രശ്മിക മന്ദാനയുടെ 'ദി ഗേൾഫ്രണ്ട്' ചിത്രത്തിൻ്റെ പുത്തൻ അപ്ഡേറ്റ് പുറത്ത്; കാത്തിരുന്നതെന്ന് ആരാധകർ

രശ്മിക മന്ദാനയും ദീക്ഷിത് ഷെട്ടിയും പ്രധാന വേഷത്തിലെത്തുന്ന 'ദി ഗേൾഫ്രണ്ട്' എന്ന ചിത്രത്തിൻ്റെ റിലീസ് തീയതി പുറത്ത്. 2025 നവംബർ 7-ന് ചിത്രം ലോകമെമ്പാടും റിലീസ് ചെയ്യും. ഗീത ആർട്‌സും ധീരജ് മൊഗിലിനേനി എന്റർടൈൻമെന്റും സംയുക്തമായി നിർമ്മിക്കുന്ന ചിത്രം പ്രശസ്ത നിർമ്മാതാവ് അല്ലു അരവിന്ദ് ആണ് അവതരിപ്പിക്കുന്നത്. രാഹുൽ രവീന്ദ്രൻ സംവിധാനം ചെയ്യുന്ന ചിത്രത്തിന്റെ നിർമ്മാണം ധീരജ് മൊഗിലിനേനിയും വിദ്യ കൊപ്പിനീടിയും ചേർന്നാണ് നിർവഹിക്കുന്നത്.

നേരത്തെ പുറത്തിറങ്ങിയ ചിത്രത്തിലെ രണ്ട് ഗാനങ്ങൾ പ്രേക്ഷക ശ്രദ്ധ നേടിയിരുന്നു. രശ്‌മിക അവതരിപ്പിക്കുന്ന നായികാ കഥാപാത്രവും നായകനായ ദീക്ഷിത് ഷെട്ടിയുടെ കഥാപാത്രവും തമ്മിലുള്ള സംഭാഷണം ഉൾപ്പെടുന്ന ഒരു രംഗം പുറത്തുവിട്ടുകൊണ്ടാണ് ചിത്രത്തിന്റെ റിലീസ് തീയതി പ്രഖ്യാപിച്ചത്. ഇരുവരുടെയും ഓൺസ്‌ക്രീൻ കെമിസ്ട്രി ഗാനരംഗങ്ങളിലും പ്രശംസ പിടിച്ചുപറ്റിയിരുന്നു. 'നദിവേ' എന്ന ടൈറ്റിലോടെ പുറത്തിറങ്ങിയ ആദ്യ ഗാനവും, 'നീ അറിയുന്നുണ്ടോ' എന്ന വരികളോടെയെത്തിയ രണ്ടാം ഗാനവും സാമൂഹിക മാധ്യമങ്ങളിൽ വ്യാപകമായി ശ്രദ്ധിക്കപ്പെട്ടു.

നിലവിൽ പോസ്റ്റ്-പ്രൊഡക്ഷന്റെ അവസാന ഘട്ടത്തിലുള്ള 'ദി ഗേൾഫ്രണ്ട്' വൻ തിയേറ്റർ റിലീസിനാണ് ഒരുങ്ങുന്നത്. തെലുങ്ക്, തമിഴ്, മലയാളം, കന്നഡ, ഹിന്ദി എന്നീ ഭാഷകളിലായിരിക്കും ചിത്രം പ്രദർശനത്തിനെത്തുക. കൃഷ്ണൻ വസന്താണ് ഛായാഗ്രഹണം നിർവ്വഹിച്ചിരിക്കുന്നത്. ഹിഷാം അബ്ദുൾ വഹാബ് സംഗീതം നൽകിയിരിക്കുന്ന ചിത്രത്തിന്റെ എഡിറ്റർ ചോട്ടാ കെ പ്രസാദ് ആണ്.