എന്നാണ് സൂര്യ 44ന്റെ ടാഗ് ലൈന്‍. സൂര്യ-ജ്യോതികയുടെ 2ഡി എന്റര്‍ടെയ്ന്‍മെന്റും കാര്‍ത്തിക് സുബ്ബരാജിന്റെ സ്റ്റോണ്‍ ബെഞ്ച് ഫിലിംസും ചേര്‍ന്നാണ് ചിത്രം നിര്‍മ്മിക്കുന്നത്.
ജയറാമും ജോജു ജോര്‍ജും പ്രധാന കഥാപാത്രങ്ങളെ അവതരിപ്പിക്കുന്നുണ്ട്. പൂജ ഹെഗ്‌ഡെ നായികയാവുന്ന സിനിമയില്‍ കരുണാകരനും മറ്റൊരു പ്രധാന വേഷത്തിലെത്തുന്നുണ്ട്
