ഈ സിനിമയാണ് എനിക്ക് ആക്ഷനിലേക്കുള്ള വാതിൽ ആദ്യമായി തുറന്നത്; ഞാൻ വളരെ ആവേശത്തിലാണ്; 'ഥമ്മ'യിലെ വേഷത്തെ കുറിച്ച് നടി രശ്‌മിക
മഡ്‌ഡോക്ക് ഫിലിംസിന്റെ സൂപ്പർനാച്ചുറൽ യൂണിവേഴ്സിലെ പുതിയ ചിത്രമായ 'ഥമ്മ' ഒക്ടോബർ 21-ന് തിയേറ്ററുകളിലെത്തും. ഈ ചിത്രത്തിലൂടെയാണ് താൻ ആദ്യമായി ആക്ഷൻ സിനിമകളിൽ അഭിനയിക്കുന്നതെന്ന് നടി രശ്‌മിക മന്ദാന പറഞ്ഞു. ആദിത്യ സർപോദർ സംവിധാനം ചെയ്യുന്ന ചിത്രത്തിന് യുഎ സർട്ടിഫിക്കറ്റ് ലഭിച്ചിട്ടുണ്ട്. രശ്‌മിക മന്ദാന, ആയുഷ്മാൻ ഖുറാന എന്നിവർക്കൊപ്പം നവാസുദ്ദീൻ സിദ്ദിഖിയും പ്രധാന വേഷത്തിലെത്തുന്നു.
"ആക്ഷൻ മേഖലയിലേക്കുള്ള എന്റെ ആദ്യ ചുവടുവയ്പ്പാണ് 'ഥമ്മ'. ഇതിനുമുമ്പ് ഞാൻ പെർഫോമൻസിന് പ്രാധാന്യം നൽകുന്ന കഥാപാത്രങ്ങളെയാണ് അവതരിപ്പിച്ചിരുന്നത്. 'മൈസ' പോലുള്ള ആക്ഷൻ ചിത്രങ്ങൾ ചെയ്തപ്പോഴും 'ഥമ്മ'യാണ് എനിക്ക് ആക്ഷൻ ലോകത്തേക്കുള്ള വാതിൽ തുറന്നുതന്നത്. അതിനാൽ ഈ രണ്ട് അനുഭവങ്ങൾ തമ്മിലുള്ള വ്യത്യാസം എനിക്കറിയാം," രശ്‌മിക ഒരു ബോളിവുഡ് മാധ്യമത്തോട് പ്രതികരിക്കവേ പറഞ്ഞു.
ഈ കഥാപാത്രം എങ്ങനെ അവതരിപ്പിക്കണം എന്നതിനെക്കുറിച്ച് തനിക്ക് മുൻകാല റെഫറൻസുകളൊന്നും ലഭിച്ചിരുന്നില്ലെന്നും, ഇതൊരു പുതിയ അനുഭവമായിരുന്നുവെന്നും നടി കൂട്ടിച്ചേർത്തു. "സംവിധായകനും മറ്റ് അണിയറപ്രവർത്തകരും നൽകിയ പിന്തുണയോടെയാണ് ഞാൻ മുന്നോട്ട് പോയത്. അവർ നൽകിയ നിർദ്ദേശങ്ങൾക്കനുസരിച്ച് പ്രവർത്തിക്കാൻ എനിക്ക് സാധിച്ചു," രശ്‌മിക വ്യക്തമാക്കി.
